Heç kəsə sirr deyil ki, çirkli, paslı, keyfiyyətsiz su insan sağlamlığına ciddi zərbə vurur. Çirkli və kəskin qoxulu sudan Abşeron rayonu Masazır qəsəbəsinin “Qurtuluş” və “Viktoriya” yaşayış massivlərinin sakinləri əziyyət çəkir.
Həmin ərazinin sakinləri qeyd edir ki, sudan kəskin qoxu gəlir. Evlərə gələn su nə içməyə, nə də istifadəyə yararlıdır.
Anar Cəbrayıllı: “Qurultuş”, həm də “Viktoriya” yaşayış massivlərindən su nümunələri götürülüb, yoxlanılıb, bütün kimyəvi, fiziki göstəricilər standartlara uyğundur”
Məsələ ilə bağlı “Azərsu” ASC-nin mətbuat katibi Anar Cəbrayıllı bildirdi ki, araşdırma aparıldıqdan sonra qəsəbədə su ilə bağlı problemin yaşanmadığı müəyyən edilub: “Həm “Qurultuş”, həm də “Viktoriya” yaşayış massivlərindən su nümunələri götürülüb, yoxlanılıb. Bütün kimyəvi, fiziki göstəricilər standartlara uyğundur, heç bir kənarlaşma yoxdur. Bir daha qeyd edirəm ki, su oradan Bakının Binəqədi, Nərimanov, Nizami rayonlarına, Xətai, Suraxanı və Sabunçu rayonlarının bir hissəsinə çatdırılır, həmin magistral kəmərin qidalandırdığı əraziləri əhatə edir. Əgər elə ciddi problem olsaydı, vətəndaşın dediyi kimi qoxu olsaydı, o zaman digər rayonlardan da kütləvi şikayətlər daxil olardı, amma elə bir şikayət yoxdur. Su keyfiyyət standartlarına uyğundur”.
Pərvanə Mustafayeva: “Suyun bakterioloji və sanitar-kimyəvi göstəriciləri qoyulan standartlara cavab verməlidir”
Həkim ekspert Pərvanə Mustafayeva bildirdi ki, suyun bakterioloji və sanitar-kimyəvi göstəriciləri qoyulan standartlara cavab verməlidir: “Məlumdur ki, Azərbaycanda suyun təmizlənməsi üçün xlorlanma üsulundan geniş istifadə edilir. Bəli, bizə də bu istiqamətdə bir sıra şikayətlər daxil olur. Xüsusilə bu problemdən şikayət edənlər yeni tikililərdə yaşayan sakinlər, eləcə də, sutəmizləyici filtrlərdən istifadə edən vətəndaşlardır. Bunun səbəbi isə çox sadədir. Çünki həmin binaların özünəməxsus xüsusi su anbarları olur. Bəzən iki bina üçün bir anbar müəyyənləşdirilir, bəzən də hər tikilinin özünə aid ayrı su anbarları olur. Bu anbarlarda çox ciddi antisanitariya hökm sürür”.
Günel CƏLİLOVA
