Son zamanlaradək elm üçün naməlum qalan virus kəskin ağciyər xəstəliklərinə səbəb olur. “COVID-19” adı verilən koronavirus artıq Azərbaycan da daxil olmaqla, 136 ölkə və ərazidə yayılıb. Dünya boyunca, virusun yayıldığı Çin də daxil, yüz mindən çox insan koronavirusa yoluxub. Hər bir ölkə koronavirusun yayılmasının qarşısının alınması məqsədilə müəyyən tədbirlər həyata keçirir.
Azərbaycanda da bu istiqamətdə işlər görülməkdə davam edir. Məlum olduğu kimi, koronavirusun ölkəmizdə yayılmasının qarşısının alınması məqsədilə Nazirlər Kabinetinin yanında Operativ qərargah yaradılıb. Operativ qərargahın müəyyən etdiyi tədbirlər, işlər həyata keçirilməkdə davam edir.
Bununla yanaşı, təklif olunur ki, koronavirusla mübarizə aparılarkən ölkədə könüllülər hərəkatı yaradılsın. Məlumdur ki, könüllülük dövründə gənclər respublikamızda aparılan islahatların və inkişafın fəal iştirakçısına çevriliblər, “Eurovision” mahnı müsabiqəsi, I Avropa Oyunları, “Formula 1” yarışları, IV İslam Həmrəyliyi Oyunları kimi irimiqyaslı beynəlxalq tədbirlərin həyata keçirilməsində könüllülərin rolu əvəzsiz olub.
“Könüllülər marketlərdən, o cümlədən, apteklərdən ərzaq mallarının və dərmanların yaşlı insanlara çatdırılmasını təmin edə bilərlər”
Milli Məclisin vitse-spikeri Adil Əliyevin sözlərinə görə, koronavirus bəşəriyyət üçün həm böyük təhlükə mənbəyi, həm də bir sınaqdır. Təxminən hər yüz ildən bir bəşəriyyət oxşar virusla üzləşir. 3 ay əvvəl Çində başlayan epidemiya başqa qitələrdə və dövlətlərdə yaşayanları o qədər də narahat etmirdi, bir çoxu təhlükənin sovuşacağını düşünürdü. Bu gün isə mənzərə tamamilə fərqlidir, koronavirus az qala dövlətlərin tamamını öz cənginə alıb, hətta uzaq və qarlı Qrenlandiyada virusa yoluxan var: “Bu arada, virusla mübarizədə yaşlı insanlarımız ən həssas qrup sayılır. Yaşlı insanlarımızı qorumalıyıq! Bu məqsədlə seçildiyim dairədə, həmişə olduğu kimi, Novruz bayramında evlərə çatdırmaqla yaşlı nəslə ərzaq dəstəyimizi əsirgəməyəcəyik. Bununla bərabər, onun üzərində də düşünmək lazımdır ki, indiki həssas məqamda yaşlı insanlara daha hansı yardımı və dəstəyi edə bilərik? Koronavirusla bağlı bir çox ölkədə marketlərdən ərzağın evə çatdırılması xidməti işə düşüb. Azərbaycanda da bu haqda müzakirələr başlayıb. Aydındır ki, hər şəhərdə, hər rayonda, hər küçədə və hər binada yaşlı insanlara marketlərdən ərzağın çatdırılması həmin marketdə çalışanların imkanı xaricindədir. Hələ ki, bu işlə peşəkar səviyyədə məşğul olan şirkətlərimiz də çox deyil. Belə isə biz bu işə gəncləri səfərbər edə bilərik. Onsuz da dərslərə ara verilib. Dövlət başçısının 2020-ci ili "Könüllülər ili” elan etdiyini nəzərə alaraq, hazırkı həssas məqamda könüllülər qrupunun yaradılması məqsədəuyğun olardı. Həmin könüllülər marketlərdən, o cümlədən, apteklərdən ərzaq mallarının və dərmanların yaşlı insanlara çatdırılmasını təmin edə bilərlər”.
Günel CƏLİLOVA
