Tariximizi, arxeoloji abidələrimizi, qoruqlarımızı qorumaq əsas vəzifələrimizdən biri olsa da, təəssüf ki, bəzi hallarda bunu bacara bilmirik. Əsasən də bəzi vətəndaşlarımız əksər hallarda bu abidələrin dəyərini bilmək istəmir. Halbuki, tariximizə ictimaiyyət, xalq olaraq özümüz sahib çıxmalıyıq.
Bildiyimiz kimi, qədim Gəncə ərazisində 1988-ci ildə Nazirlər Sovetinin qərarı ilə yaradılan və qoruq statusu verilən Gəncə Dövlət Tarix-Mədəniyyət Qoruğunun ərazisinin zibilxanaya, zibil poliqonuna cevirildiyi haqda məlumatlarla hamımız tanışıq. Bu halı təsdiqləmək üçün ortada müraciətlər də, fotoşəkillər də, videogörüntülər də var. Fotoşəkillərdən və problemi ictimailəşdirənlərin verdiyi informasiyalardan aşkar görünür ki, bu qoruğun ərazisi mühafizə olunmayıb, bu səbəbdən də zibil poliqonuna çevrilib.
Ora qoruq olduğu halda, necə ola bilir ki, Gəncə Dövlət Tarix-Mədəniyyət Qoruğunun ərazisi bu vəziyyətə salınıb? Mədəniyyət Nazirliyinin və onun müfaviq qurumlarının bu məsələdən xəbəri varmı? Dövlət Xidməti qədim Gəncə ərazisinin zibildən təmizlənməsi üçün hansı tədbirləri görəcək?
“Təəssüflər olsun ki, bu hadisə Gəncə Dövlət Tarix-Mədəniyyət Qoruğunun ərazisinə məişət və təsərrüfat tullantılarının tökülməsi ilə bağlı ilk hal deyil”
Gəncə şəhər ictimaiyyətinin həyəcan təbili çaldığı bu məsələyə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mövqeyini öyrənmək üçün qurumun mətbuat xidmətinin rəhbəri Fariz Hüseynovla əlaqə saxladıq.
Fariz Hüseynov “Bakı-Xəbər”ə açıqlamasında belə bir problemin olduğunu təəssüflə bildirdi və onun həlli istiqamətində işlər görüləcəyini vurğuladı. “Təəssüflər olsun ki, bu hadisə Gəncə Dövlət Tarix-Mədəniyyət Qoruğunun ərazisinə məişət və təsərrüfat tullantılarının tökülməsi ilə bağlı ilk hal deyil. Belə halların qarşısının alınması məqsədilə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin, Gəncə Dövlət Tarix-Mədəniyyət Qoruğunun, eləcə də Gəncə Şəhər İcra Hakimiyyətinin məsul əməkdaşlarının iştirakı ilə bir müddət əvvəl qoruqda monitorinq aparılıb və akt tərtib edilib. Monitorinq zamanı qədim Gəncə ərazisində Qala divarlarının qalıqları, bürclər və körpü qalıqları ətrafına iri yük maşınları ilə məişət və təsərrüfat tullantılarının töküldüyü aşkar edilib. Qoruq ərazisinin təmizlənməsi və belə neqativ halların qarşının alınmasında köməklik göstərilməsi ilə bağlı Dövlət Xidməti tərəfindən Gəncə Şəhər İcra Hakimiyyətinə rəsmi müraciət də edilib. Qeyd edək ki, bir neçə gün öncə Gəncə Şəhər İcra Hakimiyyətinin rəhbərliyi də ərazidə olub. İnşaat tullantılarının ərazidən daşınması, yolun hamarlanması ilə bağlı aidiyyəti qurumlar qarşısında məsələ qaldırılması və kompleks işlərin icrası ilə əlaqədar müvafiq tapşırıqlar verilib. Məlumat üçün onu da bildirək ki, qoruq əməkdaşları mütəmadi olaraq ərazidə müşahidələr aparır, baş vermiş neqativ halları qeydə alaraq məlumat verirlər”- deyə F.Hüseynov bildirdi.
İradə SARIYEVA
