Rusiya Federasiyasının baş naziri Mixail Mişustin koronavirusa yoluxduğunu açıqlayıb. Koronavirusa yoluxan Rusiya Federasiyasının baş naziri Mixail Mişustin sonuncu dəfə martın 24-də ölkə prezidenti Vladimir Putinlə şəxsən görüşüb.
Rusiya KİV-nin məlumatına görə, dövlət başçısı, baş nazir və baş nazirin birinci müavini Andrey Belousov iqtisadi məsələlərə dair iclasda görüşüblər. Daha əvvəl Mişustinin iş yerindəki təmas dairəsi müəyyən edilib. Baş nazirin ofisinə daxil olmaq üçün icazə yalnız protokol işçilərinə və videobağlantının keyfiyyətini yoxlayan mütəxəssislərə verilib. Mixail Mişustin koronavirusa yoluxmasını Rusiya prezidenti Vladimir Putinə videobağlantı vasitəsilə bildirib.
Qeyd edək ki, pandemiya dönəmində dünyanın bir çox ölkələrinin rəhbər şəxsləri arasında koronavirusa yoluxma halları olub. Bunu rəsmən təsdiq də ediblər. Ancaq bu istiqamətdə də Azərbaycanda fərqli bir mənzərə yaranır. İndiyə qədər ölkəmizdə hər hansı bir yüksək vəzifəli şəxsin koronavirusa yoluxması faktına rast gəlinməyib. Bunun səbəbi nə ilə bağlıdır?
Uzun müddət dövlət qulluğunda rəhbər vəzifələrdə çalışmış, “Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, bəzi ölkələrin yüksək çinli məmurlarının koronavirusa yoluxması ilə bağlı məlumatlar onun da nəzərindən qaçmayıb:“Hətta bəzi ölkələrin səhiyyə nazirləri belə bu virusa yoluxdu. Mənə elə gəlir ki, bunun bir sıra səbəbləri var. İlkin dönəmdə həmin ölkələrin rəsmiləri virusa o qədər də ciddi yanaşmırdılar. Düşünürdülər ki, bunun sürətlə yayılması mümkün deyil. Ancaq unutmaq lazım deyil ki, xəstəlikdən heç kim sığortalanmayıb. Pandemiyanın kütlə arasında yayılması halı ümumi statistikada öz əksini tapır. Ancaq tanınmış şəxslər və məmurlar arasında belə halın olması xüsusi olaraq ayrıca informasiya kimi vurğulanır. Ad çəkmək istəmirəm, ancaq br çox ölkələrdə virus tanınmış insanlar arasında daha geniş yayıldı. Bu hal eyni zamanda cəmiyyət üçün bir siqnal oldu ki, kimsə pandemiyadan sosial statusuna görə sığortalanmayıb. Hesab edirəm ki, Azərbaycanın yuxarı eşelon məmur kontingenti arasında virusun yayılmaması həmin seqmentdə olan ciddi nizam-intizamla bağlıdır. Bunun digər səbəbi isə ölkəmizin vaxtında pandemiya ilə bağlı tədbirləri görməsi ilə əlaqəlidir. Eyni zamanda, ölkəmizdə aparılan maarifləndirmə işinin yüksək səviyyədə olması da məsələyə təsirsiz ötüşməyib. Bir daha görürük ki, bizim yüksək məmurlarımız arasında da qanuna tabeçilik arzuolunan səviyyədədir. Siz bu müddət ərzində, yəqin ki, ölkə başçısının cəmiyyətdə olan davranışlarına fikir verdiniz. Prezidentin keçirdiyi bütün görüşlərdə, açılışlarda karantinin normaları gözlənirdi. Hətta cənab Prezident bir neçə görüşünü belə videkonfrans formatında etdi. Bizim cəmiyyətin bütün təbəqələri Prezidentin çağırışına qoşuldu və birlik nümayiş etdirə bildi. Biz bunun işartılarını yaradılan dəstək fonduna köçürülən vəsaitlərdə və əhali arasındakı yardımlaşmada görə bildik. Birlik və qanunlara olan sayğı bu vəziyyəti yaratdı. Ümid edirəm ki, bu virus, nəinki yüksək vəzifəli insanlarımız arasında yayılmayacaq, həm də sadə əhali arasında yayılmasına son qoyulacaq. Bütün bunlara baxmayaraq, biz ehtiyatımızı əldən verməməliyik. Epidemiyaya tam son qoyulması üçün hamılıqla məsuliyyətli olmalıyıq”.
Məhəmmədəli QƏRİBLİ
