Məlum olduğu kimi, koronavirus təhlükəsi bütün dünyanı ağuşuna alıb. Dünyanın əksər ölkəsi sözügedən virusla mübarizədə müxtəlif tədbirlər görür. O cümlədən, Azərbaycanda da koronavirusun yarada biləcəyi təhlükəli fəsadları önləmək, neytrallaşdırmaq üçün bir sıra addımlar atılır. Giriş-çıxış məhdudlaşdırılır, nəzarət artırılır, ictimai yerlərdə və əhalinin çox istifadə etdiyi obyektlərdə dezinfeksiya işləri aparılır və s.
Adətən, bir sıra sivil dövlətlərdə bu kimi təhlükələrin qarşısının alınması üçün bütün tərəflər səfərbər olur. Yəni təkcə dövlət bunun yükünü öz üzərinə götürmür. Müxtəlif özəl qurumlar, xüsusən də tibb sektoruna aid olan təsisatlar ümumi işə öz faydalarını verir. Ancaq müşahidələr göstərir ki, fevral ayından Azərbaycanda koronavirusla bağlı dövlət tərəfindən görülən bir sıra profilaktik və digər tədbirlərə baxmayaraq, özəl klinikalar bu işə heç bir yardım göstərmirlər. Özəl qurum olmaq o demək deyil ki, bütün bu prosesdən özünü kənarda saxlayasan. Ancaq Azərbaycandakı özəl klinikalar əvvəlki iş rejimində işləyirlər. Daha dəqiq desək, əvvəlki kimi şıdırğı pul qazanmaqla məşğuldurlar. Bakıda fəaliyyət göstərən özəl klinikalardan heç biri indiyə qədər koronavirusla mübarizə ilə bağlı hansısa təşəbbüslə çıxış etməyib. Hansısa aztəminatlı sosial qrupa aid olan vətəndaşların yoxlanılması, karantin işləri aparılması ilə bağlı aksiya keçirməyiblər. Bir sözlə, bu işlə yaxından-uzaqdan heç maraqlanmırlar. Əslində, bu kimi məsələlərdə özəl klinikalar sosial məsuliyyət prinsipindən çıxış etməyə borcludurlar. Ancaq bizdə özəl klinikalar, ümumiyyətlə, belə məsələləri görməzdən gəlirlər. Sanki koronovirusla ancaq dövlət xəstəxanaları məşğul olmalıdırlar. Özəl klinikalar isə yalnız pul qazanmalıdırlar.
Onu da qeyd edək ki, Azərbaycanda fəaliyyət göstərən özəl klinikaların həm maddi, həm də texniki imkanları kifayət qədər böyükdür. Buna baxmayaraq, yaranan belə çətin vəziyyətdə heç bir klinika əhaliyə göstərilən xidmətdə endirimlərə getmir, hansısa sosial paketlə çıxış etmir. İşləri ancaq vəziyyətin nə cür olmasından asılı olmayaraq pul qazanmaqdır. Bütün bunlar onu göstərir ki, özəl klinikalar sosial məsuliyyət məfhumundan tamamilə uzaqdırlar. Bu da ikrah doğuran haldır.
“Çünki onların bu biganəliyi qəbuledilməzdir”
Sözügedən məsələ ilə bağlı fikirlərini “Bakı-Xəbər”lə bölüşən ekspert Rəsul Cahangirlinin sözlərinə görə, Azərbaycanda fəaliyyət göstərən özəl klinikaların iş prinsipi ancaq böyük həcmdə pul qazanmaqdır: “Bu dünən də belə idi, bu gün də belədir. Təəssüflər olsun ki, uzun illərdir özəl klinikaların bu “yanaşması” dəyişmir. Nadir hallarda hansısa pulsuz aksiya keçirirlər. Ancaq sonra məlum olur ki, bunu özlərini reklam etməkdən ötrü ediblər. Məqsəd bu minvalla daha çox müştəri cəlb edib pul qazanmaqdır. Koronavirusla mübarizə məsələsində həqiqətən də özəl klinikalar özlərini biganə aparırlar. Bu da cəmiyyətdə narazılıqla qarşılanır. Hansı ki, özəl klinikaların bu kimi məsələlərdə imkanları dövlət xəstəxanaları ilə müqayisədə daha böyükdür. Ancaq sözügedən klinikalar, ümumiyyətlə, bu işdə özlərini kənarda saxlayırlar. Hesab edirəm ki, bu qəbuledilməzdir. Düzdür, özəl klinikaların fəaliyyətinə birbaşa müdaxilə etmək olmaz. Ancaq hesab edirəm ki, özəl klinikaların koronavirusla bağlı göstərdiyi bu biganəliyə qarşı ciddi ictimai qınaq olmalı və media buna geniş yer verməlidir. Çünki onların bu biganəliyi qəbuledilməzdir”.
Vidadi ORDAHALLI
