Pandemiya ilə mübarizə dövründə xalqımızın birliyə, həmrəyliyə nail olması müşahidə edildi və bu diqqətçəkən nümunə həqiqətdən də cəmiyyətdə müsbət əks-səda yaratdı.
Koronavirus dönəmində Azərbaycan dövləti, Heydər Əliyev Fondu, ayrı-ayrı ictimai təşkilatlar, iş adamları, imkanlı vətəndaşlar tərəfindən qayğıya ehtiyacı olan şəxslərə xüsusi yardımlar edildi. Biz, demək olar ki, hər gün bu yardımlar haqqında məlumatlar alırıq. Amma təəssüflər olsun ki, sözügedən qurumlar tərəfindən ehtiyacı olan insanlara göndərilən yardımların bəzi yerli icra hakimiyyəti başçıları və məmurlar tərəfindən mənimsənilməsi faktı ortaya çıxıb. Onlar bu yardımları ehtiyacı olan təbəqəyə yönəltmək əvəzinə, onu özlərinin və qohum-əqrabalarının evlərinə daşıyıb yığıblar ki, sonra satıb pula çevirsinlər.
Prezident İlham Əliyev mayın 1-də Azərbaycan Respublikasının Baş prokuroru Kamran Əliyevi videoformatda qəbul edərkən bu məsələni də xüsusi qeyd edib: “Pandemiya ilə əlaqədar bu gün Azərbaycan dövləti bütün resursları səfərbər edib, ilk növbədə, vətəndaşları, onlara həyatını, sağlamlığını qorumaq üçün əlindən gələni edir. Operativ Qərargah, bütün aidiyyəti qurumlar gecə-gündüz işləyirlər. Hər gün bizim birinci və günün axırında sonuncu əsas işimiz bu məsələ ilə məşğul olmaqdır. Nə qədər adam xəstələndi, nə qədər adam sağaldı, neçə nəfər xəstəxanalara yerləşdirildi, onların vəziyyəti necədir, ağır vəziyyətdə olan vətəndaşların durumu, onların sağalma şansları necədir - biz gecə-gündüz bununla məşğul oluruq. Dövlət, ictimai təşkilatlar, ilk növbədə, Heydər Əliyev Fondu, ayrı-ayrı sahibkarlar, ayrı-ayrı imkanlı adamlar öz təşəbbüsləri ilə gedib kasıb insanlara əl tuturlar. Bu yardımı mənimsəməyə nə ad vermək olar?! Bu yaxınlarda Heydər Əliyev Fondu tərəfindən göndərilmiş ərzaq paylarını da aparıb öz qohumlarının evlərində saxlayırlar ki, sonra onları satsınlar. Biz buna gözmü yumacağıq? Belə adamlar ən ciddi cəzaya layiqdirlər.
İndi dünya liderlərinin bir çoxu qeyd edir ki, pandemiya müharibədir. Bəli, mən bu tezislə razıyam. Əgər indiki şəraitdə bunlar özlərini belə aparırlarsa, bundan daha ağır vəziyyət yaranarsa, onda bunlar nə edəcəklər? Bunun bir adı var – vicdansızlıq və xəyanət. Ona görə bundan sonra bu ünsürlərə qarşı mübarizə daha ciddi aparılmalıdır”.
Əhməd Abbasbəyli: “Heydər Əliyev Fondu və digər təşkilatlar tərəfindən sosial cəhətdən zəif insanlara göndərilən yardımları mənimsəyən icra başçıları...”
“Cəmiyyətin və Vətəndaş Münasibətlərinin İnkişafı” İctimai Birliyinin sədri, tanınmış sosioloq Əhməd Abbasbəyli baki-xeber.com-a bildirdi ki, Prezident İlham Əliyevin çıxışını əvvəldən sona qədər dinləyib. Ə.Abbasbəylinin sözlərinə görə, Prezidentin bu çıxışında səsləndirilən fikirlərin hamısı cəmiyyəti ciddi narahat edən məsələlərə aiddir. “Prezidentin bu çıxışını əvvəldən axıra qədər dinlədim və çox emosional, eyni zamanda da çox səmimi bir çıxış idi. Hesab edirəm ki, icra başçılarının, eləcə də ayrı-ayrı vəzifəli şəxslərin işlərində hansısa qüsurlar ola bilər, amma onların bu cür cinayətlərə əl atmasına ad vermək çətindir. Kasıbların, sosial cəhətdən zəif olan insanların haqqını yemək üçün gərək çox aşağı düşüncəli biri olasan. Görün bu məmurlar nə qədər acgöz, nə qədər vicdansız və nankordurlar ki, yardım üçün ayrılan pulu, eləcə də ərzaq məhsullarını da mənimsəyirlər. Onsuz da icra başçılarının, eləcə də başqa məmurların saysız obyekti, gəlir yerləri var. Bu, qanundankənar haldır. Bu məmurlar bir çörəyə ehtiyacı olan insanın çörəyinə əl uzatmaqla böyük cinayət törətmiş olurlar. Dövlətimizin, xalqımızın pandemiya ilə mübarizə apardığı bu ağır günlərdə dövlətlə yanaşı, vətəndaşlar da bütün güclərini səfərbər edirlər. Bu gün az-çox imkanı olan şəxslər imkansız adamlara dəstək olurlar. Bütün cəmiyyətin dövlətlə həmrəylik göstərib kasıb təbəqəyə yardımlar etdiyi bir vəziyyətdə bəzi icra başçılarının, məmurların bu yardımları mənimsəməsi bağışlanması mümkün olmayan məsələdir. Cənab Prezident də bildirdi ki, belələrinə qarşı amansız davranılacaq və onlar törətdikləri cinayət əməllərinə görə qanun qarşısında cavab verəcəklər”.
