Dünyanı vahiməyə salan yeni növ koronavirus (COVID-19) infeksiyası getdikcə daha çox ölkəni əhatə edir, insanlar arasında yoluxma və ölüm halları artır. Məhz bu səbəbdəndir ki, Ümumdünya Səhiyyə Təşkilatı koronavirusu bütün dünyada pandemiya elan edib. Pandemiya ölkə daxilində, qonşu dövlətlərin ərazilərində və bəzən dünyanın bir çox ölkəsində yoluxucu xəstəliyin yayılması ilə səciyyələnən qeyri-adi güclü epidemiyadır.
Azərbaycan koronavirusun yayılmasının qarşısını almaq üçün digər qabaqlayıcı addımlar da atır. Bütün ölkə boyu dezinfeksiya işləri aparılır. Yaşayış binaları, iaşə obyektləri, müəssisə və idarələr, həyət və yaşayış məhəllələri, həmçinin, digər yerlərdə tibbi-profilaktik və dezinfeksiyaedici tədbirlər görülür. Bundan başqa, paytaxtda küçə və prospektlər, yol kənarlarındakı məhəccərlər və s. də dezinfeksiyaedici maddələrlə yuyulur.
Faktdır ki, karonavirus (COVID-19) infeksiyası ilə mübarizə tədbirlərində iştirak edən tibb işçilərinin rolu danılmazdır. Onların sosial müdafiəsinin gücləndirilməsi haqqında ölkə başçısı sərəncam imzalayıb. Adıçəkilən virusla mübarizə tədbirində iştirak edən tibb işçilərinin əməkhaqqı 3-5 dəfəyədək artırılıb.
Postpandemiya dövründə xaricdə yaşayan azərbaycanlı həkimlərin Azərbaycana dəvət olunması gündəmdədir. Ancaq Rusiyada tibb təhsili alanlar ölkəmizdə işləyə bilmirlər.
Bu məsələ ilə bağlı bu günlərdə millət vəkili Azay Quliyev Milli Məclisdə Rusiyanın tibb universitetlərində baza və 2 illik ordinatura təhsili almış Azərbaycan vətəndaşlarına verilən “mütəxəssis sertifikatının” Səhiyyə Nazirliyi tərəfindən tanınmaması ilə bağlı məsələyə toxunub. Bununla bağlı Nazirlər Kabinetinin mövcud qərarında dəyişikliyə ehtiyac olduğunu bildirib.
Maraqlıdır, Rusiyada tibb üzrə təhsil alanların ölkədə diplomları niyə tanınmır? Həmin ölkədə tibb ixtisası üzrə təhsil alanlar ölkəmizdə həkim kimi niyə çalışa bilmirlər?
“…artıq Rusiya ilə Azərbaycanın tibb təhsilinin strukturunda fərqlər yaranıb”
Professor, tibbi ekspert Adil Qeybulla qeyd etdi ki, Azərbaycan Təhsil Nazirliyinin reyestrində diplomları tanınan ali məktəblərin siyahısı var. Orada Rusiyanın, keçmiş sovetlər məkanının bəzi ali məktəblərinin adı var, bəziləri yoxdur. Sovet dövründə prestijli olan, məsələn, Moskva Dövlət Universiteti, Seçenev adına Tibb Universiteti və digər bu qəbildən olan nüfuzlu məktəblərin diplomları birmənalı tanınır. Tələbələrin həmin ali məktəblərə getdikləri, təhsil aldıqları yoxlanır. Məlumatlar doğrudursa, problem olmur: “Ancaq elə ali məktəblər var ki, onlar SSRİ dağılanda yaranıb. Onlara etibarlılıq məsələsi var. Ona görə də həmin ali məktəblərin diplomlarının tanınması sual altındadır. Akkreditasiya və Nostrafikasiya İdarəsi həmin sənədləri araşdırır. Ali məktəb həmin reyestrdə varsa, tələbənin orada dərsə getməsindən başlamaqla diplom almasına qədər bütün mərhələlər yoxlanır və diplomun tanınması təmin olunur. Mən bu sistemin əvvəlkindən daha şəffaf olduğunu hesab edirəm. Sənədlər ancaq elektron yolla qəbul olunur. Prosesə nazirlik səviyyəsində nəzarət edilir".
Həmsöhbətimiz onu da əlavə etdi ki, elə adamlar var ki, heç tanınmayan, etibarlılığı az olan bir məktəbə gediblər: "Bəlkə tələbə heç o ölkəyə getməyib. Belə diplomlar necə tanına bilər? Söhbət həkimlikdən, baza tibb təhsilindən gedirsə, biz artıq rezidenturaya keçmişik. Rezidentura Qərb təhsili sistemidir və bu, baza tibb təhsilindən sonra tibb təhsilinin ən yüksək mərhələsi sayılır. Bu müddətdə artıq Rusiya ilə Azərbaycanın tibb təhsilinin strukturunda fərqlər yaranıb. Ona görə də oradakı ordinatura burada iş üçün əsas sayılmır. İnternatura, subernatura diplomları artıq tanınmır. Çünki, dediyim kimi, biz Qərb təbabətinin sisteminə keçmişik”.
Günel CƏLİLOVA
