Masallı Rayon İcra Hakimiyyətinin təşəbbüsü və təşkilatçılığı tərəfindən Heydər Əliyev Mərkəzində Şərəfə kənd tam orta məktəbinin 100 illik yubileyi keçirildi.
Tədbirdə birinci söz Şərəfə kəndinin ziyalısı Nahidə Məmmədovaya verildi: “100 yaşını qeyd etdiyimiz təhsil ocağı həm rayonun Şərəfə kəndində, həm də ətraf ərazilərdə yaşayan əhalinin savadlanmasında, dünyagörüşünün artmasında xüsusi rol oynayıb. Bu da kənd məktəbinin ilk maarifpərvər insanları İsmayıl Bağır oğlu Əzimovun və Masallı rayonunun ilk Əməkdar müəllimi Nəzirməmməd Bəşir oğlu Məmmədəliyevin adı ilə bağlıdır. Həmin işıqlı şəxslərdən sonra burada dərs alanların çoxu Bakıda və digər xarici ölkələrin ali məktəblərinə daxil olub, öz doğma rayona ziyalı kimi qayıdırdılar. Bu gün Şərəfə kəndi şəhid Qəhrəman İsmayılov adına tam orta məktəbinin təcrübəli və işgüzar pedaqoji kollektivi tarixi ənənələrə söykənən təhsil ocağının müvəffəqiyyətlərini artırmağa çalışır”.
Azərbaycan Universitetinin professoru, pedaqoji elmlər doktoru Fərahim Sadıqov, Şərəfə kəndi şəhid Qəhrəman İsmayılov adına tam orta məktəbin direktoru Gülcan Kərimova, Almaniyada yaşayan, məktəbin ilk müəllimi olan Nəzirməmməd Məmmədəliyevin qızı Nazilə Bəşirova, “Regional hüquqi və iqtisadi maarifləndirmə” İctimai Birliyinin sədri, xeyriyyəçi Arzu Bağırova, yazıçı-publisist Nurəddin Ədiloğlu, məktəbin məzunu Tahir Ələkbərov, məktəbin ilk qurucusu olan İsmayıl Əzimovun nəvəsi, Dürdanə Əzimova, tarix müəllimi Sərmayə Musayeva və başqaları öz çıxışlarında respublikamızda təhsilə göstərilən diqqət və qayğıdan, tarixə yazılan 44 günlük şanlı qələbəmizdən danışıb, Azərbaycan Prezidenti cənab İlham Əliyevə, birinci xanım Mehriban Əliyevaya təhsillə bağlı görülən sanballı işlərə görə minnətdarlıq etdilər. O da bir daha vurğulandı ki, qloballaşan dünyanın prinsiplərinə uyğun olaraq təhsil sisteminin modernləşməsi ölkəmizin başlıca hədəfidir.
Yubiley tədbiri Masallı Regional Mədəniyyət İdarəsinin solistləri Miriş Hüseynov, Şamo İbayev və başqa mədəniyyət işçilərinin hazırladığı konsert proqramı ilə başa çatdı.
Zəfər ORUCOĞLU Azərbaycan Jurnalistlər Birliyinin üzvü
