Dövlət qurumlarının əsas vəzifəsi vətəndaş məmnunluğunu təmin etmək, vətəndaşların şikayətlərinə, təkliflərinə operativ cavab vermək, problemləri tez şəkildə həll etmək olsa da, təəssüflər olsun, bəzi qurumlara vətəndaşların əlləri çatmır. Bəzi qurumların qaynar xətləri, Çağrı mərkəzləri bərbad vəziyyətdədir. Hətta ən önəmli qurumlar arasında belə bu hal mövcuddur. Bu fikirləri havadan söyləmirik, bunu keçirilən rəy sorğuları da təsdiqləyir.
Media Təhlil Mərkəzi (MTM) dövlət və özəl qurumların Çağrı Mərkəzlərinin fəaliyyət indeksini müəyyənləşdirmək üçün sorğu keçirib.
Sorğuda bir neçə qurumun Çağrı mərkəzinin fəaliyyətinə ən aşağı bal (0-2) verilib. Məlumatlara görə, bunlar Müdafiə Nazirliyi (Xətt daim məşğuldur və çalışmır), Müdafiə Sənayesi Nazirliyi (Nazirliyin əlaqə nömrələri işləmir), "Ərzaq Məhsullarının Tədarükü və Təchizatı" ASC (ASC-yə məxsus əlaqə nömrələri fəaliyyət göstərmir), Ombudsman Aparatı (Çağrı Mərkəzinin nömrəsi işləmir) və Mədəniyyət Nazirliyidir (Qaynar xətt xidməti fəaliyyət göstərmir).
Göründüyü kimi, bu qurumların Çağrı mərkəzləri iflic durumdadır. Halbuki, dövlət o Çağrı mərkəzlərini qurmaq üçün milyonlarla vəsait xərcləyib, amma onların vətəndaşlara cavab vermək səviyyədə işləkliyi təmin edilməyib.
Mətubuatda qeyd edilənə görə, bir ay müddətində telefon vasitəsilə həyata keçirilən sorğuda Çağrı mərkəzlərinin xidmət operativliyi, vətəndaşlarla danışıq səviyyəsi, suallara verilən cavablar və problemlərin həllinə obyektiv, düzgün yanaşma meyarları əsas götürülüb.
Yuxarıdakı meyarlar nəzərə alınmaqla, qurumların Çağrı mərkəzlərinin fəaliyyəti 10 ballıq şkala üzrə 4 səviyyədə qiymətləndirilib.
Sorğuda ən yüksək balı Daxili İşlər, Fövqəladə Hallar, Əmək və Əhalinin Sosial Müdafiəsi, Ekologiya və Təbii Sərvətlər, Energetika, Xarici İşlər, İqtisadiyyat, Təhsil və Rəqəmsal İnkişaf və Nəqliyyat, digər nazirliklər, eləcə də Baş Prokurorluq, Dövlət Gömrük, Qaçqınların və Məcburi Köçkünlərin İşləri üzrə Dövlət Komitəsi, “AzərEnerji” ASC, Kiçik və Orta biznesin inkişafı Agentliyi, “Azərbaycan Xəzər Dəniz Gəmiçiliyi” QSC, “Azərbaycan Dəmir Yolları” QSC alıb. Belə ki, bu qurumların fəaliyyəti on ballıq şkala üzrə 9-10 balla qiymətləndirilib. Bildirilir ki, qurumlar zənglərə operativ cavab verir, zərurət olduqda isə müraciətlər (problemlər) nəzarətə götürülür.
