Çində başlayıb dünyaya yayılan yeni koronavirus can almaqda davam edir. Belə ki, Ümumdünya Səhiyyə Təşkilatı koronavirusla bağlı martın 16-na olan son statistik məlumatları və risq göstəricilərini yayımlayıb. Həmin məlumata görə, dünya üzrə yoluxma sayı, ümumilikdə, 157 ölkə/ərazi üzrə 169 610 nəfərdir. Son yoluxma sayı 192 nəfərdir.
Onların içərisində 15-i yeni olmaqla 6518 şəxs artıq ölüb. Bu günə qədər virus infeksiyasından 77 776 şəxsin sağaldığı qeydə alınıb. Statistikaya əsasən, onlardan 1600 nəfər yeni sağalanlardır.
Koronavirusla bağlı mübarizədə məsuliyyət təkcə dövlətin deyil, vətəndaşların da üzərinə düşür. Dövlət, zatən, üzərinə düşən bir sıra işləri yüksək səviyyədə görür. Ona görə də burada əsas məsuliyyət cəmiyyətin və tək-tək insanların üzərinə düşür. Hər bir vətəndaş qaydalara əməl etsə, biz sözügedən vəziyyətdən ən az zərərlə çıxarıq. Bu məsələdə də vətəndaşların üzərinə böyük məsuliyyət düşür.
Hazırda Azərbaycanda 18 nəfər aktiv koronavirus xəstəsi xüsusi rejimli xəstəxanalarda həkim nəzarəti altındadır, onların müalicəsi ilə bağlı müvafiq tədbirlər davam etdirilir. O da məlumdur ki, koronavirus pandemiyası əhali arasında bəzən panikaya da səbəb olur. Belə həssas məqamlarda panikaya yol verməmək, maksimum dərəcədə soyuqqanlı davranmaq lazımdır. Bunun üçün isə cəmiyyət üzərinə düşən işləri yerinə yetirməlidir. Nazirlər Kabineti yanında Operativ qərargah Azərbaycanda martın 14-dən etibarən tətbiq olunan xüsusi rejimin məzmununu açıqlayıb. Həmin qaydalardan çıxış edərək söyləmək olar ki, vətəndaşlar məhdudlaşdırıcı çağırışlara əməl etməli, kütləvi tədbirlərə, qonaqlıqlara, gəzintilərə getməməli, ictimai nəqliyyatdan istifadə, mağazalarda alış-veriş edərkən daha etibarlı qorunmalıdırlar.
“Hər bir vətəndaş fərd olaraq gigiyena qaydalarına yüksək səviyyədə əməl etməlidir”
Məsələyə münasibət bildirən ekspert Rəsul Cahangirlinin sözlərinə görə, koronavirusla mübarizədə əsas məsuliyyət cəmiyyətin üzərinə düşür: “Cəmiyyətin, fərdlərin vəzifəsi odur ki, qoyulan qaydalara yüksək səviyyədə əməl etsinlər. Hər bir vətəndaş fərd olaraq gigiyena qaydalarına yüksək səviyyədə əməl etməlidir. Dövlət üzərinə düşən işi görür. Nazirlər Kabineti əhalinin maarifləndirilməsi istiqamətində də çevik və operativ davranır. Operativ qərargah mövcud vəziyyət və görülən işlərlə bağlı ictimaiyyətə ətraflı məlumatlar verir. Qalır cəmiyyətin bu tövsiyələrə nə dərəcədə ciddi əməl etməsi. O da insanların özündən asılıdır. Bununla belə, bəzi şəxslər yaranmış şəraitdən istifadə edərək şayiə yayır və ictimaiyyətdə süni ajiotaj yaradırlar. Belə hallar da var. Hüquq-mühafizə orqanları – Baş Prokurorluq və Daxili İşlər Nazirliyi cəmiyyətdə panika yaradılmasına xidmət edən şəxslərin müəyyənləşdirilib məsuliyyətə cəlb olunacağı, onlar barəsində ən sərt tədbir görüləcəyinə dair bəyanatla çıxış edib. Göründüyü kimi, Azərbaycan bütün iqtisadi və tibbi gücünü koronavirus əleyhinə yönəldib. Cəmiyyət bu işdə fəal olmalı və dövlətə kömək etməlidir”.
Vidadi ORDAHALLI
