03/07/2020 01:18
728 x 90

Operativ Qərargah hazırda koronavirusa görə fövqəladə rejimə ehtiyac olmadığını açıqladı

img

Vəziyyətdən çıxış edərək demək olar ki, hazırda koronavirusa görə fövqəladə rejimə ehtiyac yoxdur. Amma istisna da ola bilər. Prezident İlham Əliyev də müraciətində qeyd edib ki, bu, istisna edilmir. Əgər ölkənin vətəndaşlarının təhlükəsizliyi üçün zərurət yaranarsa, koronavirusa görə fövqəladə vəziyyət də elan edilə bilər.

Trend-in məlumatına görə, bunu xüsusi karantin rejiminin elan edilməsi ilə bağlı brifinqdə Nazirlər Kabinetinin mətbuat xidmətinin rəhbəri İbrahim Məmmədov deyib.

Onun sözlərinə görə, istehsal sahələrində insanların izolyasiyası, istehsalın dayandırılması məsələsi bu gün gündəlikdə deyil: "Amma bütün məsələləri qadağa və qərarlarla idarə etmək mümkün deyil. Əgər rəhbərlik görsə ki, infeksiyaya yoluxma təhlükəsi var, o zaman lazımi tədbirlər görə bilər. Amma situasiyanın mürəkkəbliyi ondadır ki, eyni vaxtda infeksiyaya qarşı mübarizə aparılmalıdır. Zəruri tədbirlər görülərsə, həmin istehsal prosesində də insanların təhlükəsizliyini təmin etmək mümkün olar".

İ.Məmmədov bildirib ki, ölkədə ərzaq qıtlığı yoxdur: "Hazırda ölkə daxilində yayılmanın qarşısını almağa və xəstəliyi lokallaşdırmağa çalışırıq. Həkimlərə minnətdarıq ki, ölüm hallarının qarşısını alırlar".

  • Yoluxma  sayına görə hansısa rayonu "həyəcan" rayonu elan etmək mümkün deyil

 

İbrahim Məmmədov deyib ki, Azərbaycanda olan koronavirus xəstələrinin sayının daha çox harada olması ilə bağlı bölgü aparmaq düzgün deyil. O bildirib ki, hazırda 61 nəfər koronavirusa yoluxan şəxsə görə ölkənin hansısa regionu və şəhərini təhlükəli saymaq olmaz: "61 nəfərin böyük əksəriyyəti xaricdən gəlib, xəstələrin kiçik hissəsi daxildə yoluxub. Ona görə hansısa rayonu "həyəcan" rayonu elan etmək mümkün deyil. Bu, həm də təhlükəlidir, bundan çəkinmək lazımdır".

  • Restoranlar tərəfindən onlayn sifariş və evə çatdırılmaya heç bir məhdudiyyət yoxdur

İ.Məmmədov qeyd edib ki, infeksiyaya qarşı zəruri olan ləvazimatların ölkə daxilində istehsalını təşkil etmək zəruridir, amma bunu qısa zamanda həyata keçirmək mümkün deyil. Onun sözlərinə görə, sahibkarlara müxtəlif formada güzəştlər ediləcək ki, onlar muzdlu işçilərini saxlasın və sosial məsuliyyətini itirməsinlər. "Bu gün Sədərək ticarət mərkəzinin rəhbəri bildirib ki, martın 15-dən aprelin 15-dək sahibkarlardan icarə haqqı alınmayacaq".

İ.Məmmədov qeyd edib ki, restoranlar tərəfindən onlayn sifariş və evə çatdırılma mümkündür və bununla bağlı heç bir məhdudiyyət yoxdur.

Son xəbərlər