Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının təşkilatçılığı ilə Azərbaycan Yazıçılar Birliyində İkinci Dünya müharibəsində qazanılmış qələbənin 80 illiyi və dünya şöhrətli rus yazıçısı M.A.Şoloxovun anadan olmasının 120 illik yubileyi münasibətilə tanınmış yazıçı-publisist, politoloq, AYB və AJB-nin üzvü, soxsaylı kitabların və tədqiqat yazılarının müəllifi Reyhan Mirzəzadənin “Səhra qartalı” kitabının təqdimat mərasimini keçirdi.
İkinci Dünya müharibəsində, Qarabağ uğrunda gedən döyüşlərdə canlarından keçmiş oğul və qızlarımızın və Ulu Öndər Heydər Əliyevin əziz xatirəsi bir dəqiqəlik sükutla yad olundu.
Tədbiri giriş sözü ilə tarix üzrə fəlsəfə doktoru, Fəxri mədəniyyət işçisi, Yasamal rayon MKS-inin direktoru Lətifə Məmmədova açaraq qeyd etdi ki, ömrünün ən gözəl çağlarını müharibə meydanlarında keçirən görkəmli rus yazıçısı, ədəbiyyat üzrə Nobel mükafatı laureatı M.A.Şoloxovun anadan olmasının 120 illiyi İkinci Dünya müharibəsində qazanılan 9 may qələbəsinin 80 illiyinə təsadüf edir. Bu dünya şöhrətli yazıçının taleyi uşaqlıqdan ömrünün sonuna qədər iki müharibə, xeyli qarşıdurmaların, siyasi toqquşmaların illərindən keçib. Yazıçı 1941-1945-ci illər alman faşizminə qarşı müharibədə iştirak edib. İştirakçısı olduğu döyüşləri kitablara köçürüb.
Bildiyimiz kimi, Azərbaycan İkinci Dünya müharibəsinə 600 mindən çox oğul və qızlarını göndərib. Müharibə illərində Azərbaycanın bütün iqtisadiyyatı da müharibə tələblərinə uyğun qurulub. Bütün sənaye məhsulları cəbhə üçün məhsul istehsal etməyə başlayıb. Ümümmilli Lider Heydər Əliyev çıxışlarının birində bu barədə demişdir: “Faşizm üzərində Qələbənin qazanılmasında Azərbaycan xalqı da öz sanballı töhvəsini vermişdir”. Ulu Öndər müharibə veteranlarına xüsusi diqqət və qayğı göstərmiş, zaman-zaman onların xidmətlərini yüksək qiymətləndirmişdir. Ümummilli Liderin layiqli davamçısı Prezident İlham Əliyev tərəfindən yüksək diqqət və qayğı bu gün də uğurla davam etdirilir.
Milli Məclisin deputatı, M.Ş.Vazeh adına Mərkəzi Kitabxananın fəxri oxucusu Aydın Mirzəzadə çıxışında bildirib ki, İkinci Dünya müharibəsi bəşər tarixində ən ağır faciələrdən biridir. Faşizm bir xalqın ideologiyası deyil, faşizm insanlığa aid olmayan, amma insan simasında olan kütlənin ideologiyasıdır. Biz faşizmi Ermənistanın Azərbaycan üzərində təcavüzündə də gördük, Xocalı faciəsində gördük,torpaqlarımızın 30 il işğalında gördük, minlərlə dinc əhalinin qətlə yetirilməsində gördük. Bəşəriyyət güc tapdı və faşizmə qalib gəldi.
Sovet İttifaqı Qəhrəmanı, akademik Ziya Bünyadovun bacısı qızı, Azərbaycan Milli Elmlər Akademiyasının Tarix İnstitutunun məsul əməkdaşı, şərqşünas Zemfira Qurbanova çıxışı zamanı bildirdi ki, 1945-ci ildə Ziya Bünyadova Sovet İttifaqı Qəhrəmanı adı verilərkən o demişdir: “Bu ulduz mənim deyil, əsgərlərimin və bütün xalqımındır”.
Veteranlar Şurasının məsul əməkdaşı, ehtiyyatda olan polkovnik Adil Ələkbərov bildirdi ki, atam İkinci Dünya müharibəsində 4 il vuruşub, mən isə Qarabağ müharibələrində iştirak etmişəm. Azərbaycan Ordusunun Müzəffər Ali Baş Komandan İlham Əliyevin sərkərdəliy altında qazandığı qələbə xalqımızın başını dünyada uca etdi.
