“Təcrübə də göstərir ki, harada birlik varsa, milli dəyərlərə, adət-ənənələrə sadiqlik mövcuddursa, həmin yerdə istənilən problemin həlli asanlaşır”
Koronavirusla mübarizədə qalıb gəlmək üçün, sözsüz ki, milli həmrəylik, dövlətlə vətəndaşın, eləcə də vətəndaşların bir-biri ilə qırılmaz əlaqələrə malik olması vacib məsələlərdən biridir. Tarixən Azərbaycan xalqı bir-birinə səmimi, isti münasibət bəsləyib və xalqımızın bu keyfiyyəti bir ənənə kimi indi də yaşayır, yaşadılır.
Məlum olduğu kimi, Prezident İlham Əliyev martın 24-də Mənzil İnşaatı Dövlət Agentliyinin ikinci layihəsi – Hövsan yaşayış kompleksinin açılışında iştirak edərkən Azərbaycan Televiziyasına geniş və məzmunlu müsahibə verib. Koronavirus təhlükəsindən itkisiz adlamaq üçün dövlət tərəfindən görülən mübarizə tədbirlərindən danışan ölkə başçısı, həmçinin adət-ənənələrimizin, milli dəyərlərimizin koronavirusa qarşı mübarizədə vətəndaşlarımıza yardım edəcəyini əminliklə bildirib:”...Yaşlı tənha insanların təminatını təchiz etmək üçün mənim göstərişimlə sosial işçilərin səfərbərliyi nəzərdə tutulur və onlar bu işi görəcəklər. Eyni zamanda, fürsətdən istifadə edərək çoxminli könüllülər ordusuna da müraciət etmək istəyirəm. Hesab edirəm ki, bizim könüllülərimiz də bu işlərə qoşulmalıdırlar, Operativ Qərargahla təmas saxlamalı, Əmək və Əhalinin Sosial Müdafiəsi Nazirliyi ilə əlaqədə olmalıdırlar. Hər halda, nazirliyə də göstəriş verilib ki, yaşlı insanlara onların yaşadıqları yerlərdə xidmətlər göstərilsin, - istər dərman preparatları olsun, istərsə də ərzaq, - biz tənha vəziyyətdə yaşayan yaşlı insanları qoruyaq.
Hesab edirəm ki, xalqımızın adət-ənənələri, milli dəyərləri, bizə bu virusla mübarizədə kömək edəcək. Çünki yaşlı insanlara həmişə böyük hörmət göstərilir. Yaşlı insanlar nadir hallarda tənha yaşayırlar. Azərbaycanda belə insanların sayı çox deyil, təqribən bir neçə min nəfərdir. Ancaq onların da təminatı nəzərdə tutulacaqdır”.
Tanınmış sosioloq alim, professor Əhməd Qəşəmoğlu baki-xeber.com-a bildirdi ki, ölkə başçısı milli dəyərlər məsələsini gündəmə gətirməklə bizə əsrlərin sınağından çıxaraq günümüzə qədər gəlib çıxan əsas borcumuzu, vəzifəmizi xatırladıb. “Azərbaycan xalqını başqa xalqlardan fərqləndirən cəhətlərindən biri də xalqımızın adət-ənənələri, milli dəyərləridir. Biz tarixən dar gündə həmrəy olmağı, birləşməyi bacarmışıq. Bizi birləşməyə, həmrəy olmağa milli dəyərlərimiz, milli keyfiyyətlərimiz sövq edib. Bu gün koronavirusla mübarizədə də milli dəyərlərimizə, adət-ənənələrimizə söykənməliyik ki, bu ağır bəladan itkisiz çıxaq. Prezident İlham Əliyev milli dəyərlərimizi, adət-ənənələrimizi önə çəkməklə bizə bir vətəndaş kimi öz məsuliyyətimizi, bu ali dəyərlərə sadiq qalmalı