Məlum olduğu kimi, Ümumdünya Səhiyyə Təşkilatı (ÜST) tərəfindən koronavirus infeksiyasının (COVİD-19) qlobal pandemiya elan olunduğunu nəzərə alaraq, Azərbaycan ərazisində virusun yayılmasının qarşısını almaq məqsədilə “ASAN Viza” elektron portalı vasitəsilə 45 gün müddətinə vizaların rəsmiləşdirilməsi dayandırılıb. Azərbaycana səfər etmək istəyən xarici ölkə vətəndaşlarının viza rəsmiləşdirilməsi üçün ölkəmizin müvafiq səfirlik və baş konsulluqlarına müraciət etmələri xahiş olunur.
Bütövlükdə, Nazirlər Kabinetinin yanında Operativ qərargah koronovirusla mübarizə ilə bağlı bir sıra qərarlar qəbul edib. Azərbaycan və İran arasında sərhəd müvəqqəti bağlanıb. Qərar ÜST tərəfindən COVİD-19 koronavirus infeksiyasının qlobal pandemiya elan olunduğunu nəzərə alaraq verilib. Ölkəyə giriş-çıxışa ciddi nəzarət var. Bununla bağlı bir sıra məhdudiyyətlər tətbiq olunur. Eyni zamanda, bir sıra beynəlxalq təyyarə reysləri təxirə salınıb. Yalnız xaricdə qalan və gələ bilməyən Azərbaycan vətəndaşları xüsusi çarter reysilə ölkəyə gətirilir. Ölkədə koronavirusa yoluxma hallarının müəyyənləşdirilməsi ilə əlaqədar müvafiq xəstəxanalar ayrılıb və karantin zonaları yaradılıb. Lazımi avadanlıqların, preparatların, mütəxəssislərin Azərbaycana gətirilməsi üçün müvafiq işlər görülür. Bir sözlə, Azərbaycan tərəfi koronavirusun yarada biləcəyi risqləri önləmək üçün bütün tətbirləri görür. Bu baxımdan ölkəyə giriş-çıxışın məhdudlaşdırılmasının əhəmiyyətini ekspertlər necə dəyərləndirirlər?
“Bu kimi önləyici tədbirlərin görülməsi, bir növ, vacib zərurətə çevrilib”
Məsələyə münasibət bildirən siyasi ekspert Ramil Hüseynovun fikrincə, Azərbaycana giriş-çıxışın məhdudlaşdırılması koronavirusla mübarizədə effektli nəticə verə bilər: “Məlum olduğu kimi, Nazirlər Kabinetinin yanında Operativ qərargah sözügedən məsələni daim diqqət mərkəzində saxlayır. Koronavirusla mübarizə ilə bağlı bir sıra təcili qərarlar qəbul edib və bu proses davam edir. Ölkəyə giriş-çıxışa məhdudiyyət qoyulmasaydı, o zaman koronavirusun yayılma risqi böyük olardı. Nəzərə almalıyıq ki, təkcə Azərbaycan yox, bir sıra digər ölkələr də belə sərt qərarlar qəbul ediblər. Sərhədləri bağlayıb, əksər təyyarə reyslərini təxirə salıblar. Bu kimi önləyici tədbirlərin görülməsi, bir növ, vacib zərurətə çevrilib. Çünki, adətən, virus gediş-gəliş zamanı kütləvi yayılır. Ona görə də ölkəyə gələnlərin ciddi şəkildə yoxlanılması doğru qərardır. Həmçinin, zərurət olmadıqda giriş-çıxışın qarşısının alınması lazımlı bir addımdır. Hesab edirəm ki, imkan daxilində ölkə vətəndaşları bu aralar zərurət olmadan hansısa xarici ölkəyə getməsinlər. Çünki istənilən risqi düzgün dəyərləndirmək və bundan doğru nəticə çıxarmaq lazımdır”.
Vidadi ORDAHALLI
