Məlum olduğu kimi, yeni növ koronavirus (COVID-19) infeksiyası ilə bağlı Azərbaycandakı mövcud sanitar-epidemioloji vəziyyət, digər dövlətlərdə tətbiq olunan preventiv tədbirlər, eləcə də Ümumdünya Səhiyyə Təşkilatının tövsiyələri təhlil edilərək xüsusi karantin rejiminin müddəti 31 may 2020-ci il saat 00:00-dək uzadılıb.
Nazirlər Kabineti yanında Operativ Qərargahdan verilən məlumata görə, eyni zamanda, əhali arasında virusa yoluxma sürəti, xəstələrin sağalma dinamikası nəzərə alınaraq, tətbiq edilən bir sıra məhdudiyyətlərin yumşaldılmasına dair qərar verilib. Məhdudiyyətlərin yumşaldılması mövcud sanitar-epidemioloji vəziyyət, xəstə sayı və yoluxma sürəti əsas götürülərək Bakı, Sumqayıt, Gəncə, Lənkəran şəhərləri, Abşeron rayonu və digər regionlar üzrə mərhələ ilə həyata keçirilir. Xüsusi karantin rejimində respublika üzrə ictimai yerlərdə, bulvarlarda və parklarda, eyni zamanda, ictimai iaşə obyektlərində bir yerdə insanların 10 nəfərdən artıq qruplarda cəmləşməsi qadağandır.
O da məlum olub ki, COVID-19 virusu ilə bağlı ölkədəki sanitar-epidemioloji vəziyyət mütəmadi təhlil edilərək müvafiq qaydalar tətbiq olunur. Bu səbəbdən COVID-19 virusuna yoluxma dinamikası və xəstəliklə bağlı ölkədəki vəziyyət zərurət yaradarsa, xüsusi karantin rejiminin yenidən sərtləşdirilməsi mümkündür.
Bütün bu deyilənlərin fonunda, karantin rejiminin uzadılmasına nə dərəcədə ehtiyac var idi? Bunun hansı faydası olacaq?
Məsələyə münasibət bildirən şərqşünas Seyid Camal Əzimbəylinin fikrincə, karantin rejiminin uzadılması müəyyən zərurətdən irəli gəlir: “Nəzərə almaq lazımdır ki, koronavirus təhlükəsi aradan qalxmayıb. Bir sıra ölkələrdə COVID-19 virusu çox acı nəticələrə yol açır. Azərbaycan dövləti koronavirusdan qorunmaq üçün bütün lazımi tədbirləri görür. Nəticədə ölkəmizdə virusa yoluxanların sayı çox azdır. Ancaq bu, o demək deyil ki, ölkəmizdə virusun yoluxma təhlükəsi aradan qalxıb və bu səbəbdən karantin rejimi dayandırılmalıdır. Təbii ki, məsələyə bu cür yanaşmaq doğru olmaz. Amerika Birləşmiş Ştatları, Avropanın inkişaf etmiş dövlətləri və digər ölkələr pandemiyadan ciddi əziyyət çəkirlər. Bunlardan nəticə çıxarmaq lazımdır. Karantin rejimi uzadılmasaydı, o zaman virusa yoluxanların sayı sürətlə artacaqdı. Ona görə də belə bir qərarın verilməsi doğru addımdır. Hesab edirəm ki, Azərbaycan dövləti xalqın sağlamlığını qorumaqdan ötrü bu addımı atdı”.
Vidadi ORDAHALLI
