Pandemiya ilə mübarizə tədbirləri çərçivəsində həyata keçirilən əhəmiyyətli işlərdən biri də 65 yaşdan yuxarı olan şəxslərin sosial izolyasiya qaydalarına əməl etməsi ilə bağlı məsələ idi.
Bildiyimiz kimi, Azərbaycan ərazisində koronavirus təhlükəsi ilə bağlı 65 yaşdan yuxarı şəxslərin evdən bayıra çıxması qadağan edilib. Ölkəmizdə özünütəcrid, "Evdə qal!" kampaniyası davam etdirilməli olduğu halda, yaşı 65-dən artıq olan bəzi vətəndaşlar xüsusi karantin rejiminin yumşaldılması ilə əlaqədar olaraq qaydalara əməl etmək istəmirlər. Baxmayaraq ki, hələ onlarla bağlı bu qadağa qüvvədədir, onlar yenə də küçədə, mağazada, ictimai nəqliyyatda görünməyə başlayıblar. Məlum olduğu kimi, yumşalma prosesinin 65 yaşdan yuxarı olan şəxslərə aidiyyəti yoxdur. Onlar sosial təcrid qaydalarına əməl edərək evdə qalmalı və bayıra çıxmamalıdırlar. Yaşı 65-dən yuxarı olan insanların virusa yoluxma risqinin böyük olması ilə bağlı təhlükəni nəzərə alaraq, dövlətin belə bir qərar qəbul etməsi müsbət haldır.
“Vətəndaşlar tərəfindən yol verilən məsuliyyətsiz davranışlar qəbuledilməzdir”
“Xalq cəbhəsi” qəzetinin baş redaktoru, tanınmış politoloq Elçin Mirzəbəyli bizimlə söhbətində yaşlı nəslin xüsusi karantin rejiminin yumşaldılmasından sui-istifadə etməməli olduğunu, onların evdən çölə çıxmamalarını bildirdi. “Xüsusi karantin rejimi ilə bağlı tətbiq olunan məhdudiyyətlərin yumşaldılması, əslində, vətəndaşların üzərinə daha böyük məsuliyyət qoyur. Çünki bu halda karantin rejimi insanın öz düşüncəsində olmalıdır. Yəni artıq bu prosesdə hakim rolu vicdan oynayır. Bu aspektdən də hər bir insan, hər bir vətəndaş başqalarının da teleyini düşünməli, istəmədən belə böyük insan faciələrinə səbəb olan hala yol verməməlidir. Xüsusi karantin rejiminin yaratdığı bir sıra faktorlar, psixoloji amillər də var. Şübhəsiz ki, insanların uzun müddət qapalı bir şəraitdə qalması onların psixikasına təsir göstərir. Təbii ki, onlar hava almağa çalışırlar və müəyyən qədər də olsa həmin psixoloji durumdan xilas olmağa çalışırlar. Əslində, bu, anlaşılması mümkün olan məsələdir. Lakin situasiya ondan ibarətdir ki, belə davranışlar, ilk növbədə, yaşı 65-dən yuxarı olan insanların öz həyatları üçün təhlükə yaradır. Yəni nə qədər çətin olsa da belə, indiki şəraitdə dözməkdən, səbr etməkdən, həmçinin, öz həyatını və başqalarının həyatını qorumağa çalışmaqdan başqa seçim yoxdur. Bu vəziyyət, bu problem qlobal dünyanın qarşılaşdığı bir situasiyadır. Yəni bu, təkcə bir ölkənin sərhədləri çərçivəsində, yaxud bir ölkənin idarəçilərinin istək və arzularına uyğun olaraq həyata keçirilən proses deyil”.
E.Mirzəbəylinin sözlərinə görə, Azərbaycan dövləti vətəndaşın sağlamlığını, həyati təhlükəsizliyini qorumaq üçün bütün mümkün vasitələrdən istifadə edir. Müsahibimiz vurğuladı ki, bu istiqamətdə həyata keçirilən qlobal tədbirlər göz önündədir. “Belə bir şəraitdə indiyə qədər görülən işlərin faktiki olaraq boşa verilməsi istiqamətində vətəndaşlar tərəfindən məsuliyyətsiz davranışlar qəbuledilməzdir. Yəni nə qədər çətin olsa da belə, müəyyən zaman kəsiyində insanlar səbr etməli, təhlükənin tam aradan qaldırılması üçün müvafiq dövlət qurumlarına, bu istiqamətdə yorulmaz fəaliyyət göstərən insanlara dəstək göstərməlidirlər. Bu vaxtı biz həm özümüz üçün, həm də bizim həyatımızı qoruyan insanlar üçün qənaət bilməliyik, səbrli olmalıyıq” - deyə E.Mirzəbəyli qeyd etdi.
İradə SARIYEVA