Ə.Abbasbəyli bildirdi ki, icra başçıları, məmurlar özləri camaata yardım etmirlərsə etməsinlər, amma Heydər Əliyev Fondunun, eləcə də digər qurumların, ayrı-ayrı şəxslərin kasıblara ayırdığı yardımları mənimsəməsinlər. Rayon icra hakimiyyətlərinin vəzifəsi rüşvət yığmaq, dövlət əmlakını talamaq, vətəndaşların cibinə girmək, onlara ayrılan sosial yardımları mənimsəmək olmadığını deyən Ə.Abbasbəyli qeyd etdi ki, onlar camaatın problemləri ilə məşğul olmalı, insanların məmnunluğunu təmin etməlidirlər. Ə.Abbasbəylinin sözlərinə görə, indiyə qədər sosial yardımları mənimsədikləri üçün bir neçə məmur və icra başçısının vəzifəsindən azad edilərək cinayət məsuliyyətinə cəlb edilməsi başqalarına dərs olmalı idi, amma olmayıb. “Hesab edirəm ki, pandemiya dövründə Heydər Əliyev Fondu və digər təşkilatlar tərəfindən sosial cəhətdən zəif insanlara göndərilən yardımları mənimsəyən icra başçıları bununla xalqımıza qarşı mənəvi genosid törədiblər. Çünki bu ağır dövrdə imkansız insanların əlindən çörəyinin alınması mənəvi genosiddir. Buna başqa ad verə bilmirəm. Prezidentin çıxışı cəmiyyətə bir siqnal idi. Hesab edirəm ki, bundan sonra bu kimi əməllər törədənlərə qarşı daha ağır cəzalar tətbiq ediləcək” - deyə Ə.Abbasbəyli bildirdi.
Əhməd Qəşəmoğlu: “Kasıb insanların ruzisinə göz dikən, onlara ayrılan yardımları mənimsəyən şəxslərlə bağlı daha sərt tədbirlər görülməlidir”
Digər tanınmış sosioloq, professor Əhməd Qəşəmoğlu da bizimlə söhbətində yardımları mənimsəyən məmurların həm o vəzifəyə layiq olmadığını, həm də kifayət qədər insanlıq prinsiplərindən uzaq olduğunu qeyd etdi: “Bəzi dövlət məmurlarının, vəzifəli insanların, xüsusən də icra başçılarının bu kimi cinayətlər törətməsi halları mövcuddur. Bunu cənab Prezident də vurğuladı. Bu insanların çoxu heç o vəzifəyə layiq adam deyil, ona görə də onların səlahiyyətlərindən sui-istifadə edərək yardımlara əl qoyması, onları müxtəlif yerlərdə gizlətməsi, qohumlarına verməsi və s. mənə təəccüblü gəlmədi. Çünki bu adamlar dövlət vəzifəsinə layiq adamlar olmayıblar. Açıq görsənən budur ki, onları xalqın və dövlətin maraqları düşündürmür. Götürək elə Biləsuvarın həbs edilən icra hakimiyyəti başçısını. Bu adam kafedə kababçı işləyib, 40 yaşında pul gücünə diplom alıb və bəzi məmurlar tərəfindən irəli çəkilib, nəhayət, icra başçısı olub. Belə adamı pul qazanmaqdan, haram tikə yeməkdən başqa heç nə maraqlandırmır. Fikrimcə, kasıb insanların ruzisinə göz dikən, onlara ayrılan yardımları mənimsəyən şəxslərlə bağlı daha sərt tədbirlər görülməlidir. Düşünürəm ki, son dövrlər yardımların mənimsənilməsi ilə bağlı cinayət məsuliyyətinə cəlb edilən insanlar həm də törətdikləri mənəvi cinayətə görə cavab verməlidirlər”.
Ə.Qəşəmoğlu hesab edir ki, belə şəxslərin cinayət məsuliyyətinə cəlb edilməsi, onların əməllərinin ifşa edilərək cəmiyyətə çatdırılması başqaları üçün də dərs olmalıdır.
İradə SARIYEVA
