Son dövrlər bir çox paytaxt sakinləri Bakıda fəaliyyət göstərən tikinti şirkətlərinin əlindən dad çəkir ki, tikinti şirkətləri gecə ilə onlara məxsus yaşayış və qeyri-yaşayış sahələrini qanunsuz olaraq sökür, bununla da vətəndaşın mülkiyyət hüququnu pozurlar. Biz də bu qəbildən olan şikayətləri mütəmadi olaraq işıqlandırırıq.
Tanınmış alım, fəlsəfə elmləri doktoru, professor, BDU-nun kafedra müdiri Qoşqar Əliyev də bu cür qanunsuzluqlarla üzləşən paytaxt sakinlərindəndir. Tanınmış alim redaksiyamızla əlaqə saxlayaraq üzləşdiyi problem barədə danışdı. Q.Əliyevin verdiyi məlumata görə, noyabrın 18-dən 19-na keçən gecə Nəsimi rayonu Nəsibbəy Yusifbəyli 48 ünvanında vətəndaşa məxsus 150 kvadratmetrlik qeyri-yaşayış sahəsində söküntü işləri aparılıb. Tanınmış alim bildirdi ki, ona məxsus olan qeyri-yaşayış sahəsində söküntü işləri qeyri-qanuni olaraq aparılıb. Q. Əliyev deyir ki, ona məxsus qeyri-yaşayış sahəsinin arxa hissəsində söküntü işləri aparılır və tikilinin arxa hissəsinin divarı tamamilə dağılmış formadadır. Alimin qeyd etdiyinə görə, qapı və pəncərələr sındırılıb və söküntü qalıqları ətrafa səpələnib. Qoşqar Əliyev bildirdi ki, qeyri-yaşayış sahəsinin ərazisi 150 kvadratmetrdən çoxdur, amma onun təxminən 150 kvadratmetr sahəsinə zərər dəyib. Q.Əliyevin sözlərinə görə, qanunsuz söküntü noyabrın 18-dən 19-na keçən gecə baş verib və onlar söküntünü səhər saatlarında əraziyə gələndə görüblər: “Bizə səhər saat 9-da məlumat verdilər. Srağagün də giriş hissəyə zərər vurmuşdular. Dedilər ki, bərpa edəcəyik, dünən də yarısını bərpa etmişdilər. Bu gecə isə tikilinin pəncərələrini, qapısını, divarını uçurublar. Divar tamamilə dağıdılıb”. Tanınmış alim ona məxsus qeyri-yaşayış sahəsində söküntü aparan şirkətin adını da açıqladı. O vurğuladı ki, qanunsuz söküntü işləri “Marin Group” şirkətinin əməkdaşları tərəfindən aparılıb. “Sağ tərəfimizdə yaşayış binası tikirlər. 102-yə zəng vurmuşuq, polis gəlib. Ərizə ilə müraciət etmişik. Qarşı tərəf burada “reketlik” edir, heç nəyə məhəl qoymurlar. Konkret olaraq şirkətin mühafizəçiləri qoçu dəstələridir. Vətəndaşın evinə gələnlərə də mane olurlar. Qarşı tərəfdəki tikintinin sahibi Bahadur və Azad adında adamlardır, bir neçə dəfə bizimlə əlaqəyə çıxıblar. Buranı almaq istəyiblər. Biz də satmamışıq. Bura bizim qanuni mülkümüzdür. Çıxarışı da var. Dəymiş ziyan hələ ki, hesablanmayıb. Bəlkə də 10 min manatdan çox ziyan dəyib. Paylı mülkiyyətdir, qeyri-yaşayış sahəsidir, 3 nəfərin əlində “kupça”sı var. Xahiş edirik, aidiyyəti qurumlar səsimizə səs versin, məsələ araşdırılsın və ölçü götürülsün”.
Q.Əliyev bizimlə söhbətində bildirdi ki, əlaqədar qurumlar “Marin Group” şirkətinin qanunsuz əməllərinə qiymət verməli və zərərçəkənlərin pozulmuş hüquqlarını bərpa etməlidir.
Gördüyümüz kimi, zərərçəkmiş vətəndaş, tanınmış alim, elm xadimi “Marin Group” şirkətinin ona məxsus qeyri-yaşayış sahəsində həyata keçirdiyi qanunsuz, icazəsiz söküntüdən şikayət edir. Ümid edirik ki, əlaqədar qurumlar tərəfindən bu məsələyə çox cəld reaksiya veriləcək və vətəndaşın pozulan mülkiyyət hüququ bərpa ediləcək.
Əli TURABOV
