İkinci Qarabağ müharibəsində haqq savaşımızda qəhrəmanlıq salnaməsini yazaraq xalqımıza şanlı qələbə sevinci yaşadan Vətənin igid oğullardan biri də Xüsusi Təyinatlı Qüvvələrin baş leytenantı şəhid Əliqismət Yaqubludur. Lerik rayonunun Kələxan kəndində dünyaya göz açan Əliqismət canını Vətəninə fəda edəndə ömrünün 28-ci ilini yaşayırdı. O, müharibənin ilk günündən misilsiz şücaət göstərir, saysız düşmənləri məhv etməklə zəfərimizdə silinməz izlər qoyur. Baş leytenant ölümündən sonra Şuşanın, Xocavəndin, Kəlbəcərin azad olmasına görə, “Vətən uğrunda” medallara və “Azərbaycan bayrağı” ordeninə layiq görülür.
Leriklilər öz igid oğlunu hər an ehtiramla xatırlayır, onunla qürur duyurlar. Rayonda onun xatirəsinə bulaq kompleksi ucaldılıb. Bulağın açılış mərasimi qəhrəmanın adına layiq təşkil olunmuşdu. Mərasimə demək olar ki, rayonun əksər hissəsi qatılmışdı. Azərbaycan Respublikasının Dövlət Himni səsləndi, şəhidlərin əziz xatirəsini yad etmək üçün bir dəqiqəlik sükut elan edildi. Rayon icra hakimiyyəti, eləcə də ziyarətçilər tərəfindən bulaq kompleksinin önünə əklil və tər gül-çiçəklər düzüldü.
Bulaq kompleksinin önündə davam etdirilən mərasimdə aparıcı Hüsaməddin Abbasov şəhidin həyat və döyüş yolu barədə ətraflı söhbət açdı. Sonra söz rayon icra hakimiyyəti başçısının səlahiyyətlərini icra edən Cəlil Baxşıyeva verildi: “Vətən müharibəsinin 44 günü ərzində Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi altında müzəffər Azərbaycan Ordusu 30 il işğal altındakı torpaqlar erməni faşistlərdən azad etdi. Bu möhtəşəm qələbə şəhidlərin qanı, canı bahasına əldə olundu. Vətənin azadlığı naminə canından keçən qəhrəman övladlarımız xalq tərəfindən böyük ehtiramla yad edilir. Həm birinci, həm də ikinci Qarabağ müharibəsində leriklilər də tarix yazdılar. Əliqismət məhz torpaq naminə göstərdiyi şücaəti ilə bizim üçün əsl qəhrəmanlıq simvoluna çevrildi.”
Şəhidin atası Mükafat Yaqubov, müəllimləri, sinif yoldaşları çıxış edərək Əliqismətin qısa, lakin şərəfli həyat yolundan, Vətən müharibəsində göstərdiyi şücaətlərdən, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin və Birinci Vitse-prezident Mehriban xanım Əliyevanın şəhid ailələrinə göstərdikləri diqqət və qayğıdan danışdılar.
Sonda məktəblilərin ifasında şəhidlərə və qələbəmizə həsr olunmuş şeirlər, rayon mədəniyyət mərkəzinin musiqi kollektivi tərəfindən vətənpərvərlik mövzusunda musiqi nömrələri səsləndirildi.
Zəfər ORUCOĞLU Azərbaycan Jurnalistlər Birliyinin üzvü
