Bir sıra avtobuslar hələ də sonuncu dayanacağa getmir. Belə bir problem Bakı şəhər sakinləri 36 nömrəli marşrut avtobusunda yaşanır. Sərnşinlər qeyd edir ki, 36 nömrəli avtobus sonuncu dayanacağa - metronun "Ulduz" stansiyasına qədər getmir.
Onların dediyinə görə, bu avtobus son zamanlar sərnişinləri Ziya Bünyadov prospektində mağazanın qarşısında düşürüb və yenidən birinci dayanacağa qayıdır.
AYNA: “Məsələ nəzarətə götürülüb”
Məsələ ilə bağlı Azərbaycan Yerüstü Nəqliyyat Agentliyindən (AYNA) “Bakı-Xəbər”ə bildirildi ki, məsələ nəzarətə götürülüb: “AYNA tərəfindən daşıyıcıya nizamlı fəaliyyətin təmin edilməsi, sərnişindaşıma qaydalarına ciddi riayət edilməsi və sürücü barədə tədbir görülməsi ilə bağlı tapşırıq verilib”.
Fərid Həşimov: “Bu problem tək 36 nömrəli marşutda deyil, bir sıra Bakıətrafı qəsəbə, kəndlərə gedən avtobuslarda da müşahidə olunur”
Nəqliyyat eksperti Fərid Həşimov “Bakı-Xəbər”ə açıqlamasında qeyd etdi ki, sərnişin avtobusları sərnişinləri mənzil başına aparmalıdır. Sərnişinlərin mənzil başına çatmasına cavabdeh olan şəxslər var. Həmin daşıyıcı ilk və sonuncu istiqamətin hara olduğunu yaxşı bilir: “Belə olan halda sərnişinləri yarıda düşürüb, ilk dayanacağa qayıtmaq düzgün deyil. Bu problem davamlı olaraq yaşanırsa, məsələ ciddi şəkildə araşdırılmalıdır. Xəttin sahibi üzərinə götürdüyü öhdəliyi yerinə yetirmir. Aidiyyatı qurumlar bu məsələni araşdırıb, günahı olan şəxslər mütləq cəzalandırılmalıdır”.
Həmsöhbətimiz onu da əlavə etdi ki, bu problem tək 36 nömrəli marşutda deyil, bir sıra Bakıətrafı qəsəbə, kəndlərə gedən avtobuslarda müşahidə olunur: “Sürücülər tıxacda çox vaxt itirdikləri üçün sonuncu dayanacağa çatmadan sərnişinləri düşürüb, geri dönür. Çünki onlar üçün müəyyən interval müəyyənləşib, sürücü ilk dayanacağa vaxtından gec çatsa o cərimələnir. Bu səbəbdən bəzi sürücülər tıxacda çox vaxt itirdikləri üçün sərnişinləri sonuncu dayanacağa düşürmədən, geri dönür. İstənilən halda, məsələ araşdırılmalıdır”
Günel CƏLİLOVA
