Koronavirusun ölkə ərazisində geniş şəkildə yayılmaması və vətəndaşlarımızın bu virusa yoluxma risqinin azaldılması məqsədilə dövlət tərəfindən həyata keçirilən bütün təhlükəsizlik tədbirlərinə qurumlarda, ticarət mərkəzlərində, mollarda, iri supermarketlərdə və əhalinin daha çox üz tutduğu obyektlərdə də ciddi əməl olunmalıdır.
Artıq bir çox özəl və dövlət xəstəxanasında, eləcə də digər fəaliyyətdə olan qurumlarda xüsusi avadanlıqlar quraşdırılıb və həmin texniki avadanlıqlar vasitəsilə bu məkana gələn insanların temperaturu ölçülür. Bu da həmin məkanlara koronavirusa yoluxma ehtimalı olan insanların daxil olmamasına və bu virusun başqalarına keçməməsinə şərait yaradır.
Amma görək paytaxtımızda fəaliyyət göstərən iri supermarketlərdə, ticarət mərkəzlərində, mollarda bu məsələyə diqqət yetirilirmi? Bəzi bu kimi obyektlərdə maarifləndirici videoçarxlar, plakatlar olsa da, bir çoxunda bu dediklərimiz yoxdur. Bir neçə gün əvvələ qədər müəyyən supermarketlərin girişində isə əlində spirt olan supermarket əməkdaşları dayanırdı və onlar müştərilərin əllərinə spirt tökürdülər. İndi isə çox supermarketdə spirtləmə yığışdırılıb. Ümumiyyətlə, supermarketlər, iri ticarət məkanları, mollarda müştərilərin sağlamlığının yoxlanılması, onların koronavirus daşıyıcısı olub-olmadığını müəyyən etmək üçün xüsusi istilikölçmə cihazları olmalıdır. Amma təəssüf ki, bizim ticarət məkanları, alış-veriş mərkəzlərində bu qurğular yoxdur.
Onu da qeyd edək ki, Nazirlər Kabineti yanında Operativ qərargah hazırda fəaliyyətini davam etdirən ticarət mərkəzləri, supermarketlərə bütün təhlükəsizlik tədbirləri görmələrini tövsiyə edib. Amma buna əməl edənlər çox azdır.
Xatırladaq ki, bir neçə gün əvvəl Operativ qərargah “koronavirus infeksiyası (COVİD-19) dünya ölkələri arasında sürətlə yayılmaqda davam edir. Virusun uzun inkubasiya dövrünün olması, yayılma sürəti və vaksinin hələ də tapılmaması dövlətləri daha da ciddi tədbirlər görməyə sövq edir. Ümumdünya Səhiyyə Təşkilatı tərəfindən koronavirus infeksiyasının qlobal pandemiya elan olunduğunu nəzərə alaraq və virusun qarşısının alınması istiqamətində Ümumdünya Səhiyyə Təşkilatının tövsiyə və tələblərindən irəli gələrək, ölkə ərazisində bir sıra təxirəsalınmaz tədbirlərin həyata keçirilməsi zərurəti yaranmışdır. Bununla əlaqədar bir ay müddətində kütləvi tədbirlərin təxirə salınması qərara alınmışdır. Həmçinin, dövlət və özəl sektora aid qurumlardan, vətəndaşlardan xüsusi qaydalara ciddi riayət etmələri tələb olunur” tələbini bütün vətəndaşlar qarşısında qoyub.
“...iri ticarət mərkəzlərinin təhlükə sovuşana qədər müvəqqəti bağlanması...”
Sosial məsələlər üzrə tanınmış ekspert İlqar Hüseynli “Bakı-Xəbər”ə bildirdi ki, böyük ticarət mərkəzləri və mollarda insanları virusdan qoruyan əsaslı yoxlanış tədbirləri həyata keçirilməlidir. Onun sözlərinə görə, insanların virusdan qorunması üçün hər bir ticarət mərkəzi işlər görməlidir: “Ümumiyyətlə, koronavirus təhlükəsi dünyada dəhşətli bir hal alıb. Bu virusdan qorunmaq üçün Ümumdünya Səhiyyə Təşkilatının müvafiq təlimatları var və Azərbaycan da bu təlimatlara əməl edən ölkələr sırasındadır. Bilirsiniz ki, ölkəmiz ÜST ilə sıx əməkdaşlıq edir, hətta İran da daxil olmaqla, koronavirusdan əziyyət çəkən ölkələrə yardımlar edir, dəstək göstərir. Hesab edirəm ki, dövlətin verdiyi bütün qərarlara iri ticarət mərkəzləri, mollar, supermarketlər də ciddi əməl etməlidirlər, virusun aşkarlanması üçün lazım olan və bu mərkəzlərdə texnoloji standartlara cavab verən avadanlıqlar alınıb quraşdırılmalıdır. Xəstəliyin aşkarlanmasına qədər lazım olan standartlar həyata keçirilməlidir.
Burada bəzi ticarət mərkəzlərimizdə mövcud olan xoşagəlməzlikləri də diqqətə çatdırmaq istəyirəm. Bizim elə iri ticarət mərkəzlərimiz var ki, orada giriş-çıxışla bağlı çox ciddi pərakəndəliklər mövcuddur. Elə götürək “Sədərək”, “Binə” və digər buna bənzər ticarət mərkəzlərini, bazarları, molları. Çox təəssüf ki, həmin yoxlama avadanlıqlarının quraşdırılmasına bu binaların konstruksiyası imkan vermir, elə mərkəz var bir deyil, bir neçə giriş-çıxışı var. Amma, heç olmasa, “Gənclik” Moll və digər bu kimi bir çıxış-girişə malik olan mollarda bu avadanlıqları quraşdırmaq, müayinəni tətbiq etmək lazımdır. Texniki imkanları əlverişsiz olan və texniki avadanlıqları yerləşdirməyin mümkünsüz olduğu ticarət mərkəzlərini isə müvəqqəti olaraq bağlamaq lazımdır. Texniki imkanları yetərincə olmayan iri ticarət mərkəzlərinin təhlükə sovuşana qədər müvəqqəti bağlanması daha məqsədəuyğun olardı. Çünki bununla bağlı dünya təcrübəsi var”.
İ.Hüseynli hesab edir ki, iri ticarət mərkəzləri özləri əhalinin sağlamlığında maraqlı olmalı və gərəyi olan bütün qabaqlayıcı tədbirlərin görülməsini reallaşdırmalıdırlar. Onun sözlərinə görə, əhalinin sağlamlığının təmin edilməsi üçün bütün qurumlar, ticarət mərkəzləri əlindən gələni etməlidirlər.
İradə SARIYEVA
