Bakı şəhərinin kanalizasiya sistemi ilə əhatə səviyyəsi müasir dünya standartlarından xeyli geri qalır. Xüsusilə paytaxtın ətrafında yerləşən qəsəbələrdə, onlara yaxın ərazilərdə salınan yeni yaşayış sahələrində kanalizasiya ən ciddi problemlərdən biridir. Yüz minlərlə evin tullantı suları həyətlərdə qazılmış quyulara axıdılır. Bu isə müxtəlif ərazilərdə qrunt sularının səviyyəsinin artmasına, torpağın aşınmasına səbəb olur.
Abşeron rayonu, Saray qəsəbəsi, “Üzümlük” yaşayış massivinin sakinləri kanalizasiya sularının hara gəldi axıdılmasından narazıdır. Sakinlərin sözlərinə görə, yay aylarında üfunət qoxusundan evlərin qapı-pəncərələrini açmaq müşkül məsələyə çevrilir. Onların bildirdiyinə görə, adıçəkilən yaşayış massivində kanalizasiya xətti ümumiyyətlə olmayıb.
Vətəndaşlar öz vəsaitləri hesabına evlərdən plastik boru vasitəsilə xətlər çəkib, çirkab suları isə hara gəldi axıdırlar. Bu da ərazidə antisanitar vəziyyətin yaranmasına səbəb olur. Sakinlər bildirir ki, problemin həll olunması ilə bağlı aidiyyatı qurumlara müraciət etsələr də, onlara heç bir cavab verilməyib.
“Baş planda hər bir yaşayış massivində hövzə prinsipi əsasında mərkəzləşmiş kanalizasiya kollektorları və təmizləyici qurğuların tikintisi öz əksini tapıb”
Məsələ ilə bağlı “Azərsu” ASC-nin mətbuat katibi Anar Cəbrayıllı bildirdi ki, həmin ərazidə “Azərsu”nun mərkəzləşmiş kanalizasiya sistemi mövcud deyil: “Ancaq bizim baş planda hər bir yaşayış massivində hövzə prinsipi əsasında mərkəzləşmiş kanalizasiya kollektorları və təmizləyici qurğuların tikintisi öz əksini tapıb. Qeyd edim ki, Saray qəsəbəsinin mərkəzi hissəsinə və Ceyranbatan ərazisinə kanalizasiya xətti çəkilir. Gələcəkdə həmin ərazilərdə kanalizasiya sisteminin qurulması məsələsinə də baxılacaq”.
Mövzu ilə bağlı Abşeron Rayon İcra Hakimiyyəti ilə əlaqə saxlamağa çalışdıq. Lakin qurumun məsul şəxsləri ilə danışmaq mümkün olmadı.
Günel CƏLİLOVA
