“Ali təhsil sisteminə müəyyən dəyişikliklər edilməsə, yaxşı nəticə əldə olunmayacaq. Bu sahədə bəzi boşluqlar özünü göstərir”. Bu sözləri mediaya açıqlamasında sabiq deputat, pedaqoq Sona Əliyeva deyib.
O qeyd edib ki, bu gün Azərbaycanda 60 min diplomlu, amma işsiz müəllim var. Bu heç kimə lazım deyil. Müəllimlər niyə işsiz qalmalıdır? Bazarın tələblərinə uyğun ali təhsil sistemi yaradılmalıdır. Hər il minlərlə müəllim işə qəbul olunur. Bu gün universitetlərdə bir çox lazımsız ixtisaslar var, onların heç birinə ehtiyac yoxdur.
Qeyd edək ki, araşdırmalar zamanı bu gün işsiz müəllimlərin sayının heç də az olmadığı müəyyən edilib. Maraqlıdır, bu sahədə yaşanan problemi necə həll etmək olar?
“Ölkəmizdəki ümumtəhsil müəssisələrində vakant yerlərin yaranması üçün müəllimlərin də vahid maaşı olmalıdır”
Təhsil eksperti Kamran Əsədov bildirdi ki, Azərbaycanın 4447 orta ümumtəhsil müəssisəsində 150 min müəllim çalışır: “Hər il Təhsil Nazirliyi müxtəlif səbəblərdən boş qalan vacant yerlərə müəllim qəbulu həyata keçirir. Təkcə 2021-ci ildə orta ümumtəhsil məktəblərində işləmək üçün 9000 müəllim işə qəbul edilib. Ali təhsil müəssisələrinin bakalavr pilləsinə bu il 16 minə yaxın abituriyent qəbulu həyata keçirilib. Cari il ərzində müəllimlərin işə qəbul imtahanında 61 min müəllim iştirak üçün ərizə verib. Onların yalnız 9 mini işə qəbul olunub. 60 minə yaxın diplomlu müəllim hazırda işsizdir. Bu olduqca ciddi məsələdir”.
Həmsöhbətimizin sözlərinə görə, gələcəkdə pedaqoji ixtisaslar üzrə plan yeri azaldılmalıdır. Balansın qorunması üçün pedaqoji ixtisaslar üzrə plan yeri yarıbayarı azaldılmalıdır: “Nəzərə almaq lazımdır ki, pedaqoji ixtisaslar üzrə qəbul yeri hədsiz dərəcədə çoxdur. Bu gələcəkdə böyük problemlərin yaranmasına səbəb ola bilər. Ehtiyac olan ixtisaslar üzrə qəbul yeri stabil saxlanmalı, digər ixtisaslarda isə ixtisar olmalıdır”.
K.Əsədov onu da əlavə etdi ki, ölkəmizdəki ümumtəhsil müəssisələrində vakant yerlərin yaranması üçün müəllimlərin də vahid maaşı olmalıdır: “12 saat dərs deyən müəllim vəzifə maaşı almalıdır. Bu zaman yerdə qalan dərs saatları vakant yer kimi çıxardılacaq. Həmçinin müəllimlərin təqaüdə çıxma yaşı dəyişdirilməlidir. Müəllimlər əmək haqları müqabilində təqaüdə çıxarılmalıdır ki, gənc müəllimlər üçün vakant yer yaransın”.
Günel CƏLİLOVA
