Dünyanın gündəliyində dayanan koronavirus pandemiyası bütün sahələrə sirayət etməkdədir. Elə bir vəziyyət yaranıb ki, hətta böyük, inkişaf etmiş dövlətlər belə sözügedən virusdan sığortalanmayıb. Koronavirusun yaratdığı situasiya ilə bağlı ayrı-ayrı ölkələrdə ümumi mənzərə eynidir. Bu gün dünyanın aparıcı ölkələrinin səhiyyələri belə COVID-19-un əsirinə çevriliblər. Böyük yeddiliyə daxil olan İtaliya kimi ölkədə vəziyyət daha kritikdir. Bir sözlə, hazırda koronavirusla bağlı müzakirələr bütün spektrləri - tibb dünyasını, siyasəti, iqtisadiyyatı, medianı əhatə edir.
Azərbaycanda da sözügedən məsələ ilə bağlı bir sıra işlər görülür. Fevral ayından Azərbaycanda koronavirusla mübarizə ilə bağlı konkret tədbirlər həyata keçirilir. Azərbaycan resurslarını işə salaraq, bütün mümkün qabaqlayıcı və operativ tədbirlərini görür. Daha mürəkkəb situasiyalara hazır olmaq üçün isə Azərbaycanda daha da sərt tədbirlər tətbiq oluna bilər. İnzibati Xətalar Məcəlləsinə təklif edilən dəyişikliklərə görə, Azərbaycanda epidemiya əleyhinə rejimi pozanlar cərimə ediləcəklər. Belə ki, epidemiya əleyhinə sanitariya, gigiyena və karantin rejimlərinin pozulmasına görə fiziki şəxslər 100 manatdan 200 manatadək məbləğdə, vəzifəli şəxslər 1500 manatdan 2000 manatadək məbləğdə cərimə ediləcəklər. Həyata keçirilən tədbirlərin başlıca məqsədlərindən biri də hökumətin infeksiyanın miqyasının genişlənəcəyi ehtimalına daha hazırlıqlı olmasını təmin etməkdir. Nazirlər Kabineti əhalinin maarifləndirilməsi istiqamətində də çevik və operativ davranır. Operativ qərargah mövcud vəziyyət və görülən işlərlə bağlı ictimaiyyətə ətraflı məlumatlar verir. Bütün bunlarla yanaşı, zərurət yaranarsa, hətta ölkədə fövqəladə vəziyyətin elan olunmasına ekspertlər necə yanaşırlar?
“...insanların həyatının qorunması hər şeydən önəmlidir”
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, ehtiyac yaranarsa, ölkədə fövqəladə vəziyyətin elan olunmalıdır: “Hesab edirəm ki, bunda elə bir qəbahət bir şey yoxdur. Məsələ ondadır ki, koronavirusla mübarizədə bütün dünya ölkələri tədbirlər görür. O cümlədən, Azərbaycanda da bir sıra işlər həyata keçirilir. Düzdür, dünyada müəyyən qüvvələr bunu, bir növ, daha da şişirdirlər. Burada da başqa məqsədlər ola bilər. Yəni bu amili də inkar etmək olmaz. Reallıq ondan ibarətdir ki, Azərbaycan dövləti bununla bağlı yetərincə işlər görür. O cümlədən, dünya ölkələrində koronavirusla bağlı vaksin də hazırlanır. Hesab edirəm ki, ölkəyə giriş-çıxışa məhdudiyyətin qoyulması, sərhədlərin bağlanması öz müsbət nəticəsini verər. Bütün bunlara baxmayaraq, ehtiyac yaranarsa, ölkədə fövqəladə vəziyyət elan edilməlidir. Yəni virusun yayılmasını cilovlamaq mümkün olmasa, o zaman belə addımlar atılmalıdır və cəmiyyət buna hazır olmalıdır. Çünki insanların həyatının qorunması hər şeydən önəmlidir. Ümid edirəm ki, Azərbaycanda fövqəladə vəziyyətin elan olunmasına ehtiyac qalmayacaq. Qısa müddətə bu bəladan bəşəriyyət qurtulacaq. Çünki dünyada tarix boyu belə hallar olub və bəşəriyyət bu sınaqlardan çıxıb. İndi 21-ci əsrdir. Hansı ki, elm və texnika çox inkişaf edib. Belə bir əsrdə bu prosesin uzun çəkəcəyi ehtimalı çox azdır. Çox güman ki, fövqəladə vəziyyətin elan olunmasına ehtiyac qalmayacaq. Onsuz da dövlət bütün tədbirləri görür. Ancaq istənilən vəziyyətə cəmiyyət hazır olmalıdır”.
Vidadi ORDAHALLI
