Məlum olduğu kimi, ölkə parlamenti "İnformasiya, informasiyalaşdırma və informasiyanın mühafizəsi haqqında" Qanuna dəyişiklik edib.
Dəyişikliyə əsasən, informasiya internet-resursunun sahibi bu resursda insanların həyat və sağlamlığına ziyan vurulmasına, əhəmiyyətli əmlak ziyanının törədilməsinə, ictimai təhlükəsizliyin kütləvi surətdə pozulmasına, həyat təminatı obyektlərinin, maliyyə, nəqliyyat, rabitə, sənaye, energetika və sosial infrastruktur obyektlərinin fəaliyyətinin pozulmasına və başqa ictimai təhlükəli nəticələrin baş verməsinə təhdid yaradan yalan məlumatlar yerləşdirilməsinə yol verməməlidir.
Bu əlavələr müzakirələrdən və parlament üzvlərinin səsverməsindən sonra qəbul edilib. Amma bu mətndə zərərli məlumat deyildikdə konkret olaraq nəyin nəzərdə tutulduğu aydın deyil.
Layihəni təqdim edən İnsan hüquqları komitəsinin sədri Zahid Oruc “İnternet informasiya ehtiyatında və ya informasiya-telekommunikasiya şəbəkəsində informasiyanın yayılması”na dair 13-2-ci maddədə edilən dəyişiklikləri və “İnternet informasiya ehtiyatında yayılması qadağan edilən informasiyanın yerləşdirilməsi ilə əlaqədar məsuliyyət”i tənzimləyən 13-4-cü maddədə edilən dəyişikliyi ətraflı şərh edib. İclasda bildirilib ki, müasir dövrdə informasiyanın cəmiyyətdəki rolu danılmazdır. Ona görə də məlumatların yayılmasının qarşısının alınması vacibdir. Müzakirədən sonra dəyişiklik qəbul edilib.
İnformasiyaların yayılması üzərində daha sistemli nəzarət Azərbaycanda koronavirus təhlükəsi ilə mübarizədə hansı səmərəni verəcək?
Azər Həsrət: “Belə dəyişikliklər edilir ki, ciddi mövzu ilə bağlı yayılan informasiyalarda məsuliyyət hissi artsın və müəyyənləşsin”
Media eksperti Azər Həsrət “Bakı-Xəbər”ə açıqlamasında bildirdi ki, indiki məqamda informasiya ilə ciddi manipulyasiyalar edilir: “Bunların qarşısını mütləq almaq lazımdır ki, kimlərsə əhalini təhdid altında saxlaya bilməsin. Hiss olunur ki, bəzi dairələr informasiya vasitəsilə insanları, cəmiyyətləri qorxu altında saxlamağı hədəfləyirlər. Düşünürəm ki, parlament tərəfindən qanunlarımızın bu yöndə uyğunlaşdırılması yerinə düşdü. Bu, ən əsası, insanların məsuliyyət hissini artırmış olur. Dəyişikliyi doğru və vaxtında atılmış addım kimi dəyərləndirirəm”.
“Bəzi dairələr bu yeniliyi media azadlığının məhdudlaşdırılması kimi qələmə verməyə çalışır, bunu doğru saymaq olarmı” sualına isə ekspertin cavabı belə oldu: “Azərbaycan dövlətinin belə bir istəyi heç vaxt olmayıb. Ümumiyyətlə, bizim qanunvericilikdə fövqəladə vəziyyətdə, belə pandemiyada, müharibə zamanı informasiyanın yayımının bu və ya digər şəkildə məhdudlaşdırılması nəzərdə tutulur. Bunların hamısı bizim sağlamlığımız üçün edilir. Azərbaycan hakimiyyətinin internet əsrində informasiyanı məhdudlaşdırmaq kimi bir istəyi yoxdur. Belə dəyişikliklərin edilməsi, ən əsası, insanlara məsuliyyəti dərk etdirmək üçün vacibdir. Bizim insanlarımız bəzən məsələyə lağlağı kimi yanaşırlar. Gülmək üçün xəstəliklə bağlı hansısa postu paylaşır. Belə dəyişikliklər edilir ki, ciddi mövzu ilə bağlı yayılan informasiyalarda məsuliyyət hissi artsın və müəyyənləşsin. Qətiyyən bu addımları senzura kimi qələmə vermək olmaz”.
Məhəmmədəli QƏRİBLİ
