Milli Elmlər Akademiyası təsisatı olan bütün ölkələrdə elm dövlətin iqtisadiyyatının lokomotivi rolunda çıxış edir, aparıcı qüvvə kimi özünü göstərir. Elmin iqtisadiyyata, sənayeyə və başqa sahələrə təsirli faydası, səmərəsi nəticəsində böyük miqyaslı işlər həyata keçirilir. Azərbaycan Milli Elmlər Akademiyası (AMEA) isə, nəinki iqtisadiyyatımızın aparıcı gücünə çevrilə bilməyib, bütövlükdə heç bu sahəyə kiçik bir fayda verməyib. Bu qurumun adı elmi uğurlarda deyil, qalmaqallarda hallandırılır.
Məlum olduğu kimi, son bir ildə AMEA-nın elmi-tədqiqat institutlarında aparılan yoxlama nəticəsində bir neçə institutda qanunsuzluqlar aşkarlanıb, rəhbər heyət vəzifədən uzaqlaşdırılıb, amma hüquq müstəvisində heç bir iş görülməyib. Bundan başqa, Mərkəzi Nəbatat Bağının ərazisi qanunsuz olaraq satılıb və orada 2 villa tikilib. İndiyə qədər AMEA-nın elmi-tədqiqat institutlarında baş verənlərə və Mərkəzi Nəbatat Bağı ərazisindəki qanunsuz tikililərə görə hələ heç kəs cinayət məsuliyyətinə cəlb edilməyib. Baxmayaraq ki, Mərkəzi Nəbatat Bağının ərazisi qanunsuz olaraq satılıb və orada 2 villa tikilib. AMEA-dakı mənbələrimizdən əldə etdiyimiz məlumatlara görə, hələ villalar sökülməyib, villa sahibləri deyib ki, məhkəmə qərarı olmadan buranı sokmək olmaz. Villa sahiblərinin kimliyi isə açıqlanmır.
Gördüyünüz kimi, həm Mərkəzi Nəbatat Bağında 2 qanunsuz villa tikintisi məsələsi hələ də qeyri-müəyyən qalır, eyni zamanda institutlarda baş verənlərə görə hüquqi addımlar atılmır.
AMEA hansı səbəbdən daxilində baş verənlərə görə məhkəməyə üz tutmaq istəmir, cinayət işi açılmasına təşəbbüs etmir? Sizcə nə baş verir və nə üçün bu məsələyə ciddi yanaşılmır?
“Kəskin addımlar atılmalıdır, buna cavabdeh olan adamlar cəzalandırılmalıdır”
Professor Qulu Məhərrəmli “Bakı-Xəbər”ə şərhində AMEA sistemində baş verənləri biabırçılıq adlandırır. “Akademiya sistemində yeyintilərin olması, büdcənin dağıdılması, dövlət əmlakının sui-isifadəsi kimi hallar haqda eşitmək çox biabırçılıqdır. Baxın, Fizika İnstitutunda baş verən büdcə dağıntısı, maliyyənin o şəkildə israf olunması, neçə vaxtdır Dilçilik İnstitutunda dövlətin ayırdığı 2 milyon manatın yoxa çıxması, dağıdılması barədə söhbətlər gedir, orada vicdanlı adamlar həyəcan təbili çalır. Amma bu baş verən qanunsuzluqlarla bağlı heç bir tədbir görülmür, açıqlama verilmir, araşdırılma aparılmır, bunlar hamısı biabırçılıqdır. Nəbatat Bağında baş verənlər isə ümumiyyətlə heç bir sağlam məntiqə sığmır. Nəbatat Bağı istənilən ölkənin milli sərvətidir. Yəni ora illərlə çəkilən zəhmət, yetişdirilən bitkilər təkcə biologiya, botanika məsələsi deyil, milli fəxarət məsələsidir. Ona görə də, Mərkəzi Nəbatat Bağı ərazisində villa tikilməsi, ümumiyyətlə ora artıq tikililərin gəlməsi cinayətdir, ölkəyə, millətə meydan oxumaqdır. Eləcə də uyğun institutlarla bağlı baş verənlər hamısı, təbii ki, bir akademik şəbəkənin, bir saymazlığın, dəyərlərə meydan oxumağın nümunəsidir, təzahürüdür. Bu səbəbdən də, fikrimcə, bunu təkcə akademik dairələrə etibar etmək olmaz ki, onu araşdırsınlar və sair. Çünki onlarda o kəramət, o vidcan səsi olsaydı, bu cür addımlar atılmazdı”.
Q.Məhərrəmli hesab edir ki, AMEA institutlarında və Mərkəzi Nəbatat Bağında baş verən qanunsuzluqların araşdırılması, ona qiymət verilməsi məsələsini AMEA-nın ixtiyarına buraxmaq olmaz, çünki onlar bu məsələyə hüquqi qiymət verilməsində maraqlı görsənmirlər. “Ona görə də buna ən yüksək səviyyədə reaksiya verilməlidir, istənilən institutda baş verən bu cür cinayətkarlıq faktları araşdırılmalıdır”.
Q.Məhərrəmlinin sözlərinə görə, insanlar illər uzunu bu torpaqlar üzərində seleksiyalar aparır, bitkilər yetişdirir, o cür elmi-tədqiqat üçün material verən təcrübələr həyata keçirilir, amma onun nəticəsini görmək əvəzinə, texnika salıb orada divar ucaldıblar ki, nədi-nədi, burada kiminsə villası olacaq. “Ona görə də hesab edirəm ki, çox sərt addımlar atılmalıdır, bunlar cəzalandırılmalıdır. Başqaları da görməlidir ki, bu xalqın yetişdirdiklərinə, bu xalqın sərvətinə, bu xalqın əmlakına bu şəkildə müdaxilə etmək nə ilə nəticələnir. Ölkədə indi müəyyən addımlar atılır. Elə təşkilatlar var ki, atdığı addımları ictimaiyyət də dəstəkləyir. Bax, bu sahədə də o cür kəskin addımlar atılmalıdır, buna cavabdeh olan adamlar cəzalandırılmalıdır. Yoxsa, elə gəlirlər ölkənin sərvətini talayırlar, büdcəni dağıdırlar, sonra da “haqları”nı verib aradan çıxırlar. Belə olmaz. Bu nə idarəçilik məntiqinə sığır, nə də ədalət sisteminin məntiqinə sığır. Ona görə də ən sərt tədbirlər görülməlidir” - deyə Q.Məhərrəmli bildirdi.
İradə SARIYEVA
