Bəhruz Məhərrəmov: “Dövlət hesabına hüquqi yardım üçün ödənilən məbləğin azlığı vəkillər üçün çətin idi”
Məlum olduğu kimi, vəkillərə dövlət hesabına ödənilən hüquqi yardımın məbləği artırılıb. Bu barədə Baş nazir Əli Əsədov qərar imzalayıb. Qərara əsasən, dövlət hesabına ödənilən hüquqi yardım məbləği bir saat üçün 6 manatdan 11 manatadək artırılıb.
Vəkillərə dövlət hesabına ödənilən hüquqi yardım məbləğinin artması barəsində fikir bildirən Milli Məclisin Hüquq siyasəti və dövlət quruculuğu komitəsinin üzvü Bəhruz Məhərrəmov “Bakı-Xəbər”ə şərhində bildirdi ki, Azərbaycan Respublikasının Konstitusiyası 60-cı maddəsinə əsasən hüquq və azadlıqların inzibati və məhkəmə təminatı, 61-ci maddə ilə də hər kəsin yüksək keyfiyyətli hüquqi yardım almaq hüququ var: “Ancaq dövlət hesabına hüquqi yardım üçün ödənilən məbləğin azlığı vəkillər üçün çətin idi. Bu dəfə də dövlət başçımız böyük humanistlik edərək indiki mürəkkəb şəraitdə vəkillərimizi ciddi narahat edən problemə həssaslıqla yanaşıb, səsimizə səs verməklə həm Azərbaycanda insan hüquq və azadlıqlarının səmərəli müdafiə və təminatı, həm də vəkillik fəaliyyətində yeni bir mərhələnin başlamasına təkan verdi və buna görə möhtərəm Prezidentimizə təşəkkür edirik".
Mehman Muradlı: “Vəkillərə 1 saat ərzində verilən dəyərin 6 manatdan 11 manata yüksəlməsi yaxşı bir haldır”
Vəkil Mehman Muradlı “Bakı-Xəbər”ə şərhində bildirdi ki, dövlət hesabına ödənilən hüquqi yardım məbləğinin 11 manat olması normal rəqəmdir: “Nəzərə almaq lazımdır ki, Azərbaycanda minimum saat hesabı üçün əmək haqqı 2 manat 50 qəpikdir. Vəkillərə 1 saat ərzində verilən dəyərin 6 manatdan 11 manata yüksəlməsi yaxşı bir haldır. Onu da deyim ki, bu işin problemli tərəfləri çoxdur. Nəzərə almaq lazımdır ki, vəkildə bu cəmiyyətin bir üzvüdür. Proses zamanı boş-boşuna çox vaxt itirilir. Yəni istintaq təcridxanasında uzun-uzadı gözləmə, məhkəmənin deyildiyi vaxtda keçirilməməsi kimi problemlər var. Hesab edirəm ki, vaxt itkisinin kompensasiya edilməsi bu məbləğin içində var”.
Əziz Qənbərli: “Bu məsələyə hər il baxılıb növbəti il üçün kvota müəyyən edilməlidir, çünki…”
Vəkil Əziz Qənbərli “Bakı-Xəbər”ə açıqlamasında qeyd etdi ki, vəkillərin sosial təminatı ilə bağlı atılmış hər bir addım vəkil olaraq onu məmnun edir: “Vəkillər daima cənab Prezidentin diaqqət mərkəzindədir, onların sosial problemlərinin həlli istiqamətində davamlı işlər görür. Vəkillərin nüfuzunun günü gündən artması Prezident İlham Əliyevin Məhkəmə Hüquq sistemində islahatların aktiv fazaya keçməsindən sonra daha da yaxşılaşdı. Son qərar da bunun bariz nümunəsidir. Dövlətimizin bu qərarına görə əməyi keçənlərə, o cümlədən Baş Nazir cənab Əli Əsədova, Vəkillər Kollegiyasının Rəyasət Heyətinin sədri cənab Anar Bağırova və Ombudusman Səbinə xanəm Əliyevaya təşəkkür edirik. Lakin hesab edirəm ki, bu məsələyə hər il baxılıb növbəti il üçün kvota müəyyən edilməlidir. Çünki hər il minimum əmək haqqı, yaşayış minimumu dəyişirsə bu məsələ də hər il müzakirə olunub artırılmalıdır”.
Günel CƏLİLOVA
