“Məktəbəqədər təhsil müəssisələrində meyvə-tərəvəzin və quru ərzaqların ayrı anbarları olmalıdır. Xüsusilə də tez xarab olan məhsullar soyuducu kameralarda saxlanmalıdır”. Bunu Qida Təhlükəsizliyi Agentliyinin əməkdaşı Şəhla Yusifzadə qurumun “Facebook” səhifəsindəki canlı yayımda bildirib.
Onun sözlərinə görə, təəssüf ki, bu cür tələblərə cavab verən bağçaların sayı çox azdır: “Xüsusilə tez xarab olan məhsullar, meyvə-tərəvəz, quru ərzaq hamısı eyni anbarda saxlanılır. Mal-qonşuluq prinsipi pozulur, eyni zamanda saxlama rejimlərinə düzgün əməl olunmur ki, bunun da nəticəsində ərzaq məhsullarının yararlılıq müddəti bitməmiş onlar həddindən artıq tez xarab olur. Əsas problemlər ərzaq məhsullarının daşındığı nəqliyyat vasitəsilə logistika zamanı olur. Ərzaq məhsulları onlar üçün xüsusi təyin olunmuş avtomobillərdə çatdırılmır. Bir neçə saat yol gələrkən soyuq zəncir prinsipi pozulur. Artıq bağçalar tərkibində mikroorqanizmlər oyanmış məhsulları qəbul edir. Soyuq zəncir prinsipinə bağçada məhsul saxlanan zamanı da əməl olunmalıdır. Əksər hallarda bu prinsip yenə də pozulur. Demək olar bağçaların əksəriyyətində dondurulmuş məhsullarla bağlı da problem var. Bu məhsullar18 dərəcədə saxlanılmalıdır, bu pozulanda məhsulun bioloji çirklənməsinə gətirib çıxarır. Bu da, sözsüz ki, gələcəkdə zəhərlənməyə və digər mənfi hallara gətirib çıxara bilir”.
Qeyd edək ki, AQTA mütƏmadi olaraq bağçalarda yoxlama aparır. Aparılan yoxlama zamanı da məktəbəqədər təhsil müəssisələrində nöqsanlar aşkar edilir.
Maraqlıdır, AQTA tərəfindən aparılan yoxlamalar zamanı qeydə alınan bağçalarla BAĞLI hər hansı bir sərt tədbir görülübmü?
Qida Təhlükəsizliyi Agentliyi - Şəhla Yusifzadə: “Kobud pozuntu faktları aşkar olunan 183 məktəbəqədər təhsil müəssisəsinin rəhbər şəxsləri barəsində inzibati qaydada tədbir görülüb”
Qida Təhlükəsizliyi Agentliyinin (AQTA) əməkdaşı Şəhla Yusifzadə bildirdi ki, kobud pozuntu faktları aşkar olunan 183 məktəbəqədər təhsil müəssisəsinin rəhbər şəxsləri barəsində inzibati qaydada tədbir görülüb: “Cari ilin oktyabrın 4-dən ölkə üzrə fəaliyyət göstərən bütün məktəbəqədər təhsil müəssisələrində yoxlamalara başlanılıb. Bunların sayı 1622-dir. Dekabrın 1-nə olan statistikaya görə, 220 müəssisədə dövlət nəzarət tədbirləri başa çatıb. 205 müəssisədə 1236 nöqsan aşkarlanıb. Bütün bu monitorinqlərin yekunu olaraq məktəbəqədər təhsil müəssisələrində qidalanmanın düzgün təşkil edilməsinə dəstək məqsədilə həm Bakıda, həm də bölgələrimizdə fəaliyyət göstərən uşaq bağçaları və körpələr evi rəhbərlərinin və məsul şəxslərin iştirakı ilə təlim keçirilib. Bu təlimlər artıq silsilə xarakteri daşıyır və davam etdiriləcək” .
Mayis Əliyev: “Uşaqların qidası, saxlanılması, ümumiyyətlə müəyyən olunan normativlərə əməl etməyən bağçaların rəhbərlikləri sərt şəkildə cəzalandırılmalıdır”
Sosial sahə üzrə ekspert Mayis Əliyev bildirdi ki, aidiyyəti qurumlar tərəfindən bugünə kimi məktəbəqədər təhsil müəssisələrində yoxlamalar keçirilir. Keçirlən yoxlamalar zamanı müəyyən nöqsanlar, çatışmazlıqlar aşkar edilir: “Aşkar edilən nöqsanlarla bağlı bağça rəhbərliyinə cəza verilir. Yaxşı olar ki, uşaqların qidası, saxlanılması, ümumiyyətlə müəyyən olunan normativlərə əməl etməyən bağçaların rəhbərlikləri sərt şəkildə cəzalandırılmalıdır. Töhmət verməklə bu sahədə müsbət nəticə əldə etmək olmaz”.
Günel CƏLİLOVA
