Yasamal Rayon İcra Hakimiyyəti: “Qurum bir neçə dəfə bina sakinləri və tikinti şirkətinin rəhbəri ilə görüş keçirib”
Yasamal rayonu, Şərifzadə küçəsi 33 ünvanında yerləşən, “alimlərin yataqxanası” kimi tanınan bina 2016-cı ildə sökülüb. Məlumat üçün bildirək ki, Şərifzadə 33 ünvanında yerləşən bina 1956-cı ildə istifadəyə verilib. Binada əsasən Milli Elmlər Akademiyasının işçiləri və jurnalistlər yaşayıb.
Bina sökülən zaman onlara pilot layihə kimi tikilən binadan mənzil veriləcəyi söz verilsə də, tikinti işi yubanır.
Sakinlərin bildirdiyinə görə, binanın inşası “İnşaat Konstruksiyaları” MMC-yə tapşırılsa da, iş çox ləng gedir: “Problemlə bağlı aidiyyəti qurumlara şikayət məktubları ünvanlasaq da hamısı nəticəsiz qalıb. Bu başıbəlalı pilot layihəli bina altı ildir ki, hələ də tikilir. Halbuki, pilot binalar bir-iki ilə təhvil verilməlidir”.
Əhəd Hacıyev adlı sakin qeyd edir ki, əvvəllər binada 94 ailə yaşayıb. Onları köçürüblər ki, bina tikiləndən sonra mənzillə təmin olunacaqsınız: “Pulu vermişik, lakin binada tikinti işləri getmir. Elə adamlar var, evini satıb ki, kvadratına görə ev alsın. Artıq illərdir ki, kirayədə yaşayır. Bu altı il ərzində binada işlərin yalnız 50 faizi görülüb. Şirkət deyir ki, tikinti üçün pulumuz yoxdur. Bizi aldadırlar, yalandan vəd verirlər”.
Bina sakinləri məsələ ilə bağlı dəfələrlə Yasamal Rayon İcra Hakimiyyətinə müraciət etdiklərini deyirlər. Ancaq İcra Hakimiyyətindən onlara hər hansı bir cavabın verilmədiyi bildirilir.
- “Tikinti işləri ilə bağlı konkret vaxt demək olmur, Hava şəraitindən də asılıdır, qış yaxınlaşır, bina, güman ki…”
Məsələ ilə bağlı Yasamal Rayon İcra Hakimiyyətindən bildirildi ki, qurum bir neçə dəfə bina sakinləri və tikinti şirkətinin rəhbəri ilə görüş keçirib: “Görüşdə biz vəziyyəti araşdırdıq. Hazırda işlər gedir, proses sürətlənib. Tikinti işləri ilə bağlı konkret vaxt demək olmur. Hava şəraitindən də asılıdır, qış yaxınlaşır. Bina, güman ki, gələn il təhvil veriləcək”.
Günel CƏLİLOVA
