2022-ci ilin dövlət büdcəsinin sosial və investisiyayönümlü olması təqdirəlayiqdir. Ölkə başçısı cənab İlham Əliyevin rəhbərliyi ilə aztəminatlı və həssas təbəqədən olan insanların sosial müdafiəsinin gücləndirilməsi üçün nəzərdə tutulan layihələr davam etdirilir.
Baki-xeber.com xəbər verir ki, bunu Milli Məclisin Ailə, qadın və uşaq məsələləri komitəsinin sədri, professor Hicran Hüseynova deyib.
H.Hüseynova daha sonra bildirib: “İşğaldan azad edilmiş ərazilərdə bərpa - quruculuq işlərinin aparılması, Vətən Müharibəsi iştirakçılarının, şəhid ailələrinin sosial vəziyyətinin yaxşılaşdırılmasının nəzərə alınması dövlət büdcəsi xərclərinə həssaslıqla yanaşmağı tələb edir. Təbii ki, bu il proqnozlaşdırılan büdcə siyasətinin əvvəlki illərdən fərqi ondan ibarətdir ki, büdcə vəsaitindən Qarabağın, Şərqi Zəngəzurun sosial-iqtisadi və mədəni layihələrinin icrası üçün xərclər nəzərdə tutulub. Bu, olduqca vacibdir. Bu baxımdan, büdcə vəsaitində göstərilən xərclər onu deməyə əsas verir ki, növbəti ildə də büdcədən ayrılan vəsait əhalinin sosial rifahının yaxşılaşdırılması və iqtisadi infrastrukturların inkişafına həsr olunacaq. Azərbaycan 2022-ci ilə yenidən yeni reallıqlar və kifayət qədər mühüm əhəmiyyət daşıyan nailiyyətlərlə daxil olur. Bu baxımdan, növbəti ilin dövlət büdcəsi layihəsində işğaldan azad olunmuş ərazilərdə bərpa və quruculuq işlərinə xüsusi əhəmiyyət verilməsi çox önəmlidir və vacibdir. Büdcə layihəsi ilə birlikdə təqdim edilmiş iqtisadi və sosial inkişaf proqnozları real imkanlara və fürsətlərə əsaslanır. Büdcə xərclərinin planlaşmasında social siyasət, təhlükəsizlik, iqtisadi inkişaf kimi dövlət siyasətinin əsas xətləri dəstəklənir, antiinflyasiya tədbirləri nəzərə alınır. Büdcə layihəsində Ailə, qadın və uşaq, elm və təhsil, Səhiyyə, müdafiə, COVID-19 pandemiyası ilə mübarizə və digər strateji əhəmiyyətə malik sahələr üçün nəzərdə tutulmuş vəsaitlərin artırılması dövlətimizin qeyd olunan sahələrinin daha da gücləndirilməsinə, cəmiyyətimizin inkişafına öz töhfəsini verəcəkdir. Xüsusi olaraq bildirməliyəm ki, Milli Məclisin Sədri hörmətli Sahibə xanımın yaratdığı şərait əsasında 2022-ci il Dövlət Büdcəsi haqqında Qanun layihəsi nazirlərın, hökümət nümayəndələrinin iştirakı ilə Milli Məclisin həm komitələrin birgə iclasında həm də plenar iclasında geniş müzakirə olunur, təkliflər irəli sürülür və onlar nəzərə alınır. Məndə həm komitələrin birgə iclasında həmdə, plenar iclasda çıxış edərək öz fikirlərimi bildirmişəm və bu təklifləri həmdə yazılı şəkildə parlamentin katibliyinə təqdim etmişəm. İnanıram ki, səsləndirdiyim təkliflər dövlətimizin iqtisadi-siyasi fəaliyyətində nəzərə alınacaqdır”.
