Məlum olduğu kimi, ölkə üzrə 2020-ci il 27 aprel saat 00:00-dan etibarən məhdudiyyətlərin bir qismi yumşaldılıb. Bu da xüsusi karantin rejiminin yumşaldılması ilə əlaqədar əhalidə təhlükənin sovuşduğu təəssüratı yaradır. Karantin rejimindəki məhdudiyyətlərin bəziləri aradan qaldırıldığı üçün əhali arasında virusa yoluxma istiqamətində artım ola və prosesin ikinci dalğası başlaya bilər.
Qeyd edək ki, Nazirlər Kabineti yanında Operativ Qərargah tərəfindən karantin rejiminin yumşaldılması ilə əlaqədar qərar verildikdə əksər mütəxəssis bildirdi ki, bu, vətəndaşları arxayın salmamalıdır. Bəzi sahələrdə çalışan insanların fəaliyyətinə icazə verilməsi nəticəsində vətəndaşlar sui-istifadə hallarına yol verərsə, ölkəmizdə virusun ikinci dalğası başlana bilər. Odur ki, mütəxəssislər əhalinin bütün qaydalara əməl etməsini vacib sayırlar və yumşaldılma prosesindən sui-istifadə hallarına yol verməməyi tövsiyə edirlər.
Aprelin 27-dən bu yana əhali arasında xeyli arxayınlaşma hiss olunmaqdadır. 27 aprel tarixinə qədər sosial izolyasiyaya ciddi önəm verən, avtobusda, supermarketlərdə sosial məsafə saxlayan vətəndaşlarımızın xeyli hissəsi özünü sanki virus təhlükəsindən sığortalanmış kimi aparır. Bu onların davranışlarında müşahidə edilir.
“Təəssüflər olsun ki, müşahidələr Azərbaycan vətəndaşlarının bu yumşalmanı düzgün anlamadığını göstərir”
Siyasi icmalçı Azər Həsrət “Bakı-Xəbər”ə bildirdi ki, vətəndaşların xüsusi karantin qaydalarının yumşaldılmasından sui-istifadə etməsi qətiyyən doğru deyil. O hesab edir ki, bütün vətəndaşlar qanunun tələblərinə əməl etməsə, biz yenidən virus təhlükəsi ilə üz-üzə qala bilərik. “Əlbəttə, Azərbaycanda dövlətin üzərinə düşən vəzifələr var və həmin vəzifələr bu günə qədər çox yüksək səviyyədə həyata keçirilir. Karantin qaydalarının tətbiq olunması, sosial təcrid, vətəndaşların sosial-iqtisadi problemlərinin həlli, ümumiyyətlə, insanların sağlamlığının keşiyində durmaq kimi məsələlər çox yüksək şəkildə öz həllini tapıb. Vətəndaşlardan da tələb olunan odur ki, bu qaydalar çərçivəsində yaşayaq, işləyək, hərəkət edək. Ona görə də dövlət çalışır ki, həm də insanların sərbəst, rahat hərəkət etməsi üçün də şərait yaratsın. Bu baxımdan, xüsusi karantin rejiminin müəyyən qədər yumşaldılması üçün ilkin addımlar atılıb. Amma təəssüflər olsun ki, müşahidələr Azərbaycan vətəndaşlarının bu yumşalmanı düzgün anlamadığını göstərir. Yəni, təbii ki, söhbət bütün vətəndaşlardan getmir, bəlli bir kəsimdən gedir. İnsanlar bu prosesə məsuliyyətsiz yanaşırlar. Hətta mən özüm də zəruri ehtiyaclar üçün evdən çölə çıxanda bu problemi yaxından izləməli oluram. Müşahidə edirəm ki, vətəndaşların çoxu artıq maska taxmır, ümumiyyətlə, maskaya diqqət yetirmirlər. Digər tərəfdən, bəzən insanların topa-topa küçələrdə gəzdiyini görürük. Hətta onlar sosial məsafə qaydalarına əməl etməyərək, bir-birilə çox yaxın məsafədə dayanırlar. Biz bunu daha çox supermarketlərdə müşahidə edirik. Vətəndaşların karantin rejiminin müəyyən qədər yumşaldılmasından sui-istifadə etməsi ciddi fəsadlara gətirib çıxara bilər. Ona görə də hesab edirəm ki, biz koronavirusun ikinci dalğasının yaşanmasını, karantinin daha uzunmüddətli olmasını istəmiriksə, yumşaldılma prosesindən sui-istifadə etməməli, qaydalara ciddi riayət etməliyik. Yəni sosial məsafə saxlamaq, sosial təcridə üstünlük vermək, zərurət olmadan küçəyə çıxmamaq kimi məsələlərdə diqqətli olmalıyıq. Əks təqdirdə yoluxma halları arta bilər. Son günlər, fikir verirsinizsə, ciddi şəkildə eniş var idi, amma yenidən yoluxma rəqəmi artmağa başlayıb. Üstəlik, biz nəzərə almalıyıq ki, dünyanın bir çox ölkəsində bu yoluxma yüz minlərlə insanı əhatə edir, yeni-yeni ölkələr bu “estafet”i qəbul etməkdədirlər. Yəni başqa ölkələrdə də yoluxma halları get-gedə artır. Hətta qonşu Rusiyada hər gün 5-6 min insanın bu virusa yoluxması haqqında məlumatlar alırıq”.
A.Həsrət, həmçinin, Gürcüstan, Ukrayna, Ermənistan və digər ölkələrdə yoluxma hallarının artdığını vurğulayaraq qeyd edir ki, bu ölkələrdə baş verənlər məsuliyyətsizliyin və vaxtında tədbirlər görülməməsinin nəticəsidir. Azərbaycan dövlətinin isə bu problemə məsuliyyətlə yanaşaraq vaxtında tədbirlər gördüyünü deyən A.Həsrət hesab edir ki, bu gün vətəndaşın üzərinə çox böyük məsuliyyət düşür. Təəssüflər olsun ki, insanların məsuliyyət yükünü paylaşmağa o qədər də meylli olmadığını deyən siyasi icmalçının sözlərinə görə, bu da mənfi nəticələrə səbəb ola bilər: “Biz vətəndaş olaraq öz məsuliyyətimizi anlamasaq, yoluxma halları çoxalacaq və bu da öz arxasınca ölüm hallarını gətirəcək, eyni zamanda, karantin rejiminin uzadılması, hətta bəlli bir mərhələdən sonra fövqəladə rejimin elan edilməsinə gətirib çıxaracaq. Yəni buna səbəb olacaq. Ona görə də insanlarımız bir qədər də səbrli olsunlar və sosial təcrid tələblərinə əməl etsinlər, maska taxsınlar, zərurət olmadan evdən bayıra çıxmasınlar ki, qısa müddətdə biz karantin rejiminin tamamilə ləğv edilməsinə nail ola bilək. Əks təqdirdə karantin də uzanacaq, fövqəladə rejimə də keçiləcək, ümumiyyətlə, pandemiyanın nə zaman bitəcəyi ilə bağlı müsbət proqnozlar verə bilməyəcəyik”.
İradə SARIYEVA
