Hər gün saat 17:00-dan 19:00-a kimi paytaxt yollarında uzun-uzadı tıxaclar müşahidə olunur. Bu müddət ərzində yaşanan tıxacların səbəblərindən biri də toy karvanıdır. Gəlin-bəy avtomobilinin arxasınca şadlıq evinə gedən maşınlar yolda nəqliyyatın hərəkətinin dayanmasına səbəb olur. Nəticədə həm toya, həm də işdən çıxıb evinə gedənlər tıxacda dayanmalı olur.
Bu günlərdə Bakı şəhərində bəy-gəlin tıxacda qalmamaq üçün qeyri-adi addım ataraq ictimai nəqliyyat vasitəsindən istifadə edib. Cütlük yeraltı nəqliyyat olan metro vasitəsilə şadlıq evinə gedib. Onlar metroya "Əhmədli" stansiyasında minib və "Həzi Aslanov"a qədər gedib.
Bəylə gəlin sərnişinlərin də diqqətini cəlb edib, onlar cütlüyün fotosunu və videosunu çəkiblər. Cütlüyün bu hərəkəti hər kəs tərəfindən xoş qarşılanıb. Sosioloq Aytəkin Kamranqızının fikrincə, ailə quran gənclərin şadlıq evinə metro vasitəsilə getməsi təqdirəlayiqdir: "Məncə, bəylə gəlin bu metoddan istifadə etməlidir. Bəlli məsələdir ki, şəhərdə yaranan tıxacların bir səbəbi də toy karvanıdır. Bəy-gəlin maşınının arxasınca onlarla avtomobil boy-boya düzülüb gedir. Nəticədə nəqliyyatın hərəkəti dayanır. Bu kimi halların baş verməməsi üçün bəylə gəlinin ictimai nəqliyyatdan istifadə etməsi məsləhətdir".
