Məlum olduğu kimi, Prezident İlham Əliyev dövlət idarəçiliyində səmərəliliyin artırılması ilə bağlı əlavə tədbirlər haqqında sərəncam imzalayıb. Sərəncama əsasən, Azərbaycan Respublikası Prezidentinin Administrasiyasında Azərbaycan Respublikası Prezidentinin fərman, sərəncam və tapşırıqlarının icra vəziyyətinə nəzarətin elektron qaydada həyata keçirilməsi üçün yeni informasiya sistemi yaradılmalıdır.
Sərəncamda bildirilir ki, yerli icra hakimiyyəti orqanlarının fəaliyyətinin səmərəliliyi mütərəqqi dünya təcrübəsinə uyğun əsas səmərəlilik göstəriciləri üzrə qiymətləndirilməlidir. Bunun üçün Azərbaycan Respublikası Prezidentinin Administrasiyasına tapşırılır ki, beynəlxalq məsləhətçi şirkət cəlb etməklə, təkliflərini altı ay müddətində Azərbaycan Respublikasının Prezidentinə təqdim etsin. Vacib götürülən istiqamətlərdən biri Azərbaycan Respublikası Prezidentinin fərman, sərəncam və tapşırıqlarının icra vəziyyətinə nəzarətin elektron qaydada həyata keçirilməsi üçün səmərəli informasiya sisteminin iş qaydasını yaratmaqla bağlıdır. Bəllidir ki, bəzən ölkə başçısının verdiyi fərman və tapşırıqların icra mexanizmi ilə bağlı problemlər olurdu. Həmin tapşırıqlar bəzən lazımınca icra olunmurdu. Bu nəzarət sisteminin elektron qaydada həyata keçirilməsinin nə kimi faydası olacaq?
Abil Bayramov: “Elə etmək lazımdır ki, sadə vətəndaşlar da həmin portala öz müraciətlərini yerləşdirə bilsinlər”
Sosial məsələlər üzrə ekspert Abil Bayramov “Bakı-Xəbər”ə açıqlamasında bildirdi ki, belə sistemə keçidin yalnız müsbət tərəfləri olacaq: “Bilirsiniz ki, indiyə qədən ölkə başçısının fərman və sərəncamlarının icrasına nəzarət olub. Ancaq burada insan amilinin rolu vardı. Prezidentə vəziyyəti əlaqədar şəxslər və ya qurumlar məruzə edirdilər. Ölkə başçısının özü də deyib ki, bəzən həmin adamlar məlumatları ondan gizlədirlər. Bu səbəbdən də dəfələrlə ictimai nəzarətin vacibliyindən danışıb. Yeni sistemə keçid elə həmin ictimai nəzarətin ən yüksək səviyyədə təminatı anlamına gəlir. Yeni elektron sistemin tətbiqi həm də nəzarətin səmərəlilik dərəcəsini artıra bilər. Bu həm də vətəndaş məmnunluğuna gətirəcək. Belə bir nəzarət sisteminə riayət olunarsa, nəzarətdən qalan hissələrlə də bağlı məlumatların əldə edilməsi mümkün olacaq. İstənilən halda, bu üsulla nəzarətin effektliyi bilavasitə nəzarətdən üstün olacaq”.
Ekspertin sözlərinə görə, yeni yaradılacaq resursun informasiya təminatı ilə də bağlı öhdəliklər müəyyənləşməlidir: “Müxtəlif qurumlara tapşırılmalıdır ki, həmin resursa lazım olan informasiyaları vahid elektron sistemə yerləşdirsinlər. Ayrı-ayrı qurumlar tərəfindən belə bir öhdəliyə əməl olunarsa, bu, nəzarətin effektliyini daha da yüksəldə bilər”.
Müsahibimizin sözlərinə görə, daha vacib olan amillərdən biri isə bu prosesdə vətəndaşların da iştirakını təmin etməkdir: “Yaradılan proqramda mütləq bu amil nəzərə alınmalıdır. Elə etmək lazımdır ki, sadə vətəndaşlar da həmin portala öz müraciətlərini yerləşdirə bilsinlər. Belə amillər nəzərə alınmasa, nəzarətin tam effektivliyini təmin etmək çətin olar. Bunun üçün də proqram mükəmməl və çoxfunksiyalı olmalıdır”.
Məhəmmədəli QƏRİBLİ
