Koronavirusla əlaqədar olaraq Qazaxıstan rəsmən Azərbaycanın icazə sisteminin tətbiq edilməsinə qərar verdi. Belə ki, Qazaxıstan Respublikasının Türküstan vilayəti Azərbaycanın “Xüsusi Karantin Rejimində İcazələrin Alınması və Monitorinqi Sistemi” təcrübəsi əsasında vətəndaşlarının hərəkəti üçün onlayn qeydiyyat sistemini hazırlayıb.
Məlumata görə, yeni sistem vətəndaşlara ərzaq və digər gündəlik tələbat mallarının, habelə dərman vasitələrinin alınması, təxirəsalınmaz tibbi zərurət, eyni zamanda, evlərini tərk edərkən və ya işə gedərkən onlayn qaydada icazə almağa kömək edəcək. Azərbaycanda tətbiq olunan müvafiq sistem barədə Astana Dövlət Xidmətləri Mərkəzinin 42 ölkənin iştirak etdiyi onlayn platformasında məlumat paylaşılıb. Müvafiq platformada Azərbaycan təcrübəsindən başqa, Yunanıstan və Birləşmiş Ərəb Əmirliklərində karantin rejimində tətbiq olunan onlayn sistemlər barədə də məlumat verilib. Qazaxıstanın Türküstan vilayəti isə məhz Azərbaycan təcrübəsi əsasında müvafiq sistemi ərsəyə gətirib.
Bu barədə BMT-nin İnkişaf Proqramının Astana Dövlət Xidməti Mərkəzi (Astana Civil Service Hub) veb-səhifəsində və Qazaxıstanın digər yerli xəbər portallarında məlumat dərc olunub.
Onu da qeyd edək ki, “Xüsusi Karantin Rejimində İcazələrin Alınması və Monitorinqi Sistemi" Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan Elektron Hökumətin İnkişafı Mərkəzi və Daxili İşlər Nazirliyi tərəfindən ərsəyə gətirilib.
Qazaxıstandan başqa, digər ölkələr də Azərbaycanın icazə sisteminə maraq göstərirlər. Görünən odur ki, Azərbaycanın koronavirusla mübarizə modeli beynəlxalq təcrübə modeli kimi artıq bir sıra ölkələr tərəfindən qəbul olunur. O baxımdan bunun əhəmiyyətini ekspertlər necə dəyərləndirirlər?
“…biz bundan sonra belə nümunələrin sayını çox eşidəcəyik”
Məsələyə münasibət bildirən millət vəkili Aydın Mirzəzadənin sözlərinə görə, Azərbaycanın tətbiq etdiyi model çox uğurlu şəkildə özünü doğrultduğu üçün, digər ölkələr də buna xüsusi maraq göstərirlər: “O baxımdan, Qazaxıstanın belə bir qərar verməsi təsadüfi deyil. Ümumdünya Səhiyyə Təşkilatı Azərbaycanın koronavirusla mübarizəni çox effektiv şəkildə apardığını bildirib. Bunun nəticəsidir ki, hər bir milyon nəfərə düşən koronavirus xəstəsinin sayına görə Azərbaycan çox əlverişli yerlərdədir. Bununla yanaşı, sağalanların sayı sürətlə artır. Ümumdünya statistikasına görə, sağalanların sayı 30 faizdirsə, Azərbaycanda virusa yoluxanların 80 faizi sağalıb. Həmçinin, virusdan ölənlərin sayına görə Azərbaycan daha yaxşı vəziyyətdədir. Dünyada bu, 10 faizdirsə, Azərbaycanda bu rəqəm 1 faizdən bir az çoxdur. Azərbaycanın vaxtında sərhədləri bağlaması, karantin rejiminin tətbiq edilməsi, əhalinin özünü izolyasiyası üçün müvafiq şəraitin yaradılması və digər tədbirlər öz nəticəsini verdi. Yəni bütün bunların özü onu göstərir ki, Azərbaycan müasir dövlət quruculuğunda qarşısına çıxan məsələlərin həllində novatorluq edir. Eyni zamanda, digər dövlətlərlə bunu bölüşməyə hazırdır. O baxımdan hesab edirəm ki, biz bundan sonra belə nümunələrin sayını çox eşidəcəyik”.
Vidadi ORDAHALLI
