“Güney Azərbaycandan olan soydaşlarımızın gəlib burada təhsil almasına dövlət büdcəsindən 5-10 milyon manat vəsait ayrılması çox yaxşı olardı. Bu, strateji məsələdir”. Bu fikirlər Milli Məclisdə müzakirə edilib.
Qeyd edək ki, Azərbaycan Prezidentinin Türk Dövlətləri Təşkilatının Səmərqənd sammitində 40 milyon güneylinin təməl hüquqları ilə bağlı məlum çıxışı fonunda bu təklif xüsusilə önəm kəsb edir. Bu səbəbdən də mütəxəssislər Güney Azərbaycandan olan soydaşlarımızın təhsil almasına şərait yaradılmasını vacib sayır. Bununla bağlı müəyyən layihələrin həyata keçirilməsi vacib sayılır.
“Güneyli tələbələrin yataqxanalar və yaxud yataqxana tipli evlərlə təmin edilməsi, xərclərinin qarşılanmasını tənzimləyən proqram tərtib edilməlidir”
Təhsil eksperti Kamran Əsədov isə qeyd etdi ki, Güney Azərbaycanda yaşayan azərbaycanlılar xarici ölkələrə əsasən tibb, mühəndislik və müəllimlik ixtisasları üzrə təhsil almağa gedir: “Hazırda ölkəmizdə cənublu soydaşlarımız daha çox tibb sahəsində təhsil alırlar. Lakin çox təəssüf ki, onlara tətbiq olunan təhsil haqqı 4000-4500 manatdır. Hətta digər universitetlərdə daha yüksək təhsil haqqı təklif olunur. Cənab Prezidentimizin də çıxışında dediyi kimi, Azərbaycan dilində danışan, amma təhsil almaq imkanından məhrum olan kifayət qədər azərbaycanlı soydaşlarımız var. Bununla bağlı iki məşhur proqramdan istifadə edə bilərik. Məsələn, qardaş Türkiyədə türkcə danışan ölkələr üzrə proqram var. Buna Türkiyə bursları deyilir. Azərbaycan da Güney Azərbaycandan olan soydaşlarını attestatsız, sadə sənədləşmə prosesi ilə birbaşa qəbul etməlidir. Çünki Güney Azərbaycanda soydaşlarımızın Azərbaycan dilində məktəbi yoxdur. Ona görə yoxdur ki, Azərbaycan dilində təhsil almış, diplomu olan şəxslər yoxdur. Amma hər kəsə məlumdur ki, Cənubi Azərbaycanda Azərbaycan məktəbi yoxdursa da, erməni dilində həm məktəb, həm də qəzet var. Çünki onların həmin ərazidə öz dillərində ixtisaslı mütəxəssisləri var.
Hazırda qardaş Türkiyədə 30 mindən çox cənublu soydaşımız təhsil alır. Elə etməliyik ki, onlar gəlib Azərbaycanda da təhsil alsınlar. Biz bunu İran sərhədinə yaxın olan ərazilərdə yerləşən universitetlərdə, məsələn, Lənkəran Dövlət Universitetində təşkil edə bilərik. Həmin universitetdə müəllimlik və mühəndislik ixtisası üzrə fakültələr var. Naxçıvan Respublikası ərazisində də üç universitetimiz fəaliyyət göstərir ki, həmin universitetlərdə də tibb, müəllimlik, mühəndislik fakültələri var”.
Ekspert hesab edir ki, güneyli tələbələrin yataqxanalar və yaxud yataqxana tipli evlərlə təmin edilməsi, xərclərinin qarşılanmasını tənzimləyən proqram tərtib edilməlidir. Cənubi Azərbaycandan olan soydaşlarımıın bütün təhsil xərclərini qarşılayıb, onlara dəstək olmaq lazımdır.
Günel CƏLİLOVA
