“Britaniyanın əczaçılıq şirkəti Glaxo 40 ildən artıqdır ki, mədə xorası və mədə yanması dərmanı “Zantac”ın təhlükələrini gizlədir”. Bu barədə "Bloomberg" nəşri məlumat yayıb.
“Bloomberg”, istehsalçının 1978-ci ildən bəri bu yan təsirdən xəbərdar olduğunu deyir. Bu, ranitidin dərmanının aktiv maddəsi ilə bağlıdır. Dərman kimi qəbul edildikdə güclü kanserogen N-nitrosodimetilamin (NDMA) buraxır. Nəşr iddia edir ki, şirkət bu araşdırmaların nəticələrini gizlədib. Ancaq artıq bütün dünyada məlum dərmanlar geri çağırılır.
Qeyd edək ki, bu dərmandan Azərbaycanda da istifadə olunur. Bu dərmanın Azərbaycanda dövlət qeydiyyatına alınmış dərman vasitələrinin qiymətləri siyahısında qiyməti belədir: ZANTAK RANITIDINE 150 mq Tablet Blister N20, Çin istehsalı 6,95, ZANTAK RANITIDINE 25 mq/ml İnyeksiya üçün məhlul, Ampul 2 ml N5, İtaliya istehsalı 6,45.
Analitik Ekspertiza Mərkəzi: “Ölkəyə “Zantac”, “Ranitidin”, “Simetidin” adlı dərman vasitələri 3-4 ildir ki, rəsmi olaraq idxal edilmir”
Məsələ ilə bağlı Analitik Ekspertiza Mərkəzindən bildirildi ki, Azərbaycana dərman idxalı özəl şirkətlər tərəfindən həyata keçirilir: “Azərbaycanda “Ranitidin” tərkibli “Zantac” dərmanı inyeksiya şəklində, “Ranitidin”in özü isə vaxtilə tablet şəklində istifadə edilib, amma onun tərkibində hansısa zərərli maddələrin olması barədə dünyada məlumatlar yayılan dövrdən, yəni 2019-2020-ci ildən sonra idxal üçün müraciət olunmayıb və müvafiq olaraq, icazə də verilməyib. Ölkəyə “Zantac”, “Ranitidin”, “Simetidin” adlı dərman vasitələri 3-4 ildir ki, rəsmi olaraq idxal edilmir. Dərman vasitələrindən ölkəmizdə yalnız Gedeon Rixter şirkətinin istehsalı olan “Famotidin” tərkibli “Kvamatel” gətirilir ki, onun tərkibində zərərli maddələrin olması barədə heç bir məlumat yoxdur”.
Adil Qeybulla: “Dünyada satışı qadağan olunan bu preparat ölkəmizdə istifadə olunur”
Professor, tibbi ekspert Adil Qeybulla qeyd etdi ki, 2019-cu ildə adıçəkilən preparatın xərcəng şişi törətməsi ilə bağlı məlumatlar yayılandan sonra artıq dünyada həyəcan təbili çalınmağa başladı: “Bunlar mədədə, qara ciyərdə, prostat vəzidə xərçəng şişi xəstəlikləri yarada bilir. Şirkət dərmanın tərkibində kanserogen maddə olduğunu bilib və gizlədibsə, buna görə mütləq məsuliyyət daşımalıdır. Yox, bununla bağlı heç bir məlumat olmayıbsa və sonradan ortaya çıxıbsa, burada hüquqi məsuliyyət artıq başqa çür dəyərləndirilə bilər”.
Tibbi ekspert onu da əlavə etdi ki, “Zantac” mədə turşusu istehsalını azaldan bir dərmandır. Ümumiyyətlə, bu dərman mədə xorası və GERD xəstəliyini müalicə etmək üçün qəbul edilir: “13 sentyabr 2019-cu il tarixində ABŞ Qida və Dərman İdarəsi (FDA) bəyanat yayaraq, “Zantac” da daxil olmaqla bəzi ranitidin dərmanlarında N-nitrosodimethylamine (NDMA) adında bir nitrosamin safsızlığının olduğunu elan edərək dərman mağazalarında bütün ranitidin məhsullarının satışını dayandırıb. 1 aprel 2020-ci ildə FDA dərman istehsalçılarından ranitidinin bütün növlərini ABŞ bazarından çıxarmasını istəyib”.
Həmsöhbətimiz təəssüf hissilə bildirdi ki, dünyada satışı qadağan olunan bu preparat ölkəmizdə istifadə olunur. Bu dərmanlar hazırda Azərbaycanda satışda var.
Günel CƏLİLOVA
