Şanlı tariximizin qəhrəman oğlu...
Cəlilabad rayonunun Söyüdlü kəndində boya-başa çatan Tural Arif oğlu Rəhimov ömrünü canından artıq sevdiyi Vətəni, bağlı olduğu xalqı üçün yaşadı. O, 30 il əsir düşən Qarabağımızın azadlığı uğrunda başlanan haqq savaşımıza birincilər cərgəsində getdi, yağıya qarşı igidliklə döyüşdü və 27 yaşında şəhidlik zirvəsinə ucaldı. Həyat yolu qısa olsa da, əsl qəhrəman kimi tarixə yazıldı. Turalın keçdiyi bu şərəfli yol həm də göstərir ki, Vətən sevgisi hər şeydən əzizdir, ona tapınıb yaşamaq milyonların qəlbində sənə əbədi yer edir. Canı bahasına qana susamış düşməni qanda boğub əlçatmaz, ünyetməz göylərə ucalan Tural kimi. Nəsibi əzəmətli, möhtəşəm şəhidlik zirvəsindən boylanmaq səadəti olan qəhrəman Vətən oğlu qərinələr keçəcək, gələcək nəsillər tərəfindən də böyük ehtiramla xatırlanacaq.
Vətənini, xalqının xoşbəxt gələcəyini düşünən dərin zəkaya, yüksək mədəni səviyyə malik yeniyetmə Tural orta məktəbdən sonra, 2010-ci ildə Lənkəran Dövlət Universitetinə daxil olub. Bütün zehnini, düşüncəsini işə salmaqla yaxşı oxuyub, "Kimya-biologiya" ixtisası üzrə ali təhsil alıb. Qaldı ki, müqəddəs peşə bildiyi müəllim işləməyi bir qədər arxaya verib, yağıdan qisas almaq məqsədilə ordu sıralarına gedib və əsgərliyi cəbhə bölgəsinə düşüb. Tural bundan qürur hissi keçirdib, doğma Azərbaycanı göz-bəbəyi tək qoruyub. Qeyrətli, mərd, vətənpərvər gəncə hərbi hissədə hamı hörmət bəsləyib, onun dağ vüqarına, əyilməz qüruruna heyran kəsilib. Tural xidməti alnıaçıq başa vursa da, Vətənin çətin günündə ona dayaq durmaq üçün yenidən Azərbaycan Ordusunun sıralarında müddətdən artıq həqiqi hərbi xidmətə başlayıb. Leytenant rütbəsində yağıdan qisas alacağı məqama hazırlaşıb. 2016-cı il aprelin 1-də məzuniyyətə göndərilsə də, 2-5 apreldə baş verən Aprel döyüşlərinin başlaması ilə hərbi hissəyə geri dönüb, savaş meydanında yağının kabusuna çevrilib. Bu ağır müharibədə çoxlu sayda erməni dığasını məhv edib, nəticədə azad olunan Vətən torpağında ilk qələbə bayrağımız dalğalanıb.
Vətənə sonsuz sevgi ilə xidmət edən leytenant Tural Rəhimov İkinci Qarabağ müharibəsində döyüşə girən andan böyük fədakarlıq göstərib. Ürəyində aşıb-daşan qisas hissi Turalı yalnız qələbəyə doğru aparıb. Hər dəfə döyüşə atılanda erməni dığaları onun qarşısında tab gətirə bilməyib, silah-sursatını qoyub qaçmağa üz tuturlar. Qəhrəman Vətən oğlu sözün əsl mənasında sarsıdıcı zərbələri ilə yağıya od qoyub. Ən qaynar nöqtələrdə vuruşub, həmişə də zəfər qazanıb. Cəbrayılın və Qubadlının azadlığı uğrunda gedən döyüşlərdə göstərdiyi hünəri dillərdə dastana dönüb. Oktyabrın 22-də müharibə meydanında yağı gülləsinə sinə verib Vətən eşqli qəlbi əbədi olaraq dayanıb. Şəhidliyi millətinə, xalqına şərəf gətirən Tural Rəhimov dövlət tərəfindən "Vətən uğrunda", "Döyüşdə fərqlənməyə görə", Cəbrayılın, Qubadlının azadlığı uğrunda medallarına və III dərəcəli "Vətənə xidmətə görə" ordeninə layiq görülüb.
Bəli, Tural Rəhimov kimi qeyrətli Vətən övladlarının qanı bahasına qalib xalq olaraq bütün dünyada tanındıq. O üzdən Vətən və xalq onları unutmayacaq...
Zəfər ORUCOĞLU
Azərbaycan Jurnalistlər Birliyinin üzvü
