Koronavirusun dünyada yayılmasının təhlükəli miqyas almağa başladığı ilk gündən Azərbaycanda xüsusi komissiya fəaliyyətə başladı. Risqin minimuma endirilməsi ilə bağlı tədbirlərə start verildi. Bəzi xəstəxanalarda xüsusi otaqlar yaradıldı. Hazırda vəziyyət tam nəzarətdə saxlanır.
Rəsmi məlumatlara əsasən, Azərbaycanda koronavirusa yoluxma halı çox az sayda insanda aşkarlanıb. Amma ABŞ, Çin, İtaliya, İran və Avropanın digər inkişaf etmiş ölkələrində bu pandemiya geniş yayılıb. Digər ölkələrin təcrübəsi göstərir ki, hətta dünyanın nəhəng, inkişaf etmiş ölkələri də belə hallardan sığortalanmayıb. Azərbaycan da dünyadan təcrid deyil və beynəlxalq problem olan epidemiyanın təsirinə məruz qala bilər. Ona görə də ölkəmizdə kiçik şübhə doğuracaq hər bir məqama böyük diqqət yetirilir. Virusa yoluxma ehtimalı olan şəxslər dərhal nəzarətə götürülür.
Bu gün dünyada “koronavirus panikası” dolaşır. Bu epidemiyanın yayılmasının yaratdığı narahatlıqla əlaqədar bir çox beynəlxalq tədbir təxirə salınır, koronavirus təhlükəsi ucbatından bir çox ölkə lideri əhali ilə təmaslarını belə dondurub.
Lakin dünyanın inkişaf etmiş ölkələrinin prezidentləri əhali ilə birbaşa təmasdan imtina etdikləri bir vaxtda Prezident İlham Əliyev Azərbaycanın bölgələrinə səfər edərək, vətəndaşlarla sıx təmasdadır. Onu da vurğulayaq ki, hazırda koronovirus infeksiyasına yoluxmaq təhlükəsi olmasına baxmayaraq, Prezident İlham Əliyevin bölgələrə səfərlərini dünya mediası da “Prezidentdən nümunəvi addım” kimi dəyərləndirir.
Hazırda dünya gündəmini zəbt edən koronavirus və onunla mübarizə üsulları bütün dünya tərəfindən geniş müzakirə edilir. Azərbaycana gəldikdə, deyə bilərik ki, vəziyyət tam nəzarət altındadır. Nazirlər Kabinetinin yanında xüsusi Operativ qərargah yaradılıb. Dövlət büdcəsindən bu epidemiya ilə mübarizə üçün milyonlarla vəsait ayrılır. Eyni zamanda, Azərbaycan vətəndaşlarının xarici ölkələrdən təxliyyə edilməsi üçün xüsusi tədbirlər həyata keçirilir. Onların həm quru sərhəddən, həm də hava nəqliyyatı vasitəsilə Azərbaycana gətirilməsi təmin edilir. Eyni zamanda, orta, ali məktəblərin, uşaq bağçalarının müvəqqəti olaraq bağlanması haqqında müvafiq göstərişlər verilib. Bunun da məqsədi uşaqları, yeniyetmələri o xəstəlikdən qorumaqdır. Azərbaycanda bu xəstəliyin bu günə olan məlumata görə, yayılması ehtimalı o qədər də yüksək deyil. Buna baxmayaraq, ölkədə yaradılan Operativ qərərgah hətta büdcəyə gəlirlərin daxil olduğu bir sıra yerlərin, sahələrin fəaliyyətinə məhdudiyyətlər qoyub. Dünya ölkələri ilə bağlı aparılan müqayisəli təhlillər göstərir ki, Azərbaycanda koronavirus infeksiyası ilə bağlı vəziyyət ciddi nəzarət altındadır və ölkədə lazımi tədbirlərin daha sürətlə həyata keçirilməsi üçün dövlət bütün addımları atır.
