Koronavirusun dünyada geniş yayılması, Ümumdünya Səhiyyə Təşkilatı tərəfindən infeksiyanın qlobal pandemiya elan olunması, bütün ölkələrdə olduğu kimi, Azərbaycanda da əlavə təxirəsalınmaz tədbirlərin həyata keçirilməsini zərurətə çevirib.
Dövlət orqanlarının fəaliyyətini əlaqələndirən Operativ qərargahın yaradılması, bəzi ölkələrlə sərhədlərin bağlanması və gediş-gəliş təmaslarının məhdudlaşdırılması, karantin rejiminin tətbiqi qarşıya qoyulan vəzifələri maksimum icra etməyə imkan verib. Bir ay müddətində kütləvi tədbirlərin, toyların təxirə salınması, dövlət və özəl sektora aid qurumlar, vətəndaşlar üçün xüsusi qaydaların elan olunması, onlara ciddi riayət edilməsi üçün nəzarət mexanizminin formalaşdırılması və tətbiqi qərara alınıb. Azərbaycan hökuməti ÜST-nin tövsiyələrini və beynəlxalq təcrübəni nəzərə alaraq, əhalinin sağlamlığının etibarlı qorunması və virusun yayılmasının qarşısının alınması üçün həyata keçirilən tədbirlərin əhatə dairəsini daha da genişləndirib.
Bununla belə, koronavirus infeksiyasının yayılmasının qarşısını almaq məqsədilə martın 19-da saat 00.00-dan etibarən xüsusi təyinatlı, o cümlədən, təcili tibbi yardım, qəza-bərpa, xilasedici, habelə yük daşıyan avtomobillərin hərəkəti istisna olmaqla, respublikanın şəhər və rayonlarında qeydiyyatda olan nəqliyyat vasitələrinin və onların sərnişinlərinin Bakı, Sumqayıt şəhərlərinə və Abşeron rayonuna buraxılması martın 29-dək dayandırılır. Bakı, Sumqayıt şəhərləri və Abşeron rayonunda qeydiyyatda olan sərnişindaşıma nəqliyyat vasitələrinin (avtobus, mikroavtobus, taksi və s.) ölkənin başqa şəhər və rayonlarından Bakı, Sumqayıt şəhərlərinə və Abşeron rayonuna sərnişin daşımaları qadağan olunur. Bakı, Sumqayıt şəhərlərində və Abşeron rayonunda qeydiyyatda olan nəqliyyat vasitələrinin və onların sərnişinlərinin Bakı şəhərinə sərbəst giriş-çıxışına icazə verilir.
Bütövlükdə, ölkədə koronavirusla mübarizədə qapalı şəhər praktikasının tətbiqi, böyük şəhərlərə girişin məhdudlaşdırılması nə qədər səmərəli olacaq?
“Bu minvalla virusun yayılma risqini azaltmaq olar”
Məsələyə münasibət bildirən millət vəkili Elman Nəsirovun sözlərinə görə, belə praktikanın tətbiq olunması səmərəli effekt verəcək: “Nəzərə almaq lazımdır ki, koronavirus infeksiyası planetar təhlükə mənbəyidir. Antraktidadan başqa dünyanın bütün qitələrini əhatə edib. ÜST ayrı-ayrı ölkələrin koronavirusla mübarizəsini qiymətləndirərkən Azərbaycanın bu sahədəki fəaliyyətini yüksək dəyərləndirib. Həqiqətən də Nazirlər Kabineti yanında Operativ qərargah bu istiqamətdə çox operativ addımlar atır. Bu addımlar, ilk növbədə, hər bir ölkə vətəndaşının karantin vəziyyətinə alınması və onun təhlükəsizliyinin təmin edilməsi mənafeyinə xidmət edir. Bu baxımdan çoxsaylı məhdudiyyət tətbiq edilir. Bunlardan biri də martın 19-dan Bakı, Sumqayıt şəhərlərinə və Abşeron rayonuna digər rayonlarda qeydiyyatda olan avtomobillərin buraxılmamasıdır. Təbii ki, burada xüsusi istisnaları da nəzərə almaq lazımdır. Görünən odur ki, bununla bağlı 10 günlük məhdudiyyət tətbiq olunacaq. Gələcəkdə bunun necə olacağı isə koronavirusla mübarizənin səmərəliliyindən asılı olacaq. Hər halda, reallıq ondan ibarətdir ki, bu günə qədər koronavirusla mübarizədə vaksin hazırlanmayıb. Belə olan halda, bu kimi məhdudiyyətlərin tətbiq olunması lazımdır. Bu minvalla virusun yayılma risqini azaltmaq olar. Çünki tarixdə dünyada bu kimi praktikadan istifadə edilib. Hər kəs təhlükənin ciddi olmasının fərqində olmalıdır. Hər bir şəxs təkcə dövlətdən nəyisə ummamalıdır. Özü-özünün müdafiəçisi olmalıdır. Özü-özünü karantin vəziyyətində saxlamalı və ehtiyatlı davranmalıdır”.
Vidadi ORDAHALLI