Rusiya Federasiyasının Azərbaycandakı Səfirliyinin birinci katibi Pavel Kuznetsov tədbirdə çıxış edərək bildirdi ki, İkinci Dünya müharibəsi sovet xalqlarının birliyinin, fədakarlığının və qəhrəmanlığının simvoludur. Müharibədə qazanılan Qələbə milyonlarla insanın həyatını itirməsi hesabına başa gəlib və bu xalqların iradəsinin, sevgisinin təcəssümüdür.
Milli Məclisin deputatı Mixail Zabelin çıxışında qeyd etdi ki, Azərbaycan xalqı alman faşizmi üzərində qələbənin qazanılmasında böyük rol oynamışdı. 300 mindən çox insan döyüşlərdə həlak olmuşdu. Bakı nefti Sovet ordusunun texnikası, təyyarələri üçün həyati əhəmiyyət daşıyırdı. Azərbaycanın yazıçı və şairləri cəbhədə təbliğat apararaq, döyüşçüləri qələbələrə ruhlandırırdılar.
Dağ Yəhudiləri İcmasının sədri, Yəhudi Sinaqoqunun rəhbəri Milix Yevdayev, Yazıçı, publisist, Zöhrə Əsgərova, publisist Əli Zərdabi və başqa çıxış edənlər Reyhan Mirzəzadənin çoxsahəli yaradıcılığından, onun ədəbiyyata verdiyi töhvələrindən danışdılar. Müəllifin “Səhra qartalı” əsərinin tarixi və ədəbi baxımından əhəmiyyətini vurğuladılar.
Təqdimatda Böyük Vətən müharibəsinə və M.A.Şoloxovun yaradıcılığına, həsr olunmuş videoçarxlar nümayiş olundu.
M.Ş.Vazeh adına Mərkəzi Kitabxana İ.Əbilov adına Mədəniyyət Mərkəzi və “Müasir şairlər. Modern Poems” ədəbi layihənin iştirakçıları ilə birgə alman faşizmi üzərində qazanılmış qələbənin 80 illiyinə həsr olunmuş “Yaddaşımıza həkk olunan əbədiyaşar qəhrəmanlar” musiqili səhnə nümayiş etdirildi.
Yasamal rayon MKS-nin direktoru Lətifə Məmmədova yenə də söz alaraq qeyd etdi ki, İkinci Dünya müharibəsi əbədi olaraq tariximizə həkk olunub. Azərbaycan xalqının Ümummilli Lideri Heydər Əliyev, Prezident İlham Əliyev və birinci xanım Mehriban Əliyeva İkinci Dünya müharibəsinin iştirakçılarına həmişə böyük diqqət və qayğı göstərib. Ulu Öndərimiz veteranlarla görüşərkən demişdir: “Azərbaycan xalqı İkinci Dünya müharibəsində həm döyüş meydanlarında, həm də arxa cəbhədə əsl şücaət və əzmkarlıq nümunələri göstərmişdir”. Müharibənin ilk günlərində Azərbaycanın 40 mindən çox oğlu və qızı cəbhəyə getmək üçün hərbi komissarlıqlara ərizə verdilər. İkinci Dünya müharibəsində şərəfli döyüş yolu keçmiş Azərbaycanın mərd oğul və qızlarının tarixi şücaətləri, qəhrəmanlıqları bu gün də yaddaşlardan silinməyəcək. 130 nəfər Azərbaycan vətəndaşı Sovet İttifaqı Qəhrəmanı adına layiq görülmüşdür. 170 min əsgər və zabit SSRİ-nin orden və medalları ilə təltif edilmişdir. Xalqımızın qəhrəmanlıq ənənələri bu gün də uğurla davam etdirilir.
Tədbirdə Azərbaycanda fəaliyyət göstərən diplomatik təşkilatların nümayəndələri, millət vəkilləri, şair və yazıçılar, yüksək rütbəli hərbçilər, Sovet İttifaqı Qəhrəmanlarının nəvə-nəticələri, Silahlı Qüvvələrin nümayəndələri, ictimai xadimlər, müxtəlif icma nümayəndələri, ictimaiyyət nümayəndələri və ziyalılar iştirak etdilər.
Rəhim MƏHƏRRƏMLİ
