Bayram günləri bəzi avtomobillər şəhərə buraxılmayacaq. Belə ki, bayram günlərində paytaxta daxil olan yük avtomobillərinin sürücüləri məsuliyyətə cəlb ediləcək.
Daxili İşlər Nazirliyi Baş Dövlət Yol Polisi İdarəsinin İctimaiyyətlə əlaqələr şöbəsindən mətbuata bildiriblər ki, 31 dekabr - Dünya Azərbaycanlılarının Həmrəylik Günü və Yeni il münasibətilə 31 dekabr 2014-cü il - 4 yanvar 2015-ci il tarixlərinin istirahət günü olması ilə əlaqədar paytaxtda nəqliyyat vasitələrinin və piyadaların hərəkət intensivliyinin artacağını nəzərə alaraq, Azərbaycan Respublikası DİN Baş Dövlət Yol Polisi İdarəsi yükdaşıma fəaliyyəti ilə məşğul olan fiziki və hüquqi şəxslərə xəbərdarlıq edib. İdarə bir daha onların nəzərinə çatdırır ki, özlərinə məxsus və ya istifadələrində olan yük avtomobilləri ilə saat 8:00-dan 21:00-dək Bakı şəhərinin ərazisinə daxil olmasınlar: "Bu qadağa ilə bağlı müvafiq yol nişanlarının və müəyyən edilmiş vaxt rejiminin tələblərini pozan sürücülər mövcud qanunvericiliklə nəzərdə tutulmuş qaydada inzibati məsuliyyətə cəlb ediləcək".
Sözügedən məsələ ilə bağlı "Bakı-Xəbər"ə açıqlama verən "Təhlükəsiz Yol" Alyansının koordinatoru Şahin Camalov belə bir məhdudiyyətin qoyulmasını dəstəklədiyini bildirdi: "Məsələ ondadır ki, bayram günlərində gediş-gəlişin çox olması paytaxtda avtomobil sıxlığının artmasına səbəb olur. Bu da, öz növbəsində, qəzaların artmasına səbəb olur. Təsadüfi deyil ki, məhz bayram günləri respublika və paytaxt yollarında ağır yol qəzalarının sayı çoxalır. Ona görə də baş verə biləcək qəzaların sayının minimuma endirilməsi baxımından bu kimi addımların atılmasını dəstəkləyirəm. Yəni yükdaşıma ilə məşğul olan avtomobillərin hərəkətinə paytaxtda həqiqətən də məhdudiyyət qoyulmasına ehtiyac var".