olduğumuzu xatırlatdı. Cənab Prezident bununla bizə mesaj verir ki, xalq olaraq milli-mənəvi dəyərlərə, adət-ənənələrə söykənin, bir-birinizə dayaq olun, dəstək göstərin, ehtiyacı olanların yanında olub onlardan qayğınızı əsirgəməyin.Bu gün vətəndaşlarımız dövlətlə həmrəy olaraq bu mübarizədə onunla çiyin-çiyinə irəliləməlidir. Çox təəssüf ki, bəziləri koronavirus təhlükəsinin sovuşması üçün bütün tədbirlərin dövlət tərəfindən həyata keçirilməli olduğunu düşünür. Əslində, bir vətəndaş, ictimaiyyət, cəmiyyət, qeyri-hökümət təşkilatları olaraq bizim üzərimizə çox böyük işlər düşür. Biz bu gün mümkün qədər milli adət-ənənələrə sadiq qalaraq ehtiyacı olan kasıb ailələrə, ahıllara, müxtəlif səbəblərdən işini itirən insanlara ən müxtəlif şəkildə yardımlar etməliyik. Burada vətəndaş cəmiyyətinin üzərinə də az iş düşmür. Təcrübə də göstərir ki, harada birlik varsa, milli dəyərlərə, adət-ənənələrə sadiqlik mövcuddursa, həmin yerdə istənilən problemin həlli asanlaşır”.
Ə.Qəşəmoğlu vurğuladı ki, tarixən Azərbaycan xalqı qonşusunda, kəndində, qəsəbəsində yaşayan kimsəsiz, övladsız, qohum-əqrabasız insanlara, ahıllara sahib çıxıb. Ə.Qəşəmoğlu hesab edir ki, ölkəmizi bu virusun caynağından tamamilə xilas etmək üçün hər birimiz çalışmalıyıq, dövlətə kömək etməliyik:”Bu gün dövlət səviyyəsində vətəndaşın təhlükəsizliyinin təmin edilməsi üçün hər bir iş görülür. Nazirlər Kabineti yanında yaradılan Operativ Qərargah daim vətəndaşları məlumatlandırır, tövsiyələr verir. Dövlət bu istiqamətdə üzərinə düşən işləri görüb. Vətəndaşlar da bu sahədə öz imkanlarından istifadə etməlidir. Bizə ulu babalarımızdan miras qalan mənəvi dəyərlərdən biri yardımlaşmaq, insanlara dar gündə dayaq olmaqdır. Milli dəyərlərimizə, adət-ənənələrimizə söykənib vətəndaş olaraq bir-birimizə dayaq dursaq, yardımlar etsək, ehtiyacı olanlara əl tutsaq, onların ehtiyacını qarşılasaq bu virusdan itkisiz çıxa bilərik. Əlbəttə, bir sıra məsələlərdə olduğu kimi virusla mübarizədə də milli dəyərlərə söykənməliyik”.
Bundan başqa, Ə.Qəşəmoğlu onu da bildirdi ki, hazırda dövlət insanlara bu qədər dəstək göstərdiyi, yardımlar etdiyi halda yerli banklar əhaliyə heç bir güzəşt etmir. Ə.Qəşəmoğlu qeyd etdi ki, bir çox şəxslər banklardan götürdüyü kredit hesabına iş qurub, həmin işdən əldə etdikləri gəlirlə həm bankın aylığını, həm icarəyə götürdükləri yerin pulunu, həm də işçinin əməkhaqqını ödıyirdilər. Hazırda koronavirusa görə həmin işlərin dayandırılmasının vətəndaş üçün bankın pulunu ödəmək məsələsində çətinlik yaratdığını deyən Ə.Qəşəmoğlu qeyd edir ki, banklar borcları dondurmalıdır. “Bu halda banklar borcları müvəqqəti olaraq dondurmalıdır ki, vətəndaş çətin duruma düşməsin”-deyə Ə.Qəşəmoğlu vurğuladı.
İradə SARIYEVA
