Bakıda fəaliyyət göstərən orta ümumtəhsil məktəblərində istilik problemi yaşanır. Həftəsonu yayılan məlumatlara görə, paytaxtda fəaliyyət göstərən 67 məktəbə hələ də istilik verilməyib. Məktəblərə istiliyin verilməməsi ciddi problemlərə səbəb olub. Hətta bir çox məktəblərdə sinif otaqları valideynlər tərəfindən alınan qızdırıcılarla qızdırılır. Əlbəttə, burada məktəb rəhbərliyini də günahlandırmaq olmaz, çünki məktəblərə gərək aidiyyəti qurumlar istilik versin ki, məktəbləri qızdırmaq mümkün olsun.
Bir tərəfdən havanın kəskin soyuması, başqa bir tərəfdən koronavirusun yayılması, üstəlik də, istiliyin verilməməsi həm valideynləri, həm də şagirdləri ciddi narahat edir.
Bakının 67 məktəbinə hansı səbəbdən hələ də istilik verilməyib?
“Bu problem tam olaraq nazirliyin diqqətindədir”
Mövzu ilə bağlı Təhsil Nazirliyinin İctimaiyyətlə əlaqələr sektorunun müdiri Cəsarət Valehovla əlaqə saxladıq. C.Valehov bildirdi ki, hazırda nazirliyin əsas işlərindən biri paytaxt məktəblərində istiliklə bağlı yaranan problemləri aradan qaldırmaqdır: “İstiliklə bağlı problem paytaxt məktəblərindədir. Bu problemin tezliklə və operativ şəkildə aradan qaldırılması nazirliyin tamamilə diqqətindədir. Biz bu problemin tezliklə həll olunması üçün çalışırıq. Bilirsiz ki, bununla bağlı Təhsil Nazirliyində operativ qərargah yaranıb. Biz hər gün məktəblərdə istiliklə bağlı monitorinq aparırıq, hansı məktəblərdə istilik problemi daxilidirsə, yerindəcə həll edirik, elə məsələlər də olur ki, digər aidiyyəti təşkilatlarla birgə problemi aradan qaldırırıq. Bu problem tam olaraq nazirliyin diqqətindədir və hazırda 67 yox, təxminən 40 məktəbdə istiliklə bağlı problem qalır və onların da istiliklə bağlı problemləri həll olunacaq. Dünənə qədər istilik verilməyən məktəblərin sayı 67 idi, indi təxminən 40 belə məktəb var” deyə C.Valehov bildirdi.
Qeyd edək ki, təhsil naziri Emin Əmrullayev noyabrın 20-də jurnalistlərə açıqlamasında məktəblərin istilik problemlərindən və onların həlli prosesindən danışıb: “Azərbaycanda təxminən məktəblərin 60 faizə yaxını istilik sistemi və qazla qızdırılır. Digər məktəblər isə odun və digər yanacaq növləri ilə qızdırılır. Həmin məktəblərə də yanacaq çatdırılıb”.
Nazirin sözlərinə görə, şəhər məktəblərində müxtəlif səbəbdən istilik problemləri var:“Dünən axşama olan məlumata görə, 60-a qədər məktəbdə istiliklə bağlı problemlər olub. Bəzi məktəblərin daxilində müəyyən problemlər olub, aradan qaldırılır. Bakıda 85-90 faiz məktəbdə istilik var. Digər məktəblərdə isə qarşıdakı həftələrdə aidiyyəti qurumlarla birgə problemlər aradan qaldırılacaq”.
İradə SARIYEVA
