Yayılan məlumatlara görə, Azərbaycan Milli Elmlər Akademiyasının (AMEA) prezidenti, akademik Ramiz Mehdiyevin müvafiq qərarı ilə “AMEA-nın professoru” adı ləğv edilib.
Əvvəlcədən bildirək ki, indiyə qədər bu adı 50-dən yuxarı şəxs daşıyıb və onlar arasında tanınmış elm adamları ilə yanaşı, qeyri-elm adamları da olub.
Onu da vurğulayaq ki, AMEA Rəyasət Heyətinin 10 dekabr 2019-cu ildə keçirilən iclasında bu məsələ gündəmə gətirilib və bu adın ləğv edilməsinin vacib olduğu vurğulanıb.
AMEA-nın akademik-katibi, AMEA-nın müxbir üzvü Əminağa Sadıqov çıxışında bildirmişdi ki, “AMEA-nın professoru” adının ləğv edilməsi labüddür. O qeyd etmişdi ki, “AMEA-nın professoru” adının təsis edilməsi və verilməsi elmi adların verilməsi haqqında müvafiq qanunvericiliyə uyğun olmadığı üçün, bu məsələyə yenidən baxılması zərurəti yaranıb.
Əldə etdiyimiz məlumata görə, elə həmin iclasda məsələ geniş müzakirə olunduqdan sonra Rəyasət Heyəti “AMEA-nın professoru” adının təsis edilməsi” haqqında AMEA Rəyasət Heyətinin 18 yanvar 2017-ci il tarixli, 1/2 nömrəli qərarının qüvvədən düşməsi və “AMEA-nın professoru” adının bir təsisat olaraq ləğv edilməsi haqqında müvafiq qərar qəbul edib.
Hadisədən bir neçə ay keçməsinə baxmayaraq, bu gün sosial şəbəkələrdə və KİV-də “AMEA-nın professoru” adının ləğv edilməsi ilə bağlı verilən müvafiq qərar barədə müzakirələr açılıb.
“AMEA-nın professoru” adının ləğv edilməsi nə dərəcədə düzgündür? AMEA rəhbərliyinin bu qərarına ekspertlərin münasibəti necədir?
Qeyd edək ki, “AMEA-nın professoru” adını daşımış olan elm adamları bu qərara qarşı çıxır və onların fikrincə, bu, düzgün qərar deyil. Amma onların narazılığının əsassız olduğunu və bunun AMEA tərəfindən verilmiş mənasız ad olduğunu deyənlər daha çoxdur.
“Belə bir adın təsis edilməsi, müxtəlif şəxslərə, hətta elmlə heç bir əlaqəsi olmayanlara verilməsi...”
Millət vəkili, tanınmış təhsil mütəxəssisi Etibar Əliyev “Bakı-Xəbər”ə açıqlamasında bildirdi ki, AMEA rəhbərliyinin bu addımı müsbətdir. O hesab edir ki, “AMEA professoru” adının təsis edilməsi və onun elm adamları ilə yanaşı, elmlə heç bir əlaqəsi olmayan şəxslərə verilməsi özü düzgün deyildi. Bunun neqativliklərə və sui-istifadə hallarına yol açdığını deyən E.Əliyev bildirdi ki, “AMEA-nın professoru” deyiminin özü doğru deyil. E.Əliyevin sözlərinə görə, elm və pedaqoji sahədə elmi nailiyyətləri olan, dissertasiya işi müdafiə edən şəxslər elmi adlar ala bilər. “Bilirsiniz, “AMEA-nın professoru” adı təsis ediləndə mən buna narazılığımı bildirmişəm və bunun mənasız olduğunu qeyd etmişdim. Belə bir adın təsis edilməsi, müxtəlif şəxslərə, hətta elmlə heç bir əlaqəsi olmayanlara verilməsi özü düzgün deyildi. Bu səhv idi və bir sıra neqativ hallara yol açırdı. Mənim gəldiyim qənaət ondan ibarətdir ki, Akif Əlizadənin dövründə doktorantura şöbəsinin yaradılması tam lazımsız bir məsələ idi. “AMEA-nın professoru” adının verilməsi tam mənasız bir məsələ idi. Bu cür strukturlar yaratmaqla, əksinə, təkrarçılığa yol verilirdi. Bu da sui-istifadə hallarının artmasına gətirib çıxarırdı. “AMEA-nın professoru” adı lazım olmayan bir nüans idi. Hətta burada verilən şərtlər də çox absurddur. Mən hesab edirəm ki, akademiya rəhbərliyinin “AMEA-nın professoru” adının ləğv edilməsi ilə bağlı qəbul etdiyi qərar çox müsbət qərardır və bu lazım idi” -deyə E.Əliyev qeyd etdi.
İradə SARIYEVA
