Məlum olduğu kimi, Vergi Məcəlləsinə təklif edilən dəyişikliklər paketi artıq Milli Məclisə təqdim olunub. Məcəlləyə təklif olunan növbəti dəyişikliklərdən biri kitab, dərslik və kağızın idxal və satışına vergi güzəştlərinin tətbiq edilməsi ilə bağlıdır.
Belə ki, təklif edilmiş dəyişikliyə əsasən, kitabların (elektron kitablar istisna olmaqla), dərslik komplektlərinin, həmin malların (məhsulların) istehsalı ilə bağlı rulon və ya vərəqə şəklində kağızın idxalının və satışının, habelə bu məhsulların istehsalı ilə bağlı redaksiya, nəşriyyat və poliqrafiya fəaliyyətinin (reklam xidmətləri istisna olmaqla) ƏDV-dən azad edilməsi nəzərdə tutulur. Mövcud qanunvericiliyə əsasən, kütləvi informasiya vasitələri məhsullarının idxalı, kitabların idxalı və satışı, habelə qəzetlərin, jurnalların və bu kimi digər məhsulların istehsalı ilə bağlı rulon və ya vərəqə şəklində kağızın idxalı və satışı ƏDV-ə 18% dərəcə ilə cəlb edilir.
Yeni təkliflərdə isə KİV məhsullarının və kitabların (elektron kitablar istisna olmaqla), habelə dərslik komplektlərinin idxalı və satışı, həmin məhsulların istehsalı (nəşri) ilə bağlı rulon və ya vərəqə şəklində kağızın idxalı və satışının ƏDV-dən azad edilməsi yer alıb.
Bundan əlavə, mətbu KİV məhsullarının və kitabların (o cümlədən elektron kitabların), habelə dərslik komplektlərinin istehsalı ilə bağlı redaksiya, nəşriyyat və poliqrafiya fəaliyyətinin də (reklam xidmətləri istisna olmaqla) ƏDV-dən azad olunması təklif edilib”.
Şakir Ağayev: “Bu dəyişiklik qəzetlərin çap xərclərinin azalmasına, mətbəələrin qiyməti aşağı salmasına səbəb olacaq”
“Novoye Vremya" qəzetının baş redaktoru Şakir Ağayev bildirdi ki, Vergi Məcəlləsinə təklif olunmuş dəyişiklik kağızın idxalı və satışında müsbət dəyişikliyə səbəb olacaq: “Bu dəyişiklik qəzetlərin və mətbəələrin işinə də təsir edəcək. Çünki müəyyən bir məbləğin vergi şəklində kağızın üzərinə əlavə edilməsi çap xərcinin artmasına təsir edirdi. Hesab edirəm ki, bu dəyişiklik qəzetlərin çap xərclərinin azalmasına, mətbəələrin qiyməti aşağı salmasına səbəb olacaq. Bu güzəştlərdən sonra mətbəələrlə qəzetlər arasında xidmət haqqı azalacaq”.
Həmsöhbətimiz onu da əlavə etdi ki, Vergi Məcəlləsinə təklif olunmuş məlum dəyişiklik tək qəzet sahəsinə deyil, eyni zamanda, bədii kitab və dərsliklərin də qiymətinə müsbət mənada təsir edəcək.
Aqil Camal: “Qəzet kağızına tətbiq olunan ƏDV ləğv olunsa, bundan dövlət elə bir şey itirməyəcək. Lakin çap mətbuatına xeyri olacaq”
“Türküstan" qəzetinin baş redaktoru Aqil Camal bildirdi ki, ölkəyə gətirilən kağızın ƏDV-dən azad edilməsi məsələsi zaman-zaman gündəm olub: “Bu məsələ, az qala hər il dövlət büdcəsinin müzakirəsi zamanı ayrı-ayrı millət vəkilləri tərəfindən səsləndirilib, hökumətə təkliflər verilib. Əslində, bu vergidən dövlətə heç əhəmiyyətli vəsait də daxil olmur. Amma çap mətbuatı, nəşriyyatlar üçün önəmlidir.
Hazırda ölkədə çap mətbuatının, qəzetlərin sayı da kəskin azalıb. Eyni zamanda, qəzetlərin tirajları da. Bu baxımdan, məsələn, qəzet kağızına tətbiq olunan ƏDV ləğv olunsa, bundan dövlət elə bir şey itirməyəcək. Lakin çap mətbuatına xeyri olacaq.
Burada təkcə çap xərcinin aşağı düşməsindən yox, daha keyfiyyətli məhsulun çapından söhbət getməlidir. Hazırda keyfiyyətli qəzet nəşr edən mətbəələrdə qiymət baha olduğu üçün bir çox qəzetlər məcburən ucuz çap edən mətbəələrə üz tutur. Bu da, istər-istəməz, keyfiyyətə mənfi təsir edir.
Hesab edirəm ki, nəzərdə tutulan dəyişiklik olarsa, keyfiyyətli qəzet dərc edən mətbəələr, o cümlədən Azərbaycan Nəşriyyatı qiymət məsələlərinə yenidən baxa bilər, qəzetlər üçün optimal qiymət müəyyənləşdirər. Bununla da keyfiyyət təmin olunar.
Günel CƏLİLOVA
