“Mən sizə göstəriş vermişdim ki, sizin nazirlik çox ciddi monitorinq, uçot aparsın. Onu da bilirəm ki, siz bu uçotu tətbiq etməyə başlayanda yerli icra orqanları tərəfindən böyük müqavimətlə rastlaşdınız”.
Bunu Prezident İlham Əliyev Əmək və Əhalinin Sosial Müdafiəsi naziri Sahil Babayevi qəbul edərkən deyib. Ölkə başçısının sözlərinə görə, çirkin kampaniya sifarişçilərinə aramızda yer yoxdur: “Sizə qarşı təxribatlar törədildi, eyni zamanda, mətbuatda çirkin kampaniyalar aparıldı. Biz bu kampaniyanın sifarişçilərini də yaxşı tanıyırıq. Onların bizim aramızda yeri yoxdur. Ona görə nazirlik tərəfindən bütün bu işlər tam nəzarətə götürülməlidir”.
Görünən odur ki, bir vaxtlar Əmək və Əhalinin Sosial Müdafiəsi Nazirliyi tərəfindən görülən işləri müəyyən qüvvələr tormozlamaq istəyiblər. Bu məqsədlə həmin qüvvələr müxtəlif pozucu kampaniyalara əl atıblar. Ölkə başçısının sifarişçilərin məlum olduğunu deməsi çox ciddi mətləblərdən xəbər verir. Bəlli olur ki, müəyyən qüvvələr əmək münasibətlərinin tənzimlənməsi ilə bağlı aparılan şəffaflaşdırma işlərindən narahat olublar. O səbəbdən belə neqativ xarakterli cəhdlər ediblər və sifarişçilər mətbuatdan öz məqsədləri üçün istifadə etməyə çalışıblar.
“Çox təəssüf ki, ölkənin içində bunu istəməyən bəzi məmurlar da olub”
Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin sözlərinə görə, burada iki məsələ var: “Birincisi ondan ibarətdir ki, Prezident İlham Əliyevin rəhbərliyi ilə genişmiqyaslı islahatlar həyata keçirilir. Bunu da istəməyən qüvvələr var. Həm ölkə daxilində, həm də ölkə xaricində belə qüvvələr fəaliyyət göstərirlər. Həmin qüvvələr hər vasitə ilə islahatları qaralamaq istəyirlər. Çox təəssüf ki, ölkənin içində bunu istəməyən bəzi məmurlar da olub. Belələri çox böyük postlarda çalışıblar. Bunlar mətbuatı əlində alət etməyə və bundan öz məqsədləri üçün istifadə etməyə çalışıblar. Hesab edirəm ki, belə hallar yolverilməzdir. Cənab Prezidentin rəhbərliyi ilə aparılan bu islahatlar qarşısıalınmazdır. Kimlərsə buna mane ola bilməyəcək. Aparılan islahatlar öz məntiqi nəticəsinə çatacaq. İkincisi, media bütün məsələlərdə böyük gücə malikdir. Ölkədə həyata keçirilən tədbirlərin daha geniş miqyasda yayılmasında, ictimaiyyətə çatdırılmasında müstəsna xidmətləri var. Ancaq çox təəssüf ki, bəzən peşəkarlığın az olmasından belə hallar yaranır. Ən pisi də odur ki, kimlərsə mediadan öz maraqları üçün bir vasitə kimi istifadə etmək istəyir. İstəyirlər ki, mətbuat kimlərinsə korporativ maraqlarına xidmət etsin. Hesab edirəm ki, belə hallara yol vermək olmaz”.
Vidadi ORDAHALLI
