Azərbaycan dövlətinin pandemiyaya qarşı mübarizədə həm milli, həm regional, həm də beynəlxalq səviyyədə gördüyü işlər beynəlxalq qurumlar tərəfindən təqdir edilir. Ölkəmizin nümayış etdirdiyi ümumbəşəri həmrəylik nümunələri artıq bütün dünya üçün nümunəyə çevrilib.
Ümumdünya Səhiyyə Təşkilatının (ÜST) Baş direktoru Tedros Adhanom Qebreyesus keçirdiyi mətbuat konfransında Azərbaycanın koronavirus pandemiyasına qarşı həm qlobal, həm də regional mübarizəyə töhfəsindən danışıb. Baş direktor bu yaxınlarda Azərbaycan Prezidentinin təşəbbüsü ilə keçirilən videokonfrans formatında toplantıda koronavirusa qarşı mübarizə barədə müzakirələr aparıldığını, özünün də həmin toplantıda iştirak etdiyini bildirib.
Tedros Adhanom Qebreyesus bu kimi addımları vacib hesab etdiyini vurğulayıb. ÜST-nin Baş direktoru Azərbaycanın koronavirus pandemiyasına qarşı mübarizəyə verdiyi qlobal töhfəni yüksək qiymətləndirib. O deyib ki, Azərbaycan qlobal səviyyədə bu mübarizəyə 5 milyon ABŞ dolları vəsait ayırıb: “Mən Azərbaycan Prezidentinin milli, regional və qlobal səviyyədə bu mübarizədə güclü səylərini görürəm. İmkandan istifadə edərək cənab Prezidentə təşəkkürümü bildirmək istəyirəm ki, bütün bu üç səviyyədə səyləri birləşdirir, dəstək verir”.
“...çox nümunəvi addımlar atmaqla özünü beynəlxalq aləmdə bir daha təsdiqlədi”
“İki Sahil” qəzetinin baş redaktoru Vüqar Rəhimzadə “Bakı-Xəbər”ə bildirdi ki, Azərbaycan dövləti qlobal pandemiyaya qarşı həyata keçirilən mübarizə tədbirlərində ən aktiv iştirak edən dövlət kimi dünyada tanınır. “Bildiyimiz kimi, COVID-19 pandemiyası dünyada qlobal problem yaradıb. Bu gün dünyanın bütün ölkələrində bu virus yayılıb. Hesab edirəm ki, koronavirusla bağlı Azərbaycan dövləti məqamında kifayət qədər tədbir həyata keçirib, vaxtında qərarlar verib. Mən burada xüsusilə cənab Prezidentin vaxtında atdığı addımları, imzaladığı sərəncam və fərmanları qeyd etmək istəyirəm. Koronavirusla Mübarizəyə Dəstək Fondu, ölkəmizdə xüsusi karantin rejiminin tətbiq olunması, sosial izolyasiyanın həyata keçirilməsi, Nazirlər Kabineti yanında Operativ Qərargahın yaradılması və sair nəticəsində bu qlobal bəladan məqamında yaxa qurtara bildik, kütləvi insan itkisinə məruz qalmadıq. Bu bəladan çox az itkilərlə çıxmağımız üçün Azərbaycan hökuməti vaxtında lazımi qərarları verdi. Ümumdünya Səhiyyə Təşkilatının dövlətimizin gördüyü işlərlə bağlı cənab Prezidentə təşəkkür etməsi təqdirəlayiqdir. Çünki Azərbaycan doğrudan da koronavirusla mübarizədə həm beynəlxalq, həm regional, həm də milli müstəvidə kifayət qədər böyük iş görüb.
Təbii ki, ÜST-nin bütün dünyada koronavirus pandemiyasının qarşısını almaqla, onu məhdudlaşdırmaqla bağlı tövsiyələrini Azərbaycan yüksək dəyərləndirdi və bu qurumun verdiyi tövsiyələri əsas götürərək, birmənalı olaraq, mübarizə tədbirlərini bu istiqamətdə qurdu. Bu baxımdan, həm Azərbaycanın qlobal pandemiya ilə bağlı mübarizə üçün Ümumdünya Səhiyyə Təşkilatına maliyyə yardımı göstərməsi, həm bu qurumun tövsiyələrinə məsuliyyətlə əməl etməsi, o tövsiyələrdən irəli gələn məsələlərə özünün könüllü təşəbbüs göstərməsi ÜST tərəfindən də təqdir edilir. Azərbaycan bu məsələdə çox nümunəvi addımlar atmaqla özünü beynəlxalq aləmdə bir daha təsdiqlədi. Bu gün bir çox ölkə pandemiya dövründə Azərbaycanda tətbiq edilən mübarizə üsullarını özləri üçün nümunə hesab edərək onları tətbiq etməyə başlayıb. Ona görə də ÜST-nin təşəkkürü təbiidir. Azərbaycanın həm ÜST-nin qarşıya qoyduğu tövsiyələrə ciddi şəkildə riayət etməsi, eyni zamanda, bu qurumla sıx əməkdaşlıq etməsi, birmənalı şəkildə, ölkəmizin dünyada mövcud olan bu problemin aradan qaldırılması üçün həyata keçirilən mübarizə tədbirlərinə böyük töhfədir”.
Azərbaycan dövlətinin bu istiqamətdə böyük fəallıq ortaya qoyduğunu deyən V.Rəhimzadənin sözlərinə görə, Azərbaycan dövləti müxtəlif məsələlərlə bağlı bir sıra beynəlxalq videokonfransların, videomüzakirələrin keçirilməsi təşəbbüsünü irəli sürməklə bu qlobal problemin həllində nə qədər fəal olduğunu ortaya qoydu.
İradə SARIYEVA
