“Ayrı-ayrı fənlərin tədrisi müəyyən mənada köhnəlmiş sistemdir”. Bunu Azərbaycan Uşaqlarının V Ümumrespublika forumunda çıxışı zamanı təhsil naziri Emin Əmrullayev deyib.
Nazir bildirib ki, ümumi təhsilin əsas məqsədi hər bir vətəndaşın önəmli bildiyi dəyərlərin aşılanmasına xidmət etməlidir: “Bunlara nümunə olaraq Vətən, torpaq anlayışlarının aşılanmasını göstərə bilərik. İstər dərs yükü, istərsə məzmunun mahiyyəti özündə elmi tədqiqatları ehtiva edən məsələdir. Ayrı-ayrı fənlərin tədrisi müəyyən mənada köhnəlmiş sistemdir. Layihə əsasında öyrənməyə keçməliyik. Müxtəlif layihələr çərçivəsində məqsədlərə çatmaq uşaqlara təqdim edə biləcəyimiz əsas məsələdir”.
Təhsil naziri qeyd edib ki, ayrı-ayrı fənlərin tədrisi müəyyən mənada köhnəlmiş sistemdir. Maraqlıdır, söhbət hansı fənlərdən gedir?
“Son 20 il ərzində dünya təhsil sistemi dəyişib, xüsusilə texniki və təbiət fənləri yenilənməlidir”
Məsələ ilə bağlı fikir bildirən təhsil eksperti Kamran Əsədov qeyd etdi ki, dünya təhsil sistemi artıq yenilənib: “Ənənəvi formatda tədrisin həyata keçirilməsi gələcək əmək bazarı üçün effektiv deyil. Hətta Finlandiya təhsil sistemi dünyada ən qabaqcıllar sırasındadır. Təhsilin qiymətləndirmə reytinqlərində bu ölkə ən prestijlilərin TOP-10 siyahısına daxildir. Lakin yerli dövlət başçıları bununla kifayətlənmir və məktəb sistemində əsl inqilab etməyi planlaşdırırlar. Belə ki, finlər gələcəkdə bütün dərs fənlərini ləğv etmək fikrinə gəliblər. Nə fizika olacaq, nə riyaziyyat, nə ədəbiyyat, nə tarix və nə də coğrafiya. Yəni məktəblərdə tədris köhnə dəbli yolla keçirilir. Bu sistem 90-ci illər üçün yaxşı idi, lakin ehtiyaclar indi dəyişib və biz XXI əsr üçün yeni bir şey kəşf etməliyik. Ayrıca, dərs fənləri yerinə fənlərarası formatda hadisələr öyrəniləcək. Məsələn, İkinci Dünya müharibəsi həm tarixi məzmunda, həm coğrafi, həm də riyazi tərəfdən tədqiq ediləcək. “Kafedə iş” kursunun təlimi zamanı isə şagirdlər ingilis dili, iqtisadiyyat və kommunikativ bacarıqlar haqda kompleks biliklər əldə edəcəklər. Bu sistem 16 yaşdan başlayaraq yuxarı sinif şagirdləri üçün nəzərdə tutulur. İdeyaya görə, məktəbli özü hansı hadisəni öyrənəcəyini seçir. Bu da onun gələcəkdə hansı yolu seçməyindən aslıdır. Beləliklə, yeniyetmə: “Bu mənə lazımdır?”, “Nə üçün mən bunu öyrənməliyəm?” kimi əbədi suallardan azad olacaq. Fin təhsil sistemi komandada işləməyi həvəsləndirir və buna görə də, dəyişikliklər müəllimlərin işinə də təsir göstərəcək. Helsinkinin 70% müəllimləri artıq yeni sistem üzrə informasiyanı çatdırmaq üçün təlim keçib. Bizdə də dəyişikliyə ehtiyac var. Belə ki, son 20 il ərzində dünya təhsil sistemi dəyişib. Xüsusilə texniki və təbiət fənləri yenilənməlidir”.
Günel CƏLİLOVA
