Azərbaycan dövləti hər zaman öz vətəndaşına sahib çıxmağı, ən ağır məqamlarda ona arxa-dayaq olmağı bacarır. Deyərdik ki, dövlətimiz bütün məsələlərdə olduğu kimi, bu kimi hallarda da atdığı addımlarla digər ölkələrə bir nümunədir.
Bildiyimiz kimi, koronavirus təhlükəsi ilə bağlı bir çox dövlət çıxılmaz vəziyyətə düşüb, onlar nəinki xarici ölkələrdə təhsil alan, işləyən vətəndaşlarına, ümumiyyətlə, heç ölkə içində yaşayanlara da operativ dəstək göstərə bilmirlər. Azərbaycan dövləti isə bu məsələdə həmişə fərqlənib. Məlum olduğu kimi, koronavirus təhlükəsilə bağlı xarici ölkədəki Azərbaycan vətəndaşlarının ölkəmizə təxliyyə edilməsi istiqamətində dövlətimiz çox uğurlu, operativ addımlar atıb.
Elə İtaliyada təhsil alan tələbələrin operativ şəkildə ölkəmizə təxliyyə edilməsi son örnəklərdən biridir. İtaliyada təhsil alan azərbaycanlı tələbələrin Vətənə təxliyyə edilmələri üçün çarter reysləri təşkil edilib və onlar tez bir zamanda vətənimizə dönüblər. Onlar buna görə Azərbaycan rəhbərliyinə təşəkkür ediblər.
Qeyd edək ki, təxliyyədən əvvəl Roma hava limanında toplaşan 200-dən çox tələbəmiz yaradılan şəraitə görə öz minnətdarlıqlarını bildirib.
Bundan başqa, bu ilin yanvar ayında Azərbaycan Respublikasının Prezidenti İlham Əliyevin tapşırığına əsasən, müvafiq qurumlar tərəfindən Türkiyədə baş vermiş zəlzələ zonasında təhsil alan azərbaycanlı tələbələrin təxliyyə olunması prosesi həyata keçirildi və tələbələr sağ-salamat ölkəmizə gətirilərək ailələrinə qovuşdular.
Ümumiyyətlə, Azərbaycan dövləti bu kimi məsələlərdə bu dəfə də başqa ölkələri bir daha üstələdi. Xarici ölkələrdə təhsil alan vətəndaşlarının təxliyyə edilməsində ölkəmiz öz operativliyinə görə çox fərqləndi.
“...onların təhlükəsizliyinin təmin edilməsi məqsədilə belə operativ addımlar atır”
Məsələyə şərh verən “Novoye vremya” qəzetinin baş redaktoru, siyasi icmalçı Şakir Habiloğlu (Ağayev) bildirdi ki, koronavirus təhlükəsinin aradan qaldırılması, lokallaşdırılması istiqamətində Azərbaycan dövlətinin verdiyi qərarların özü də çox operativ oldu. “Ümumiyyətlə, başqa ölkələrlə müqayisədə Azərbaycan dövlətinin koronavirus təhlükəsinin qarşısının alınması istiqamətində qəbul etdiyi qərarların özü göstərir ki, dövlətimiz öz vətəndaşının taleyinə biganə deyil. Verilən bütün qərarlar, tapşırıqlar onu göstərdi ki, dövlətin əsas məqsədi insanların sağlamlığının qorunmasıdır. Vaxtında verilən bu çevik qərarların təbliğ edilməsi, daha çox insana çatdırılması üçün biz - media təmsilçiləri də böyük rol oynamalıyıq ki, dövlətin verdiyi qərarlara cəmiyyət reaksiya versin, əməl etsin. Çünki bu qərarların hamısı Azərbaycan vətəndaşlarının sağlamlığının qorunması, təhlükəsizliyinin təmin edilməsi və bu qorxulu virusdan az itki ilə çıxmağımıza yönəlib. Tələbələrin təxliyyəsinə gəlincə, səhv etmirəmsə, Bakı-İstanbul reysilə 230, Bakı-Roma reysilə isə 161 nəfər Azərbaycan vətəndaşı ölkəmizə təxliyyə edilib. Bu təqdirəlayiq haldır. Bu onu göstərir ki, Azərbaycan dövləti həm xaricdə təhsil alan tələbələrin, həm də səfərdə olan insanların taleyinə biganə qalmır və onların təhlükəsizliyinin təmin edilməsi məqsədilə belə operativ addımlar atır. Bu, eyni zamanda, ölkə başçısının öz vətəndaşlarına münasibətinin göstəricisidir. Dövlətimiz üçün hər şeydən üstə vətəndaşlarımız və onların sağlamlığı, təhlükəsizliyi dayanır”.
Ş.Ağayev qeyd etdi ki, Azərbaycan dövləti dünyanın harasında yaşamasından asılı olmayaraq, vətəndaşı üçün hər hansı bir təhlükə olarsa, buna bütün dövlətlərdən əvvəl operativ reaksiya verir. “Azərbaycan dövləti təkcə son hadisələr zamanı deyil, bundan əvvəl də xaricdə yaşayan, təhsil alan vətəndaşlarımızla bağlı bu cür operativ addımlar atıb. Həm zəlzələlər, həm hansısa bir fövqəladə hadisə, həm də dünyanı lərzəyə salan və dünya iqtisadiyyatını çökdürən koronavirus təhlükəsi zamanı dövlətimiz vətəndaşına ciddi dəstək verib və onların təhlükəsizliyini təmin edib. Bu, yenə də deyirəm, Azərbaycan Prezidentinin vətəndaşlarımıza bəslədiyi qayğı və diqqətin təzahürüdür. Azərbaycan dövlətinin xaricdə təhsil alan tələbələrin təhlükəsizliyini düşünərək onları tez bir zamanda ölkəmizə təxliyyə etməsinin əsas göstəricilərindən biri də bizim dövlətin iqtisadi gücü və imkanıdır ki, tez zamanda bu işi operativ həll edir. Doğrudur, bizdən də imkanlı dövlətlər var, amma onlar bunu düşünənə qədər artıq bizim dövlət təxliyyə işini həyata keçirir. Bu da dövlətin Azərbaycan insanına verdiyi dəyərdir. Fikrimcə, Azərbaycan dövlətinin başqa dövlətlərdən daha operativ şəkildə öz vətəndaşlarının taleyinə reaksiya verməsi bir örnəkdir” - deyə Ş.Ağayev qeyd etdi.
İradə SARIYEVA