“Təəssüflər olsun ki, bəzi dövlət və özəl qurumlar arasında hələ də vətəndaş müraciətinə barmaqarası baxanlar var”
“Müasir İnkişaf” Birliyinin sədri, siyasi şərhçi Mübariz Göyüşlü bizimlə söhbətində bildirdi ki, istər dövlət, istərsə də özəl qurumlar arasında bu kimi neqativ halın yaşanması təəssüf doğurur. Çağrı mərkəzlərinin operativliyin təmin olunması üçün yaradıldığını qeyd edən Birlik sədri hesab edir ki, bütün qurumlar Çağrı mərkəzinin aktivliyinin təmin olunmasında maraqlı olmalıdır. “Hesab edirəm ki, Çağrı mərkəzləri, qaynar xətlər dövlət qurumlarında ictmaiyyətlə əlaqələri tənzimləyən, daha operatv şəkildə quran bir təsisatdır. Bu baxımdan dövlət və özəl qurumlar ictimaiyyətlə sıx işlədikləri üçün Çağrı mərkəzlərinin aktivliyinə xüsusi diqqətlə yanaşılmalıdır. Çağrı mərkəzi ona görə yaradılır, telefon nömrəsi ona görə təqdim edilir ki, vətəndaş öz problemini, şikayətini, yaxud arzu və təklifini həmin qurumlara ünvanlaya bilsin. Vətəndaşın müraciət etməsi üçün dövlət və özəl qurumlarda Çağrı mərkəzlərinin işəkliyinin təmin edilməsi vacibdir. Amma təəssüflər olsun ki, bəzi dövlət və özəl qurumlar arasında hələ də vətəndaş müraciətinə barmaqarası baxanlar var. Bu ondan qaynaqlanır ki, bəzi qurumlar üçün ictimai rəy, ictimaiyyətin münasibəti o qədər də önəmli deyil. Bu gün Çağrı mərkəzləri yüksək səviyyədə işləyən dövlət qurumları ilə yanaşı Çağrı mərkəzləri qeyri-aktiv olan qurumların olması acı təəccüf doğurur. Mən bunu mənfi hal kimi qiymətləndirirəm. Bu, dövlətimizin maraqlarına ziddir. Azərbaycan dövləti açıq hökuməti təşviq edir, vətəndaşlar üçün dövlət qurumlarının, məmurların daha əlçatan olmasını, onlara maneəsiz müraciət etmələrini təmin etdiyi bir dövrdə bəzi qurumların Çağrı mərkəzlərinin işləməməsi təəssüf doğurur. Bu qətiyyən arzuedilən məsələ deyil. Bu, əslində, Azərbaycan dövlətinin rəhbərinin daim öz çıxışlarında irəli sürdüyü və vətəndaşların rifahına yönəlik fikirlərinə ziddir. Prezident bütün məqamlarda dövlət qurumlarının vətəndaş üçün əlçatan olmasının təmin edilməli olduğunu irəli sürür və bunu məmurlardan tələb edir”.
Çağrı mərkəzlərinin fəaliyyətinin gücləndirilməli olduğunu deyən M.Göyüşlünün sözlərinə görə, 44 günlük Vətən müharibəsindən qalib çıxan Azərbaycan dövlətinin qurumları vətəndaşların, xüsusən də qazilərimizin, şəhid ailələrinin problemlərinə xüsusi həssaslıqla yanaşmalıdır. M.Göyüşlünün sözlərinə görə, problemlərin həllində, sosial dövlət qurmaq istiqamətində çalışmaları gücləndirməliyik. O qeyd etdi ki, dövlət qurumları məxfi sayılmayan informasiyaları vətəndaşlar üçün əlçatan etməlidir, eyni zamanda məmurlarla ünsiyyət qurmaq imkanları da yaxın olmalıdır. Vətəndaşın nazirdən tutmuş şöbə müdirlərinə qədər müraciət etmək imkanı olmalıdır. “Mən Çağrı mərkəzləri normal işləməyən qurumların siyahısına Təhsil Nazirliyini də əlavə etmək istəyirəm. Vətəndaş heç vaxt Təhsil Nazirliyinin qaynar xəttnə, telefonlarına düşə və öz şikayətini, təkliflərini deyə bilməz. Bu mümkün deyil. Təhsil Nazirliyi sanki Bastiliya qalasıdır. O cümlədən də bir neçə qurumlarımız var ki, onlarla da heç cür ünsiyyət qurmaq olmur. Bu anlamda dövlət qurumlarının bu şəkildə davranışlarını mənfi hal kimi qiymətləndirirəm. Hesab edirəm ki, bəzi dövlət qurumlarının Çağrı mərkəzlərinin iflic vəziyyətdə olması vətəndaşların maraqlarına və Azərbaycan dövlətinin yürütdüyü siyasətə ziddir”- deyə M.Göyüşlü qeyd etdi.
İradə SARIYEVA
