Sosial şəbəkələrdə 189-190 nömrəli tam orta məktəbin direktoru Ceyran Quliyevaya aid olduğu iddia edilən səs yazısı böyük rezonans doğurub. Müəllimlərin votsap qrupunda yayılan səs yazısında direktorun valideynlərdən pul yığmaq tələbi vurğulanıb. Əks halda isə həmin pulun müəllimlər tərəfindən ödəniləcəyi qeyd olunub.
Səs yazısında qeyd edilir ki, hansı müəllimin sinfində pulu gətirməyən varsa, onu sinif rəhbərləri özləri ciblərindən düzəldib versinlər.
Yayılmış səs yazısı sosial şəbəkələrdə müzakirələrə səbəb olub.
Qeyd edək ki, təhsil müəssisəsində toplanan üzvlük haqqı könüllüdür, bununla bağlı hər hansı məcburiyyət yoxdur.
Bakı Şəhəri üzrə Təhsil İdarəsi: “Direktorun səs yazısı ilə bağlı araşdırma aparılır”
Məsələ ilə bağlı Bakı Şəhəri üzrə Təhsil İdarəsindən bildirildi ki, yayılmış səs yazısı araşdırılır: “Paytaxtdakı 189-190 nömrəli tam orta məktəbin direktorunun səs yazısı ilə bağlı Bakı Şəhəri üzrə Təhsil İdarəsi tərəfindən müvafiq araşdırma aparılır. Araşdırmanın nəticələri barədə əlavə məlumat veriləcək. Məktəbin, müəllimin fəaliyyətinə uyğun olmayan hallara qarşı qanunvericiliyin tələbləri çərçivəsində müvafiq tədbirlərin görülməsi hər zaman diqqət mərkəzində saxlanılır”.
Kamran Əsədov: “Bəzi məktəb direktorlarının, rayon təhsil şöbələrinin qeyri-peşəkarlığı, vəzifəsinin öhdəsindən gəlməməsi ucbatından…”
Təhsil eksperti Kamran Əsədov bildirdi ki, təhsil ocaqlarına rəhbərlik edənlər arasında peşəkarlığı aşağı olan, vəzifədə qalmaq üçün müəyyən qanun pozuntularına göz yumanlar var: “Ölkəmizdə fəaliyyət göstərən 4500-ə qədər orta məktəbdə ali idarəetmə orqanı ictimai əsaslarla fəaliyyət göstərən pedaqoji şura hesab olunsa da, təhsil müəssisələrinin əksəriyyətində VMA-nın fəaliyyəti yalnız kağız üzərindədir. Orta məktəblərdə təhsil verənlər - müəllimlər, tərbiyəçilər, praktik psixoloqlar, sosioloq-pedaqoqlar, loqopedlər, dərnək və musiqi rəhbərləri, uşaq birliyi rəhbərləri, çağırışaqədərki hazırlıq rəhbərləri, pedaqoji fəaliyyətlə məşğul olan digər işçilərdir ki, bu qədər geniş kollektiv şagirdlərlə işi, fəaliyyəti düzgün istiqamətdə qura bilmir. Bu geniş kollektivin müəyyən hissəsinin öz vəzifəsini düzgün yerinə yetirməməsi nəticədə cəmiyyətə yarımçıq vətəndaşın, şəxsiyyətin daxil olmasına gətirib çıxarır”.
Ekspert onu da əlavə etdi ki, yüksək təhsil səviyyəsinə malik peşəkar kadrlar ölkənin intellektual potensialının əsasıdır. Lakin bəzi məktəb direktorlarının, rayon təhsil şöbələrinin qeyri peşəkarlığı, vəzifəsinin öhdəsindən gəlməməsi ucbatından, demək olar ki, hər gün təhsilin bu və ya digər pilləsindən neqativ, arzuolunmaz xəbərlər eşidilir.
189-190 nömrəli tam orta məktəb: “Direktor məktəbdə yoxdur, bu haqda danışa bilmərik”
Məsələ ilə bağlı 189-190 nömrəli tam orta məktəblə əlaqə saxladıq. Telefon zənginə cavab verən xanım direktorun məktəbdə olmadığını bildirdi və məlum səs yazısı ilə bağlı danışa bilməyəcəyini deyib, telefonun dəstəyini asdı.
Günel CƏLİLOVA
