Əmək və Əhalinin Sosial Müdafiəsi naziri Sahil Babayev Prezident İlham Əliyev tərəfindən qəbul edilən zaman bəzi kommunal xərclərlə bağlı tətbiq edilən limitin artırılması istiqamətində hökumətin iş apardığını bildirib.
Nazir deyib ki, bu il üçün dövlət büdcəsindən ayrılmış vəsait çərçivəsində 85-90 min ailənin ünvanlı sosial yardımla əhatə olunması planlaşdırılır: "Bu da ünvanlı sosial yardım proqramının əlavə olaraq daha 20 faiz genişləndirilməsi deməkdir. Bununla bərabər, kriteriyaların yumşaldılması və bu istiqamətdə əhaliyə dəstək verilməsi barədə Sizin tapşırığınız olmuşdu. Artıq ötən il bir sıra istiqamətlərdə addımlar atıldı, torpaq pay mülkiyyətilə bağlı yüngülləşmələr tətbiq olundu, sırf o islahatın nəticəsində əlavə 7 min ailə ünvanlı sosial yardım proqramına daxil ola bildi.
Bu il üçün də kommunal xərclərin limitinin artırılmasına dair təkliflər hazırlanıb və hökumət tərəfindən müzakirə olunur. Yeni parlament tərəfindən qanunvericiliyə edilən dəyişikliklərlə biz 85-90 min ailənin məhz ünvanlı sosial yardım proqramı ilə əhatə olunmasını təmin edəcəyik”.
Nazir bildirib ki, paralel olaraq, ehtiyac meyarının bir il ərzində ciddi şəkildə, 10 faizdən çox artırılması, 143 manatdan 160 manata çatdırılması ünvanlı sosial yardımın məbləğinin də artmasına imkan verib. "Əgər 2018-ci ildə ünvanlı sosial yardımın məbləği 160 manat idisə, ötən il 200 manata çatdı. Bu il üçün proqnozlarımıza əsasən, bu rəqəm 215-220 manat arasında olacaq. Deməli, hər ay ünvanlı sosial yardım alanlar bu qədər vəsaitlə təmin olunacaqlar”.
Göründüyü kimi, nazir kommunal xərclərin limitinin artırılmasına dair təkliflər hazırlandığını və hökumət tərəfindən müzakirə olunduğunu qeyd edib. Ölkə başçısı həmin fikrə heç bir irad bildirməyibsə, deməli, bu istiqamətdə yeniliyin şahidi ola biləcəyik. Nazirin bu açıqlaması əhali arasında çox müsbət qarşılanıb. Bəllidir ki, hökumət əsasən elektrik enerjisi və təbii qaza müəyyən limit tətbiq edir. Əhalinin müxtəlif təbəqələri tərəfindən kommunal xidmətlərə olan limitlərin artırılması ilə bağlı ölkə rəhbərliyindən dəfələrlə xahişlər edilib. Görünür, hökumət bunu nəzərə almağı məqsədəuyğun sayıb. Belə bir addımın atılmasına cəmiyyətin ehtiyac meyarını necə dəyərləndirə bilərik?
İlqar Hüseynli: “Ölkə iqtisadiyyatının kifayət qədər potensialı var ki, bu limitlər artırılsın”
Ekspert İlqar Hüseynli “Bakı-Xəbər”ə açıqlamasında bildirdi ki, bu addımın atılmasına əhalinin böyük ehtiyacı var: “Xatırladaq ki, 2016-cı il 22 dekabrda Prezident İlham Əliyevin tapşırığı ilə ölkədə təbii qaz və elektrik enerjisindən istifadəyə görə güzəştli limitlər artırılıb. Əhali üzrə aylıq elektrik enerjisi istehlakı 300 kilovatsaatadək olan istehlakçılar üçün dəyişdirilməyərək mövcud 7 qəpik səviyyəsində saxlanıb, aylıq istehlak həcminin 300 kilovatsaatdan çox olan hissəsi üçün isə 11 qəpik müəyyənləşdirilib. Eləcə də təbii qazın pərakəndə satış tarifi əhali üzrə illik istehlak həcmi 1700 kubmetrədək olan istehlakçılar üçün dəyişdirilməyərək bir kubmetr üçün mövcud 10 qəpik səviyyəsində saxlanıb, illik istehlak həcminin 1700 kubmetrdən çox olan hissəsi üçün isə 20 qəpik müəyyənləşdirilib. Bu ilin yanvar ayından isə təbii qaza olan limit 22000 kubmetrə qədər artırılıb. Hesab edirəm ki, ölkə əhalisi üçün indi ən böyük müjdə işıq və qaz limitinin tam aradan qaldırılması olardı. Çünki insanların gəlirlərinin əhəmiyyətli bir hissəsi işıq və qaz ödənişinə gedir. Limiti keçən ailələr ikiqat ödəniş etməli olurlar. Bunu etmək mümkün deyilsə, ən azından, limitin artırılması yaxşı olardı. Bir neçə dəfə bu məsələ gündəmə gəlib. Ekspertlər və bəzi deputatlar təkliflərlə çıxış ediblər ki, limit ləğv olunsun, bu məbləğ büdcə üçün o qədər böyük rəqəm deyil. Bir çox ailə güzəştli qiymətlə bağlı tətbiq olunan limiti tükədib, təbii qazı yüksək qiymətlə almağa başlayır. Bu da maddi vəziyyəti elə də yüksək olmayan insanlar üçün çətinlik yaradır. Xüsusən də bölgələrdə, mərkəzləşdirilmiş istilik sistemi olmayan Bakı kəndlərində əhali təbii qazdan imtina edərək odun yandırmağa başlayıb.
Ölkə iqtisadiyyatının kifayət qədər potensialı var ki, bu limitlər artırılsın. Sahil Babayevin Prezidentin qəbulunda kommunal xidmətlərlə bağlı limitlərin artırılması istiqamətində hökumətin iş apardığını deməsi bununla bağlı ciddi ümid yaratmış oldu. Hesab edirəm ki, bu il kommunal xidmətlərə limitlərin artırılmasının şahidi ola bilərik. Verilən anons bunu söyləməyə əsas verir”.
Məhəmmədəli QƏRİBLİ
