Milli Məclisin çərşənbə axşamı keçirilən iclasında deputatların xidməti avtomobillərinin yenilənməsi ilə bağlı təklif irəli sürülüb. Milli Məclisin İşlər müdiri Firudin Hacıyev “Milli Məclisin 2022-ci il üçün xərclər smetası haqqında” qanun layihəsinin müzakirəsi zamanı öz çıxışında yeni avtomobillərin alınması ilə bağlı 500 min manat ayrılmasına kömək göstərilməsini xahiş edib. Sözügedən təklif isə cəmiyyətdə müzakirələrə yol açıb.
Qeyd edək ki, millət vəkilləri bahalı, lüks, Qərb istehsalı olan avtomobillərə maraq göstərir. Halbuki, Azərbaycanın özünün istehsalı olan “NAZ Lifan” avtomobilləri var və deputatlara xidməti avtomobil qismində verilə bilər.
Mütəxəssislər təklif edir ki, millət vəkilləri xidməti maşın olaraq yerli istehsal olan “NAZ Lifan”dan istifadə etsin.
“Hansısa millət vəkili xidməti maşınının yenilənməsini istəyirsə, o şəxsə Qərb istehsalı olan bahalı minik vasitəsi deyil, yerli istehsal olan “NAZ Lifan” verilməlidir”
Sosial sahə üzrə ekspert İlqar Hüseynli bildirdi ki, millət vəkillərinə ayrılan xidməti avtomobillər olduqca bahalıdır və istismar müddətini başa vurmayıb: “Milli Məclisdə təmsil olunan bütün deputatların şəxsi avtomobilləri belə var. Onların özünün şəxsi nəqliyyat vasitəsi olduğu halda dövlətdən bahalı maşın tələb edirlər. Bunun bir adı da “görməmişlik”dir. Nəzərə almaq lazımdır ki, Azərbaycanın maliyyə dəstəyinə ehtiyacı var. Xüsusən də 44 günlük müharibə dönəmində itirdiklərimiz, qələbədən sonra şəhid və qazi ailələrinin sosial imkanlarının yaxşılaşdırılması istiqamətində atılan addımlar, işğaldan azad olunmuş ərazilərdə yenidənqurma və bərpa işləri ilə bağlı dövlət proqramlarının həyata keçirilməsi fonunda kifayət qədər böyük maliyyə vəsaiti lazımdır. Görünür, deputatlar gənc, savadlı uşaqlarımızın savaşda öz canlarını fəda etməsini unudublar. Odur ki, rahat həyat yaşasalar da, yeni nəqliyyat vasitəsi istəyirlər. Millət vəkillərinin kifayət qədər imkanları və biznesləri var. Həmçinin ezamiyyət, istirahət üçün dövlət tərəfindən bu və ya digər şəkildə vəsait alırlar. Deputatların şəxsi mənfəətləri üzərində qurulan təkliflərin reallaşdırılmasına qətiyyən icazə vermək olmaz”.
Həmsöhbətimiz hesab edir ki, hansısa millət vəkili xidməti maşınının yenilənməsini istəyirsə, o şəxsə Qərb istehsalı olan bahalı minik vasitəsi deyil, yerli istehsal ola “NAZ Lifan” verilməlidir.
Günel CƏLİLOVA