Burada bir nüansa da nəzər salmaq lazım gəlir. Bu günə olan məlumata görə, Azərbaycanda xəstəliyin yayılması ehtimalı o qədər də yüksək olmasa da, gündə bir neçə dəfə bu məsələ ilə bağlı ölkə ərazisində monitorinq aparılır, bütün sərhəd-keçid məntəqələrində xüsusi cihazlar quraşdırılıb, heç bir ölkə yükdaşımaların həyata keçirilməsinə məhdudiyyət qoymayıb və tranzit potensialının gücləndirilməsini qarşısına məqsəd qoymuş Azərbaycan da analoji mövqe nümayiş etdirir.
Bununla yanaşı, xəstəliyin yayılmaması üçün bütün məsələlər hər bir xırdalığa qədər düşünülür və müvafiq addımlar atılır.
Digər tərəfdən, Azərbaycan hökuməti Ümumdünya Səhiyyə Təşkilatı ilə sıx təmasdadır, xəstəliyi aşkar etmək üçün testlərin ölkəyə gətirilməsi ilə bağlı müvafiq işlər aparılır.
“Biz gün ərzində 5 mindən çox insanı sürətlə və yüksək dəqiqliklə test etmək imkanına malikik”.
Bunu Milli Məclisin Səhiyyə və Hüquq siyasəti və dövlət quruculuğu komitələrinin birgə iclasında Nazirlər Kabineti yanında Operativ qərargahın üzvü, Tibbi Ərazi Bölmələrini İdarəetmə Birliyi (TƏBİB) İdarə Heyətinin sədri Ramin Bayramlı koronavirusla bağlı mübarizə sahəsində görülən işlər, mövcud durum barədə məlumat verərkən bildirib.
R.Bayramlı deyib ki, indiyə qədər xəstəlik aşkar olunmadığı üçün 711 nəfər karantindən evə buraxılıb, hazırda karantində 560 nəfər var: “Bu günə qədər 4200-ə qədər müayinə aparılıb. 25 nəfərdə koronavirus aşkarlanıb. Onlardan 7 nəfərdə inkubasiya dövrü bitib, onlar sağalaraq evə buraxılıblar”.
İndisə gəlin dünya ölkələrində bu vəziyyətlə bağlı son statistikaya nəzər salaq. “COVİD-19” virusuna yoluxanların sayı dünya üzrə 182,725-ə çatıb.
Ümumdünya Səhiyyə Təşkilatının son statistikasına əsasən, dünya üzrə koronavirus xəstəliyindən ölənlərin sayı 7174 nəfərdir. 79,883 nəfər xəstəlikdən sağalıb. Epidemiya, ümumilikdə, 158 ölkədə yayılıb. İqtisadiyyatının gücünə görə dünyanın ilk 7 ölkəsi sırasına daxil olan İtaliyada bu sahədə vəziyyət daha acınacaqlıdır. Son sutka ərzində İtaliyada koronavirusdan 368 nəfər ölüb. Bu barədə İtaliya Mülki Müdafiə Departamentinin rəhbəri Ancelo Borrelli bildirib. Onun sözlərinə görə, virus qurbanlarının ümumi sayı 1809 nəfərə çatıb.
Borrelli qeyd edib ki, son bir gündə İtaliyada daha 2853 nəfərdə virus aşkarlanıb. Hazırda ölkədə koronavirusa yoluxanların sayı 20,6 mindən çoxdur. Bütün bu müqayisələr göstərir ki, ölkəmizdə dünyanı cənginə alan epidemiya ilə bağlı dövlət səviyyəsində ciddi tədbirlər görülür və vəziyyət normaldır. Ancaq hesab edirik ki, vətəndaşlarımız da bu məsələdə məsuliyyətli davranmalı, öz şəxsi gigiyenalarına xüsusi fikir verməlidirlər.
Məhəmmədəli QƏRİBLİ
