Koronavirusla bağlı narahatlıqlar bütün dünyada hökm sürməkdədir. Virusla bağlı ayrı-ayrı ölkələrdə fövqəladə tədbirlər həyata keçirilir. Hətta dünyanın inkişaf etmiş ölkələri belə virusun qarşısını ala bilmirlər. Lakin səmərəli qabaqlayıcı tədbirlər görən ölkələrdə vəziyyət nisbətən daha qənaətbəxşdir.
Ölkəmiz də, öz növbəsində, bütün qabaqlayıcı və operativ tədbirləri həyata keçirir. Bu baxımdan Azərbaycan hətta bir çox ölkəni qabaqlayır.
Koronavirusun ölkəmizdə də yayılmaması üçün nağdsiz ödənişlərə üstünlük verilməsi təklif olunur. Azərbaycan Banklar Assosiasiyası nağdsız ödənişlərin “COVID-19” virusu ilə yoluxma təhlükəsini azaltmasına dair əhaliyə məsləhətlər verib. Azərbaycan Banklar Assosiasiyası nağd puldan istifadəni minimallaşdırmaq üçün kütləvi xarakter daşıyan xidmətlər, xüsusilə də kredit, kommunal, mobil telefon və digər ödənişlərin internet üzərindən və ya bankların təqdim etdiyi mobil və internet bankçılıq xidmətləri vasitəsilə nağdsız formada həyata keçirilməsinə üstünlük verilməsini də tövsiyə edir: “Hazırda qlobal səviyyədə narahatlığa səbəb olmuş və Ümumdünya Səhiyyə Təşkilatı (ÜST) tərəfindən pandemiya elan edilmiş “COVID-19” virusu onun təmas etdiyi səthlərə toxunulma vasitəsilə də yoluxmaya səbəb ola bilir. Bu səbəbdən, xüsusilə də insanların çox toplaşdığı ərazilərdə quraşdırılmış bankomatlardan istifadə etməklə nağdlaşdırma əməliyyatı aparılan zaman bankomatın düymələrinə toxunmaq zərurəti yarandığı üçün, hər istifadədən sonra əllər ciddi şəkildə yuyulmalı və ümumiyyətlə, zərurət olmadıqda bankomatdan istifadə minimuma endirilməlidir”.
Aparılan araşdırmalara görə, bu kimi viruslar kağız əskinaslarla daha çox sürətlə yayılır. Bu səbəbdən də ödənişin nağdsız formada həyata keçirməsi məqsədəuyğundur.
Onu da qeyd edək ki, Mərkəzi Bank nağd pulla bağlı əhaliyə müraciət edib. Müraciətdə bildirilir: “Bank sistemindən kənarda əhəmiyyətli həcmdə nağd pul kütləsi dövr etdiyi üçün bu pul nişanları da koronavirus infeksiyası baxımından potensial risq mənbəyi ola bilər. Bununla əlaqədar infeksiyaya yoluxma risqlərinin minimallaşdırılması məqsədilə Mərkəzi Bank əhaliyə, eləcə də biznes subyektlərinə nağd puldan istifadəni maksimal məhdudlaşdırmağı və nağdsız ödənişlərə (elektron və mobil bankçılıq, ödəniş kartları, o cümlədən, təmassız ödəniş alətləri vasitəsilə) böyük üstünlük verilməlidir”.
“İnsanların alış-veriş zamanı nağd deyil, kartla ödənişlərə üstünlük verməsi daha məqsədəuyğundur”
“Sağlamlığın Qorunması” İctimai Birliyinin sədri Yazgül Abdiyeva bildirdi ki, dünyanı başına alan koronavirusdan qorunmaq bir çox halda özümüzdən asılıdır: “Ölkəmizdə bu bəlaya qarşı mübarizənin ciddiliyini nəzərə alaraq, bacardığımız qədər ictimai yerlərə getməyərək evdə qalın. İnsanlar dükan-bazara getdikdə də özlərini maska ilə qorusunlar. Bununla yanaşı, virusdan qorunmaq üçün insanların alış-veriş zamanı nağd deyil, kartla ödənişlərə üstünlük verməsi daha məqsədəuyğundur. Onlayn alış-verişə üstünlük verilərsə, virusdan qorunmaq olar. Bu hal həm də ölkədə nağdsız ödənişlərin artmasına səbəb olacaq”.
Günel CƏLİLOVA
